ഇന്ത്യ-വെസ്റ്റ് ഇൻഡീസ് അഞ്ചാം ടി20 മത്സരത്തിന് പിന്നാലെ യുവ ഓപ്പണർ അഭിഷേക് ശർമ്മയുടെ പ്രകടനത്തെക്കുറിച്ചുള്ള നിരീക്ഷണങ്ങളുമായി മുൻ ഇന്ത്യൻ താരവും കമന്റേറ്ററുമായ ആകാശ് ചോപ്ര. തന്റെ പ്രകടനനിലവാരം വെച്ചുനോക്കുമ്പോൾ അഭിഷേകിന് ഇതൊരു സാധാരണ പരമ്പര മാത്രമായിരുന്നുവെന്ന് ആകാശ് ചോപ്ര വിലയിരുത്തി. എന്നാൽ അതിവേഗത്തിലും അതിതീവ്രമായ ആക്രമണ ശൈലിയിലും ബാറ്റ് ചെയ്യുന്ന ഒരു താരത്തിന് പ്രകടനത്തിൽ കയറ്റിറക്കങ്ങൾ ഉണ്ടാകുന്നത് സ്വാഭാവികമാണെന്നും അത് പൂർണ്ണമായും അംഗീകരിക്കാവുന്നതാണെന്നും അദ്ദേഹം വ്യക്തമാക്കി. സമാപിച്ച പരമ്പരയിൽ അഞ്ച് ഇന്നിങ്സുകളിൽ നിന്നായി 181.25 സ്ട്രൈക്ക് റേറ്റിൽ 145 റൺസാണ് അഭിഷേക് നേടിയത്.
ഇൻഡോറിൽ നടന്ന മത്സരത്തിൽ 69 റൺസ് നേടി മികച്ച പ്രകടനം പുറത്തെടുത്തെങ്കിലും ആദ്യ രണ്ട് മത്സരങ്ങളിലും സമാനമായ രീതിയിലാണ് താരം പുറത്തായതെന്ന് ആകാശ് ചോപ്ര ചൂണ്ടിക്കാട്ടി. 200 സ്ട്രൈക്ക് റേറ്റിൽ റണ്ണടിച്ചുകൂട്ടാൻ ശ്രമിക്കുന്ന ഒരു ബാറ്റർ ചിലപ്പോഴൊക്കെ പരാജയപ്പെടുന്നത് സ്വാഭാവിക കാര്യമാണെന്നും സ്റ്റാർ സ്പോർട്സിലെ ചർച്ചയ്ക്കിടെ അദ്ദേഹം പറഞ്ഞു. ശനിയാഴ്ച ബെംഗളൂരുവിൽ മഴ കാരണം ഉപേക്ഷിച്ച അഞ്ചാം ടി20യിൽ നാല് പന്തിൽ നിന്ന് ആറ് റൺസെടുത്ത് നിൽക്കവെയാണ് അഭിഷേക് പുറത്തായത്.
അതേസമയം, ഓഫ് സ്പിന്നർമാർക്കെതിരെ അഭിഷേക് ശർമ്മയ്ക്ക് സാങ്കേതികമായി എന്തെങ്കിലും പോരായ്മകളുണ്ടോ എന്ന ചോദ്യത്തിന് അതിരൂക്ഷമായി മറുപടി നൽകിക്കൊണ്ട് ഇന്ത്യൻ ലെഗ് സ്പിന്നർ യുസ്വേന്ദ്ര ചാഹലും രംഗത്തെത്തി. സാങ്കേതികപരമായ പ്രശ്നങ്ങൾ ഉണ്ടായിരുന്നെങ്കിൽ അഭിഷേകിന് 2000-ത്തിലധികം റൺസ് നേടാൻ സാധിക്കില്ലായിരുന്നുവെന്ന് ചാഹൽ വ്യക്തമാക്കി. എല്ലാ വീഡിയോകളും ലഭ്യമായ ഇക്കാലത്ത് സാങ്കേതിക പോരായ്മകൾ പെട്ടെന്ന് തിരിച്ചറിയാൻ സാധിക്കും. അമിത ആക്രമണകാരിയായ ബാറ്റിംഗ് ശൈലി കാരണം ചിലപ്പോൾ വിക്കറ്റ് നഷ്ടമാകുന്നു എന്നല്ലാതെ സ്പിൻ ബൗളിംഗിനെ നേരിടുന്നതിൽ താരത്തിന് യാതൊരുവിധ സാങ്കേതിക പ്രശ്നങ്ങളുമില്ലെന്ന് ചാഹൽ കൂട്ടിചേർത്തു.
