ആർഎസ്എസ് അഫിലിയേഷനുള്ള പ്രമുഖ തൊഴിലാളി സംഘടനയായ ഭാരതീയ മസ്ദൂർ സംഘ് (ബിഎംഎസ്) കശ്മീർ താഴ്‌വരയിലെ തങ്ങളുടെ ആദ്യത്തെ ഔദ്യോഗിക ഓഫീസ് ദക്ഷിണ കശ്മീരിലെ പുൽവാമ ജില്ലയിലെ ബർസൂവിൽ തുറന്നു. കശ്മീർ താഴ്‌വരയിൽ ആർഎസ്എസ് ആശയധാരയിലുള്ള ഒരു സംഘടന സ്ഥിരം ഓഫീസ് സജ്ജീകരിച്ച് പ്രവർത്തിക്കുന്നത് ഇതാദ്യമായാണ്. ഇതിനുമുമ്പ് ശ്രീനഗറിലെ ശിവ്പോറയിൽ ഒരു ചെറിയ വാടകക്കെട്ടിടത്തിലായിരുന്നു സംഘടന താത്കാലികമായി പ്രവർത്തിച്ചിരുന്നത്. മേഖലയിൽ ഇരുപതോളം തൊഴിലാളി യൂണിയനുകളും ഇരുപതിനായിരത്തോളം അംഗങ്ങളും നിലവിൽ ബിഎംഎസിന് ഒപ്പമുണ്ടെന്ന് ഭാരവാഹികൾ വ്യക്തമാക്കി.
കശ്മീരിലെ കർഷകർക്കും വിവിധ മേഖലകളിലെ തൊഴിലാളികൾക്കും അവകാശങ്ങളും കൃത്യമായ വേതനവും ഉറപ്പാക്കുക എന്നതാണ് പുതിയ ഓഫീസിലൂടെ ബിഎംഎസ് പ്രധാനമായും ലക്ഷ്യമിടുന്നത്. തൊഴിലാളികളുടെ നിയമപരമായ ആനുകൂല്യങ്ങളും അന്തസ്സും സംരക്ഷിക്കുന്നതോടൊപ്പം രാജ്യത്തിന്റെ വികസനത്തിന് അവരുടെ പങ്കാളിത്തം ഉറപ്പാക്കുകയാണ് സംഘടനയുടെ പ്രഥമ ലക്ഷ്യം. പുൽവാമ കേന്ദ്രീകരിച്ച് പ്രവർത്തിക്കുന്നതിലൂടെ ദക്ഷിണ കശ്മീരിലെയും വടക്കൻ കശ്മീരിലെയും സാധാരണക്കാരായ തൊഴിലാളികൾക്ക് ബിഎംഎസിന്റെ സേവനങ്ങൾ കൂടുതൽ എളുപ്പത്തിൽ ലഭ്യമാക്കാൻ സാധിക്കും.
രാഷ്ട്രീയ വ്യത്യാസം ഇല്ലാതെ തൊഴിലാളി ക്ഷേമത്തിന് മാത്രമാണ് മുൻഗണന നൽകുന്നതെന്നും ബിഎംഎസ് കശ്മീർ വിഭാഗം ഇൻ-ചാർജ് സമീർ കുച്ചെ പറഞ്ഞു. ആർട്ടിക്കിൾ 370 റദ്ദാക്കിയതിനുശേഷം കശ്മീരിലെ സ്ഥിതിഗതികളിൽ വലിയ മാറ്റം വന്നിട്ടുണ്ടെന്നും യുവജനങ്ങൾ കല്ലേറും അക്രമങ്ങളും ഉപേക്ഷിച്ച് വിദ്യാഭ്യാസത്തിലേക്കും തൊഴിലിലേക്കും ശ്രദ്ധ തിരിക്കുകയാണെന്നും അദ്ദേഹം ചൂണ്ടിക്കാട്ടി. മതപരമായോ രാഷ്ട്രീയപരമായോ ഉള്ള ഭിന്നതകൾക്കതീതമായി തൊഴിലാളികളുടെ അവകാശ സംരക്ഷണത്തിനായി ഏതൊരു സർക്കാരിനോടും പോരാടാൻ തയ്യാറാണെന്ന് ഭാരവാഹികൾ വ്യക്തമാക്കി.
