ന്യൂഡൽഹി/കൊൽക്കത്ത: ഭാരതത്തിൽ വൻ ഭീകരാക്രമണങ്ങൾക്കും വർഗീയ അരാജകത്വത്തിനും പദ്ധതിയിട്ട നിരോധിത ഭീകര സംഘടനയായ ജമാഅത്തുൽ മുജാഹിദീൻ ബംഗ്ലാദേശിന്റെ (JMB) അനുബന്ധ സംഘടനയിലെ പ്രധാന ഗൂഢാലോചനക്കാരനെ ദേശീയ അന്വേഷണ ഏജൻസി (NIA) അറസ്റ്റ് ചെയ്തു. പശ്ചിമ ബംഗാളിൽ നിന്ന് പിടിയിലായ പ്രതിയിൽ നിന്ന് മൊബൈൽ ഫോണുകൾ, മെമ്മറി കാർഡുകൾ ഉൾപ്പെടെയുള്ള നിരവധി നിർണായക ഡിജിറ്റൽ ഉപകരണങ്ങളും ദേശവിരുദ്ധ രേഖകളും എൻഐഎ പിടിച്ചെടുത്തു. രാജ്യത്തിന്റെ പരമാധികാരത്തിനും സുരക്ഷയ്ക്കും ഭീഷണിയാകുന്ന രീതിയിൽ ഭീകര ശൃംഖല വ്യാപിപ്പിക്കാൻ ശ്രമിച്ച കേസിലാണ് നടപടി.
നേരത്തെ സെപ്റ്റംബർ 29-ന് അസം, പശ്ചിമ ബംഗാൾ, കേരളം എന്നിവിടങ്ങളിൽ എൻഐഎ നടത്തിയ വ്യാപക പരിശോധനകളിൽ ഇതേ ഗൂഢാലോചന കേസുമായി ബന്ധപ്പെട്ട് 13 പേരെ അറസ്റ്റ് ചെയ്തിരുന്നു. കേസിൽ ഇക്കഴിഞ്ഞ ജൂൺ 25-ന് 11 പ്രതികൾക്കെതിരെ എൻഐഎ കുറ്റപത്രം സമർപ്പിച്ചിട്ടുമുണ്ട്. ജമാഅത്തുൽ മുജാഹിദീൻ ബംഗ്ലാദേശിന്റെ പോഷക സംഘടനയായ ‘ഇമാം മഹ്മൂദർ കഫീല’ (IMK) വഴി പശ്ചിമ ബംഗാളിലും വടക്കുകിഴക്കൻ സംസ്ഥാനങ്ങളിലും തീവ്രവാദ ആശയം പ്രചരിപ്പിക്കാനും ഭീകര ശൃംഖല ശക്തിപ്പെടുത്താനും ശ്രമിച്ചതായി അന്വേഷണത്തിൽ കണ്ടെത്തിയിരുന്നു.
ജെഎംബി മുതിർന്ന നേതാവായ ഇമാം മഹ്മൂദ് ഹബീബുള്ളയുടെ നേതൃത്വത്തിലാണ് ഐഎംകെ രൂപീകരിച്ചത്. ചെറുപ്പക്കാരെ മസ്തിഷ്ക പ്രക്ഷാളനം നടത്തി ഭീകരപ്രവർത്തനങ്ങളിലേക്ക് ആകർഷിക്കുക, വിദ്വേഷ സാഹിത്യങ്ങൾ വിതരണം ചെയ്യുക, ടെലിഗ്രാം അടക്കമുള്ള ഡിജിറ്റൽ പ്ലാറ്റ്‌ഫോമുകൾ ദുരുപയോഗം ചെയ്ത് ഇന്ത്യയ്‌ക്കെതിരെ വ്യാജപ്രചാരണങ്ങൾ നടത്തുക എന്നിവയായിരുന്നു സംഘത്തിന്റെ ലക്ഷ്യം. രഹസ്യ യോഗങ്ങൾ ചേർന്നാണ് ഇവർ അനുഭാവികളെ സംഘടിപ്പിച്ചിരുന്നത്. അറസ്റ്റിലായ പ്രതിയിൽ നിന്ന് ലഭിച്ച ഡിജിറ്റൽ രേഖകൾ വിശദമായി പരിശോധിച്ചുവരികയാണെന്നും കൂടുതൽ അറസ്റ്റുകൾ ഉണ്ടാകുമെന്നും എൻഐഎ വൃത്തങ്ങൾ അറിയിച്ചു.
