കൊക്രൊച്ച് ജനതാ പാർട്ടി (സി.ജെ.പി) നേതാക്കളായ സൗരവ് ദാസിനെയും അശുതോഷ് റാങ്കയെയും അറസ്റ്റ് ചെയ്ത് അഞ്ച് ദിവസത്തേക്ക് തിഹാർ ജയിലിലടച്ച കേന്ദ്ര സർക്കാർ നടപടിയെ രൂക്ഷമായി വിമർശിച്ച് ലോക്‌സഭാ പ്രതിപക്ഷ നേതാവ് രാഹുൽ ഗാന്ധി. പ്രതിഷേധത്തിൽ പങ്കെടുത്ത യുവാക്കളെ ജയിലിലടയ്ക്കുന്നത് സർക്കാറിന്റെ ഭീരുത്വമാണെന്നും സമാധാനപരമായി പ്രതിഷേധിക്കാനുള്ള പൗരന്മാരുടെ ഭരണഘടനാപരമായ അവകാശത്തെ നിഷേധിക്കുകയാണെന്നും രാഹുൽഗാന്ധി സൂചിപ്പിച്ചു. ജന്തർമന്തർ പ്രക്ഷോഭങ്ങൾക്ക് നിരോധനം ഏർപ്പെടുത്തിയ അധികൃതരുടെ നടപടിയെയും സി.ജെ.പി പ്രവർത്തകരുടെ നിയമവിരുദ്ധ പ്രകടനങ്ങളെയും പിന്തുണയ്ക്കുന്നതായിരുന്നു രാഹുൽ ഗാന്ധിയുടെ പരാമർശങ്ങൾ.
ആദ്യമായാണ് രാഹുൽ ഗാന്ധി സി.ജെ.പി നേതാക്കൾക്ക് പരസ്യ പിന്തുണ പ്രഖ്യാപിക്കുന്നത്. ജന്തർ മന്തർ ഇന്ത്യയിലെ സാധാരണ ജനങ്ങളുടേതാണെന്നും അത് ജനങ്ങൾ വീണ്ടെടുക്കുമെന്നും രാഹുൽ സൂചിപ്പിച്ചു. രാഹുൽ ഗാന്ധിയെ കൂടാതെ ആം ആദ്മി പാർട്ടി തലവൻ അരവിന്ദ് കേജ്‌രിവാൾ, തൃണമൂൽ കോൺഗ്രസ് നേതാവ് അഭിഷേക് ബാനർജി, ഡി.എം.കെ അധ്യക്ഷൻ എം.കെ. സ്റ്റാലിൻ തുടങ്ങിയ പ്രമുഖ നേതാക്കളും സിജെപി നേതാക്കൾക്കെതിരായ നടപടിക്കെതിരെ രംഗത്തെത്തിയിട്ടുണ്ട്.
വിവാദപരമായ ഇലക്ടറൽ റോൾ പരിഷ്കരണങ്ങൾക്കെതിരെയും മുഖ്യ തിരഞ്ഞെടുപ്പ് കമ്മീഷണറുടെ രാജി ആവശ്യപ്പെട്ടുമാണ് സി.ജെ.പി നേതാക്കൾ ജന്തർ മന്തറിലേക്ക് മാർച്ച് നടത്തിയത്. എന്നാൽ അടുത്തിടെ ജന്തർ മന്തറിനെ പ്രതിഷേധ സ്ഥലങ്ങളുടെ പട്ടികയിൽ നിന്ന് നീക്കം ചെയ്തത ചൂണ്ടിക്കാട്ടി ദില്ലി പോലീസ് ഇവരെ വഴിയിൽ തടയുകയും അതിക്രമിച്ചു കയറിയെന്ന കുറ്റം ചുമത്തി അറസ്റ്റ് ചെയ്യുകയുമായിരുന്നു. കോടതിയിൽ ഹാജരാക്കിയ സൗരവ് ദാസിനെയും അശുതോഷ് റാങ്കയെയും അഞ്ച് ദിവസത്തെ ജുഡീഷ്യൽ കസ്റ്റഡിയിൽ വിട്ടു.
