ഗൗരവമേറിയ അന്താരാഷ്ട്ര നയതന്ത്ര ചർച്ചകൾക്കിടയിലും തന്റെ തനതായ ഹാസ്യബോധം കൊണ്ട് സദസ്സിന്റെ കൈയടി നേടി കേന്ദ്ര വിദേശകാര്യ മന്ത്രി എസ്. ജയശങ്കർ. ബ്ലൂംബെർഗ് ന്യൂ ഇക്കോണമി ഫോറത്തിൽ (Bloomberg New Economy Forum) പാനൽ ചർച്ച നയിച്ച മോഡറേറ്റർ ഇന്ത്യയുടെ വിദേശനയത്തെക്കുറിച്ച് വിശദീകരിച്ചപ്പോൾ ജപ്പാനെ ഒഴിവാക്കിയതാണ് മന്ത്റിയുടെ രസകരമായ തിരുത്തലിന് വഴിവെച്ചത്. ജപ്പാന്റെ പേര് വ്യക്തമായി തിരുത്തിയില്ലെങ്കിൽ വീട്ടിൽ വലിയ പ്രശ്നങ്ങൾ ഉണ്ടാകുമെന്ന ജയശങ്കറിന്റെ പരാമർശം വേദിയിൽ വൻ ചിരി തരംഗമാണ് സൃഷ്ടിച്ചത്.
ബ്ലൂംബെർഗ് ന്യൂസ് എഡിറ്റർ ഇൻ ചീഫ് ജോൺ മിക്ക്ലെത്വൈറ്റ്, ഇന്ത്യയുടെ വിദേശനയ സമീപനത്തെ ഒറ്റവാചകത്തിൽ സംഗ്രഹിച്ചുകൊണ്ട് ജയശങ്കറിന്റെ മുൻ പ്രസ്താവന ഉദ്ധരിക്കുകയായിരുന്നു. “അമേരിക്കയുമായി സഹകരിക്കുക, ചൈനയെ കൈകാര്യം ചെയ്യുക, യൂറോപ്പിനെ ഒപ്പം നിർത്തുക, റഷ്യയ്ക്ക് ഉറപ്പുനൽകുക” (Engage America, Manage China, Cultivate Europe, Reassure Russia) എന്നായിരുന്നു അദ്ദേഹം പറഞ്ഞത്. എന്നാൽ പുഞ്ചിരിയോടെ ഇത് തിരുത്തിയ ജയശങ്കർ, തന്റെ യഥാർത്ഥ നയരേഖയിൽ അഞ്ചാമതൊരു രാജ്യം കൂടിയുണ്ടെന്നും അത് ജപ്പാനാണെന്നും ഓർമ്മിപ്പിച്ചു. “ഇത് ഞാൻ തിരുത്തിയില്ലെങ്കിൽ എനിക്ക് വീട്ടിൽ വലിയ പ്രശ്നങ്ങൾ നേരിടേണ്ടി വരും, അതിനാൽ ഇക്കാര്യം റെക്കോർഡിൽ വരണം” എന്ന് അദ്ദേഹം തമാശയായി കൂട്ടിച്ചേർത്തതോടെ സദസ്സ് ചിരിയിലമർന്നു. ജാപ്പനീസ് വംശജയായ ക്യോക്കോ ജയശങ്കർ ആണ് അദ്ദേഹത്തിന്റെ ഭാര്യ.
തന്റെ ഈ വിദേശനയ സംഗ്രഹം ലളിതവും വ്യക്തവുമാക്കാനാണ് താൻ ശ്രമിച്ചതെന്നും എന്നാൽ ഈ അഞ്ച് വിദേശ രാജ്യങ്ങളുമായുള്ള ബന്ധം കൈകാര്യം ചെയ്യുന്നത് അത്ര എളുപ്പമുള്ള കാര്യമാണെന്ന് താൻ ഒരിക്കലും പറഞ്ഞിട്ടില്ലെന്നും അദ്ദേഹം വ്യക്തമാക്കി. 2020-ലാണ് താൻ ഈ നയരേഖ എഴുതിയതെന്നും അന്നുതൊട്ട് ഇന്നുവരെ ആഗോള രാഷ്ട്രീയ സാഹചര്യം കൂടുതൽ സങ്കീർണ്ണവും സങ്കീർണ്ണവുമാണെന്ന് തന്റെ പുസ്തകത്തിൽ വിശദീകരിക്കുന്നുണ്ടെന്നും അദ്ദേഹം കൂട്ടിച്ചേർത്തു. ഇന്ത്യയെ ഒരു ‘മിഡിൽ പവർ’ (Middle Power) എന്ന് വിശേഷിപ്പിക്കുന്നതിനോട് തനിക്കുള്ള വിയോജിപ്പും മന്ത്രി വേദിയിൽ തുറന്നുപറഞ്ഞു.
