സിംബാബ്‌വെ ക്രിക്കറ്റ് ലോകത്തെ കണ്ണീരിലാഴ്ത്തി മുൻ ക്രിക്കറ്റ് താരവും പ്രശസ്ത അംപയറുമായ സാറാ ദംബനേവാന (36) അന്തരിച്ചു. ഹരാരെയിലെ ആശുപത്രിയിൽ ചികിത്സയിലിരിക്കെയായിരുന്നു അവരുടെ അപ്രതീക്ഷിത അന്ത്യം. ഈ വർഷം മാർച്ചിൽ നടന്ന ഒരു വൈദ്യശാസ്ത്ര ശസ്ത്രക്രിയയെത്തുടർന്ന് ചികിത്സയിലായിരുന്ന സാറയുടെ മരണകാരണം സംബന്ധിച്ച് ഔദ്യോഗിക സ്ഥിരീകരണങ്ങൾ പുറത്തുവന്നിട്ടില്ല.
2009 മുതൽ 2014 വരെയുള്ള കാലയളവിൽ സിംബാബ്‌വെ ദേശീയ ടീമിനായി കളത്തിലിറങ്ങിയ സാറ, 2011-ലെ വേൾഡ് കപ്പ് ക്വാളിഫയറിലും രാജ്യത്തെ പ്രതിനിധീകരിച്ചു. പിന്നീട് 2022-ൽ ഐസിസിയുടെ അംപയർ പാനലിന്റെ ഭാഗമായ അവർ, 2023 സെപ്റ്റംബർ രണ്ടിനാണ് അംപയറായി അന്താരാഷ്ട്ര അരങ്ങേറ്റം കുറിക്കുന്നത്.
യുഎഇയിൽ നടന്ന 2024 വനിതാ ടി20 ലോകകപ്പിലും ഇന്ത്യയിലും ശ്രീലങ്കയിലുമായി നടന്ന 2025 വനിതാ ഏകദിന ലോകകപ്പിലും മത്സരം നിയന്ത്രിച്ച സാറ, ലോകകപ്പ് ഫൈനലിൽ അംപയറാകുന്ന ആദ്യ സിംബാബ്‌വെ താരം എന്ന ചരിത്രനേട്ടവും സ്വന്തമാക്കിയിരുന്നു. സൗത്ത് ആഫ്രിക്കയിൽ നടന്ന 2023 അണ്ടർ-19 വനിതാ ടി20 ലോകകപ്പിലെ ഇന്ത്യ-ഇംഗ്ലണ്ട് ഫൈനൽ മത്സരമായിരുന്നു അത്. 42 വനിതാ ടി20ഐ, 11 വനിതാ ഏകദിനങ്ങൾ, 10 പുരുഷ ടി20ഐ പോരാട്ടങ്ങൾ ഉൾപ്പെടെ 63 അന്താരാഷ്ട്ര മത്സരങ്ങളിലാണ് സാറ അംപയറായി സേവനമനുഷ്ഠിച്ചത്.
സാറയുടെ അകാല വിയോഗത്തിൽ സിംബാബ്‌വെ ക്രിക്കറ്റ് ചെയർമാൻ തവെങ്‌വ മുകുഹ്‌ലാനി ആഴത്തിലുള്ള ദുഃഖം രേഖപ്പെടുത്തി. കളിക്കാരിയായും അംപയറായും സിംബാബ്‌വെ ക്രിക്കറ്റിന് മികച്ച സംഭാവനകൾ നൽകിയ സാറയുടെ വേർപാട് കായിക ലോകത്തിന് നികത്താനാവാത്ത നഷ്ടമാണെന്നും, വരും തലമുറയ്ക്ക് അവർ എന്നും വലിയൊരു പ്രചോദനമായിരിക്കുമെന്നും അദ്ദേഹം അനുസ്മരിച്ചു.
