തലസ്ഥാനവാസികൾക്കും യാത്രാപ്രേമികൾക്കും ഇനി പശ്ചിമഘട്ടത്തിന്റെ പ്രകൃതിസൗന്ദര്യവും ആകാശദൃശ്യങ്ങളും ആസ്വദിച്ച് ആഡംബര പൂർണ്ണമായ ഒരു റെയിൽവേ യാത്ര നടത്താം. കേരളത്തിലൂടെ സർവീസ് നടത്തുന്ന ട്രെയിനിൽ ആദ്യമായി വിസ്റ്റാഡോം (Vistadome) കോച്ച് എത്തുന്നു. ദക്ഷിണ റെയിൽവേയുടെ ഈ സ്വപ്ന പദ്ധതിക്ക് മധുര – ഗുരുവായൂർ എക്സ്പ്രസിലൂടെയാണ് (Train No. 16327/16328) തുടക്കമാകുന്നത്. ഒക്ടോബർ 22-ന് മധുരയിൽ നിന്നും വ്യാഴാഴ്ച സർവീസ് ആരംഭിക്കുന്ന വിസ്റ്റാഡോം കോച്ച് ഉൾപ്പെടുത്തിയ ട്രെയിൻ പുലർച്ചെ 2.50-ഓടെ ഗുരുവായൂരിലെത്തും. തുടർന്ന് രാവിലെ 5.50-ന് ഗുരുവായൂരിൽ നിന്ന് പുറപ്പെട്ട് രാത്രി 7.10-ന് മധുരയിൽ തിരിച്ചെത്തുന്ന രീതിയിലാണ് സമയം ക്രമീകരിച്ചിരിക്കുന്നത്.
വലിയ ഗ്ലാസ് ജനാലകളും സുതാര്യമായ മേൽക്കൂരയും ചുറ്റുമുള്ള കാഴ്ചകൾ 180 ഡിഗ്രി തിരിഞ്ഞ് കാണാൻ കഴിയുന്ന ആഡംബര എക്സിക്യൂട്ടീവ് ചാരിയിരിക്കുന്ന സീറ്റുകളുമാണ് ഈ കോച്ചിന്റെ പ്രധാന ആകർഷണം. ട്രെയിനിന്റെ ഏറ്റവും പിന്നിലായി ഒരുക്കിയിരിക്കുന്ന ഒബ്സർവേഷൻ ഡെക്കിൽ നിന്ന് യാത്രക്കാർക്ക് തടസ്സങ്ങളില്ലാതെ പശ്ചിമഘട്ട മലനിരകളുടെയും തുരങ്കങ്ങളുടെയും പാലങ്ങളുടെയും ദൃശ്യങ്ങൾ ക്യാമറയിൽ പകർത്താനുമാകും. കൊല്ലം – പുനലൂർ – ചെങ്കോട്ട എന്നീ മനോഹരമായ മലയോര പാതയിലൂടെ കടന്നുപോകുന്നതിനാൽ യാത്രക്കാർക്ക് വേറിട്ടൊരു യാത്രാനുഭവമായിരിക്കും ഇത് സമ്മാനിക്കുക.
തുടക്കത്തിൽ ഒക്ടോബർ 22 മുതൽ 2027 ജനുവരി 16 വരെയുള്ള നിശ്ചിത ദിവസങ്ങളിലാണ് വിസ്റ്റാഡോം സർവീസ് അനുവദിച്ചിരിക്കുന്നത്. മധുരയിൽ നിന്നും വ്യാഴം, വെള്ളി, ശനി, ഞായർ ദിവസങ്ങളിലും ഗുരുവായൂരിൽ നിന്നും വെള്ളി, ശനി, ഞായർ, തിങ്കൾ ദിവസങ്ങളിലുമാണ് സർവീസ് നടത്തുക. വാർത്ത പുറത്തുവന്നതിന് പിന്നാലെ വൻ സ്വീകരണമാണ് യാത്രികരിൽ നിന്ന് ലഭിച്ചിരിക്കുന്നത്. ആരംഭിച്ച് ആദ്യ വാരങ്ങളിലെ ടിക്കറ്റുകൾ മിനിറ്റുകൾക്കകം വിറ്റുതീർന്ന് ഹൗസ്ഫുളായിക്കഴിഞ്ഞു.
ഐആർസിടിസി (IRCTC) വെബ്‌സൈറ്റിലൂടെയും ആപ്പിലൂടെയും ‘EV’ (Executive Vistadome) ക്ലാസ് തിരഞ്ഞെടുത്തുകൊണ്ട് യാത്രക്കാർക്ക് ബുക്കിങ് നടത്താം. ഗുരുവായൂർ മുതൽ മധുര വരെയുള്ള യാത്രയ്ക്ക് ഏകദേശം 1875 രൂപയാണ് ടിക്കറ്റ് നിരക്ക്. വിനോദസഞ്ചാരികളെയും കുടുംബങ്ങളെയും ഒരുപോലെ ആകർഷിക്കുന്ന ഈ ആഡംബര യാത്ര കേരളത്തിന്റെ ടൂറിസം മേഖലയ്ക്ക് വലിയ ഉണർവ്വേകുമെന്നാണ് പ്രതീക്ഷിക്കുന്നത്.
