ന്യൂസിലൻഡിനെതിരെയുള്ള അഞ്ച് മത്സരങ്ങളുള്ള ടി20 പരമ്പരയിലെ ആദ്യ മത്സരത്തിൽ തകർപ്പൻ ബാറ്റിംഗുമായി മലയാളി താരം സഞ്ജു സാംസൺ. ആദ്യം ബാറ്റ് ചെയ്ത കിവീസ് ഉയർത്തിയ 226 റൺസെന്ന കൂറ്റൻ ലക്ഷ്യം പിന്തുടർന്നിറങ്ങിയ ഇന്ത്യക്കായി ഓപ്പണറായെത്തിയ സഞ്ജു മികച്ച തുടക്കമാണ് സമ്മാനിച്ചത്.
ലോക്കി ഫെർഗൂസൺ എറിഞ്ഞ മൂന്നാം ഓവറിൽ തുടർച്ചയായ ബൗണ്ടറികളും സിക്സറുമായി സഞ്ജു കളം നിറഞ്ഞപ്പോൾ ആ ഓവറിൽ മാത്രം ഇന്ത്യക്ക് ലഭിച്ചത് 22 റൺസാണ്. പവർപ്ലേയിൽ കിവീസ് ബൗളർമാരെ കടന്നാക്രമിച്ച താരം വെടിക്കെട്ട് പ്രകടനത്തിലൂടെ ആരാധകരെ വിസ്മയിപ്പിച്ചു. ഇതിൽ ഏറ്റവും രസകരമായ കാര്യം, ഇന്ത്യൻ മണ്ണിലെ പോലെ അല്ല വിദേശത്ത് നല്ല പേസ് അറ്റാക്കിന് മുന്നിൽ ഇന്ത്യൻ ബാറ്റർമാർ തീരും എന്നൊക്കെ പറഞ്ഞ ഫെർഗുസണെ സഞ്ജു അടിച്ച രീതി കൈയടികൾ അർഹിക്കുന്നു. വിമർശകരെ ബാറ്റുകൊണ്ട് നേരിടുന്ന ടിപ്പിക്കൽ ശൈലിയാണ് സഞ്ജുവിന്റെ എന്നതിന് ഏറ്റവും വലിയ തെളിവ്
ന്യൂസിലൻഡ് ബൗളർമാരെ നാണംകെടുത്തുന്ന ബാറ്റിംഗ് പ്രകടനമാണ് പുറത്തെടുത്തത്. വെറും 33 പന്തുകളിൽ നിന്ന് 8 ഫോറുകളും 4 സിക്സറുകളും അടക്കം 203.03 സ്‌ട്രൈക്ക് റേറ്റിൽ 67 റൺസാണ് സഞ്ജു അടിച്ചുകൂട്ടിയത്.
പവർപ്ലേയിൽ ന്യൂസിലൻഡ് പേസർമാരായ മാറ്റ് ഹെൻറി, ആദം മിൽനെ, ലോക്കി ഫെർഗൂസൺ എന്നിവരെ നാനാഭാഗത്തേക്കും പറത്തിയ സഞ്ജു, വെറും 23 പന്തിലാണ് തന്റെ അർദ്ധസെഞ്ചുറി പൂർത്തിയാക്കിയത്. മറ്റൊരു ഓപ്പണറായ അഭിഷേക് ശർമ്മയ്ക്കൊപ്പം (12 പന്തിൽ 29) ചേർന്ന് ആദ്യ വിക്കറ്റിൽ വെറും 35 പന്തിൽ 93 റൺസിന്റെ വലിയ കൂട്ടുകെട്ടാണ് സഞ്ജു പടുത്തുയർത്തിയത്. പവർപ്ലേയിലെ ആദ്യ 6 ഓവറിൽ തന്നെ 94 റൺസ് വാരിക്കൂട്ടാൻ ഇന്ത്യക്ക് സാധിച്ചു. ഒടുവിൽ മിച്ചൽ സാന്റ്നറുടെ പന്തിൽ ബൗൾഡായാണ് സഞ്ജു പുറത്തായതെങ്കിലും, ഇന്ത്യയെ ശക്തമായ അടിത്തറയിൽ എത്തിച്ച ശേഷമാണ് താരം മടങ്ങിയത്.
