ബസ്തി (ഉത്തർപ്രദേശ്): രാജ്യത്ത് ഏകീകൃത സിവിൽ കോഡ് (യു.സി.സി) ഉടൻ നടപ്പാക്കണമെന്ന ശക്തമായ ആവശ്യവുമായി അസം മുഖ്യമന്ത്രി ഹിമന്ത ബിശ്വ ശർമ്മ വീണ്ടും രംഗത്ത്. ബഹുഭാര്യത്വം പോലുള്ള സാമൂഹിക പ്രശ്നങ്ങൾ പരിഹരിക്കാൻ പൊതുനിയമം അനിവാര്യമാണെന്നും, യു.സി.സി ഇല്ലാത്തതിനാൽ ഏറ്റവും കൂടുതൽ ദുരിതങ്ങളും ചൂഷണങ്ങളും അനുഭവിക്കുന്നത് മുസ്ലിം സ്ത്രീകളാണെന്നും അദ്ദേഹം വ്യക്തമാക്കി. ഉത്തർപ്രദേശിലെ ബസ്തി ജില്ലയിൽ മാധ്യമപ്രവർത്തകരോട് സംസാരിക്കവെയാണ് അദ്ദേഹത്തിന്റെ പരാമർശം.
അസമിൽ ഇതിനകം തന്നെ ഇതുമായി ബന്ധപ്പെട്ട നടപടികൾ ആരംഭിച്ചിട്ടുണ്ടെന്നും, ഈ നിയമം രാജ്യവ്യാപകമായി നടപ്പാക്കണമെന്നാണ് തങ്ങളുടെ ആവശ്യമെന്നും അദ്ദേഹം ആവർത്തിച്ചു. ബി.ജെ.പി ദേശീയ ജനറൽ സെക്രട്ടറി ഹരീഷ് ദ്വിവേദിയുടെ തെലിയജോത് ഗ്രാമത്തിലെ വസതി സന്ദർശിക്കാനും, അടുത്തിടെ അന്തരിച്ച അദ്ദേഹത്തിന്റെ മാതാവിന് ആദരാഞ്ജലി അർപ്പിക്കാനുമാണ് അസം മുഖ്യമന്ത്രി ബസ്തിയിൽ എത്തിയത്. അയോധ്യയിൽ നിന്ന് റോഡ് മാർഗമാണ് അദ്ദേഹം ഹരീഷ് ദ്വിവേദിയുടെ വീട്ടിലെത്തിയത്.
സർക്കാരിനെതിരെ കോൺഗ്രസും മറ്റ് പ്രതിപക്ഷ പാർട്ടികളും നടത്തുന്ന പ്രതിഷേധങ്ങളെയും ഭരണമാറ്റത്തിനുള്ള ആഹ്വാനങ്ങളെയും ഹിമന്ത ബിശ്വ ശർമ്മ രൂക്ഷമായി വിമർശിച്ചു. ബലപ്രയോഗത്തിലൂടെയല്ല, മറിച്ച് ജനവിധിയിലൂടെയാണ് അധികാരം പിടിച്ചെടുക്കേണ്ടതെന്ന് അദ്ദേഹം ഓർമ്മിപ്പിച്ചു. ഭീഷണിപ്പെടുത്തിയും സമർദ്ദം ചെലുത്തിയും സർക്കാർ മാറ്റാമെന്ന് കരുതുന്നവർ ബംഗ്ലാദേശിലെയും നേപ്പാളിലെയും നിലവിലെ രാഷ്ട്രീയ സാഹചര്യങ്ങൾ കണ്ടു പഠിക്കണമെന്നും അദ്ദേഹം മുന്നറിയിപ്പ് നൽകി. ഡൽഹിയിൽ നടന്ന പ്രതിഷേധങ്ങളിൽ ചുരുക്കം ചിലർ മാത്രമാണ് പങ്കെടുത്തതെന്നും അദ്ദേഹം പരിഹസിച്ചു.
ഇതിനിടെ, കൊൽക്കത്തയിലെ ദുർഗാ പൂജ പന്തലിലുണ്ടായ തിക്കിലും തിരക്കിലും പെട്ട് ആളുകൾ മരിച്ച സംഭവത്തിലും അദ്ദേഹം അനുശോചനം രേഖപ്പെടുത്തി. സംഭവത്തിൽ സർക്കാർ ഉടൻ തന്നെ ഇടപെടൽ നടത്തിയിട്ടുണ്ടെന്നും പരിക്കേറ്റവർക്ക് ആവശ്യമായ ചികിത്സ ലഭ്യമാക്കിയിട്ടുണ്ടെന്നും അദ്ദേഹം കൂട്ടിച്ചേർത്തു. വരുംദിവസങ്ങളിലും യു.സി.സി വിഷയത്തിൽ ദേശീയതലത്തിൽ ചർച്ചകൾ ശക്തമാക്കാനാണ് ബി.ജെ.പിയുടെ നീക്കം.
