വോട്ടിംഗ് പ്രക്രിയയിലെ ക്രമക്കേടുകൾ ആരോപിച്ചും വോട്ടർ പട്ടിക പരിഷ്കരണ (എസ്ഐആർ) പ്രക്രിയ ചോദ്യം ചെയ്തും പ്രതിപക്ഷ നേതാവ് രാഹുൽ ഗാന്ധി സുപ്രീം കോടതിയിൽ ഹർജി സമർപ്പിച്ചു. ചീഫ് ഇലക്ഷൻ കമ്മീഷണർ ജ്ഞാനേഷ് കുമാർ അടിയന്തരമായി രാജി വെക്കണമെന്ന് ആവശ്യപ്പെട്ടാണ് പ്രതിപക്ഷം കോടതിയിൽ ഹർജി സമർപ്പിച്ചത്. ഇന്ത്യ മുന്നണിയുടെ പ്രമുഖ നേതാക്കൾ ഒപ്പുവെച്ച ഹർജി നാളെ സുപ്രീം കോടതിയുടെ പരിഗണനയ്ക്ക് വരും.
ഡൽഹിയിൽ പ്രതിപക്ഷ കക്ഷികൾ സംഘടിപ്പിച്ച വൻ പ്രതിഷേധ റാലിയുടെ തുടർച്ചയായാണ് രാഹുൽ ഗാന്ധി സുപ്രീംകോടതിയിൽ എത്തി ഹർജി നൽകിയത് . രാഹുൽ ഗാന്ധിയും പ്രിയങ്ക ഗാന്ധിയും ഉൾപ്പെടെയുള്ള മുതിർന്ന നേതാക്കളുടെ നേതൃത്വത്തിൽ ആണ് പ്രവർത്തകർ സുപ്രീം കോടതിയിലേക്ക് മാർച്ച് നടത്തിയത്. രാജ്യത്തെ ജനാധിപത്യ ഭരണഘടന നേരിടുന്ന വലിയ വെല്ലുവിളിയാണിതെന്ന് രാഹുൽ ഗാന്ധി മാധ്യമങ്ങളോട് പറഞ്ഞു.
തിരഞ്ഞെടുപ്പ് കമ്മീഷന്റെ നടപടികൾ പക്ഷപാതപരമാണെന്നാണ് പ്രതിപക്ഷത്തിന്റെ പ്രധാന ആരോപണം. എന്നാൽ ആരോപണങ്ങൾ അടിസ്ഥാനരഹിതമാണെന്നും തോൽവി ഭയന്നാണ് കോൺഗ്രസ് ഇത്തരം പ്രതിഷേധങ്ങൾ നടത്തുന്നതെന്നും ഭരണപക്ഷം തിരിച്ചടിച്ചു. കേസിൽ നാളെ സുപ്രീം കോടതി കൈക്കൊള്ളുന്ന നിലപാട് രാജ്യത്തെ രാഷ്ട്രീയ സാഹചര്യങ്ങളിൽ ഏറെ നിർണായകമാകും.
