ഒരു യുവതിയുടെ ചിത്രം നിർമ്മിത ബുദ്ധി (എ.ഐ) സാങ്കേതികവിദ്യ ഉപയോഗിച്ച് മാറ്റം വരുത്തി സമൂഹമാധ്യമങ്ങളിൽ പ്രചരിപ്പിച്ച സംഭവത്തിൽ കോക്ക്‌റോച്ച് ജനതാ പാർട്ടി (സി.ജെ.പി) നേതാക്കൾക്ക് ഡൽഹി പൊലീസ് വീണ്ടും നോട്ടീസ് അയച്ചു. ഡൽഹി ഹൈക്കോടതിയുടെ കർശന നിർദ്ദേശത്തെ തുടർന്നാണ് സമൻസ് അയക്കൽ ഉൾപ്പെടെയുള്ള നടപടികളിലേക്ക് പൊലീസ് കടന്നത്. മുൻപ് നടന്ന പ്രതിഷേധ പരിപാടികൾക്കിടെ യുവതിയുടെ ചിത്രം മോർഫ് ചെയ്ത് മോശമായി ചിത്രീകരിക്കുകയും ബാനറുകളിൽ പ്രദർശിപ്പിക്കുകയും ചെയ്തുവെന്ന പരാതിയിലാണ് ഇപ്പോൾ അന്വേഷണം ശക്തമാക്കിയിരിക്കുന്നത്.
പ്രധാനമന്ത്രി നരേന്ദ്ര മോദിയുടെ ചിത്രത്തിനൊപ്പം എ.ഐ സാങ്കേതികവിദ്യ വഴി വ്യാജമായി ചേർത്തുവച്ച ചിത്രങ്ങളാണ് ഇന്റർനെറ്റിലും സോഷ്യൽ മീഡിയ പ്ലാറ്റ്‌ഫോമുകളിലും വ്യാപകമായി പ്രചരിപ്പിക്കപ്പെട്ടത്. വ്യക്തിഹത്യയ്ക്ക് ഇരയായ യുവതി കോടതിയെ സമീപിച്ചതോടെയാണ് ഡൽഹി ഹൈക്കോടതി വിഷയം ഗൗരവമായി എടുത്തത്. വിദ്വേഷം പടർത്തുന്ന തരത്തിലുള്ള ഇത്തരം ഉള്ളടക്കങ്ങൾ 24 മണിക്കൂറിനുള്ളിൽ നീക്കം ചെയ്യാൻ സോഷ്യൽ മീഡിയ കമ്പനിയായ മെറ്റയോട് കോടതി മുൻപ് ഉത്തരവിട്ടിരുന്നു.
കേസിൽ പരാതിക്കാരിയായ യുവതിക്ക് മതിയായ പൊലീസ് സംരക്ഷണം നൽകാനും കോടതി നിർദ്ദേശിച്ചിട്ടുണ്ട്. അഭിജീത് ദിപ്കെ, സൗരവ് ദാസ്, അശുതോഷ് റാങ്ക, രത്ന സിങ് തുടങ്ങിയ പ്രമുഖ സി.ജെ.പി നേതാക്കൾക്കെതിരെയാണ് നിലവിൽ പൊലീസ് നടപടികൾ പുരോഗമിക്കുന്നത്. ഡിജിറ്റൽ തെളിവുകളും സമൂഹമാധ്യമങ്ങളിലെ ലിങ്കുകളും ശേഖരിച്ചു വരുന്നതായും സംഭവത്തിൽ കൂടുതൽ നിയമനടപടികൾ സ്വീകരിക്കുമെന്നും ഡൽഹി പൊലീസ് വ്യക്തമാക്കി.
