മുംബൈയിലെ ജീവിതം തന്നെ അത്ഭുതപ്പെടുത്തിയ വിശേഷങ്ങൾ പങ്കുവെച്ച് ഫിൻലാൻഡിൽ നിന്നുള്ള ഒരു കുടുംബം സോഷ്യൽ മീഡിയയിൽ പങ്കുവെച്ച അനുഭവങ്ങൾ വൈറലാകുന്നു. രാജ്യത്തിന്റെ സാമ്പത്തിക തലസ്ഥാനമായ മുംബൈയിലെത്തിയ ഫിൻലാൻഡിൽ നിന്നുള്ള കുടുംബമാണ് തങ്ങളെ വിസ്മയിപ്പിച്ച പത്ത് കാര്യങ്ങൾ ഇൻസ്റ്റാഗ്രാമിലൂടെ ലോകത്തോട് പങ്കുവെച്ചത്. പത്ത് മിനിറ്റിൽ ലഭിക്കുന്ന ഡെലിവറി സേവനങ്ങൾ, യു.പി.ഐ (UPI) പെയ്‌മെന്റുകൾ, മികച്ച തിയറ്ററുകൾ, ദൈനംദിന സേവനങ്ങൾ തുടങ്ങി ഇന്ത്യ തങ്ങളെ നിരന്തരം അത്ഭുതപ്പെടുത്തിക്കൊണ്ടിരിക്കുകയാണെന്ന് ഇവരുടെ വീഡിയോയുടെ അടിക്കുറിപ്പിൽ പറയുന്നു. ഇന്ത്യയിലെ പല കാര്യങ്ങളും അത്രയധികം ആകർഷകമാണെന്നും ഇതിൽ നിന്ന് ലോകം പലതും പഠിക്കാനുണ്ടെന്നും കുടുംബം അഭിപ്രായപ്പെടുന്നു.
ഈ പട്ടികയിലെ ഒന്നാം സ്ഥാനത്ത് ഇന്ത്യയുടെ യുണൈറ്റഡ് പേയ്‌മെന്റ് ഇന്റർഫേസ് (UPI) ആണ്. ക്യു.ആർ കോഡ് ഉപയോഗിച്ചുള്ള തടസ്സമില്ലാത്തതും വേഗതയേറിയതുമായ ഡിജിറ്റൽ പെയ്‌മെന്റ് സംവിധാനമാണ് ഇവരെ ആദ്യം തന്നെ ഞെട്ടിച്ചത്. വീട്ടുപകരണങ്ങളും പലവ്യഞ്ജനങ്ങളും മിനിറ്റുകൾക്കകം വീട്ടുപടിക്കൽ എത്തിക്കുന്ന അതിവേഗ ഡെലിവറി സംവിധാനത്തെയും അവർ അഭിനന്ദിച്ചു. ഭക്ഷണം മുതൽ ടാക്സി വരെയുള്ള കാര്യങ്ങൾ മൊബൈൽ ഫോണിലൂടെ എളുപ്പത്തിൽ ചെയ്യാൻ കഴിയുന്ന ഡിജിറ്റൽ ഇന്ത്യയുടെ കുതിപ്പും ഇവർ എടുത്തുപറഞ്ഞു. ആരോഗ്യമേഖലയ്ക്ക് പുറമെ ആപ്പുകൾ വഴി എളുപ്പത്തിൽ ആംബുലൻസ് വിളിക്കാനുള്ള സൗകര്യവും ഇവർ പ്രശംസിച്ചു.
സ്വകാര്യ ആരോഗ്യരംഗത്തെ സൗകര്യങ്ങളും എളുപ്പത്തിലുള്ള ബുക്കിംഗും തന്നെ മാത്രമല്ല, ഇന്ത്യയിലെത്തുന്ന മിക്ക വിദേശികളെയും അത്ഭുതപ്പെടുത്തുന്നുണ്ടെന്ന് അവർ വ്യക്തമാക്കി. ചെറിയ തെരുവ് കടകൾ മുതൽ വലിയ മാളുകൾ വരെയുള്ള വൈവിധ്യമാർന്ന ഷോപ്പിംഗ് സൗകര്യങ്ങളും നഗരത്തിലുണ്ട്. വീടുകളിലെ ശുചീകരണ ജോലികൾ, അറ്റകുറ്റപ്പണികൾ എന്നിവയെല്ലാം ഒരൊറ്റ ആപ്പിലൂടെ എളുപ്പത്തിൽ പരിഹരിക്കാൻ കഴിയുന്ന ഹോം സർവീസുകളെയും അവർ പ്രശംസിച്ചു. മുംബൈ മെട്രോയുടെ ആധുനികവും ചെലവുകുറഞ്ഞതുമായ ശൃംഖല തങ്ങളുടെ കാഴ്ചപ്പാടുകളെ പൂർണ്ണമായി മാറ്റിയെന്നും അതിന്റെ വൃത്തിയും കാര്യക്ഷമതയും തന്നെ അത്ഭുതപ്പെടുത്തിയെന്നും അവർ പറഞ്ഞു.
വിശപ്പറിയുമ്പോൾ ഏതാനും ടാപ്പുകളിലൂടെ തടസ്സങ്ങളൊന്നുമില്ലാതെ ഭക്ഷണം വീട്ടുപടിക്കൽ എത്തുന്ന ഫുഡ് ഡെലിവറി സംവിധാനത്തെയും അവർ അഭിനന്ദിച്ചു. ഒടുവിൽ മനോഹരമായ സ്ക്രീനുകളും മികച്ച ശബ്ദസംവിധാനങ്ങളും സ്ലൈഡുകളുമുള്ള സിനിമ തിയറ്ററുകളെക്കുറിച്ചും പറഞ്ഞാണ് അവർ പട്ടിക അവസാനിപ്പിച്ചത്. ഏകദേശം നാല് ദശലക്ഷത്തിലധികം ആളുകൾ കണ്ട ഈ വീഡിയോയ്ക്ക് താഴെ നിരവധിപ്പേരാണ് അനുകൂലമായ കമന്റുകളുമായി എത്തിയത്. പാശ്ചാത്യ മാധ്യമങ്ങൾ ഇന്നും ഇന്ത്യയെ മൂന്നാം ലോക രാജ്യമായി ചിത്രീകരിക്കുമ്പോൾ യാഥാർത്ഥ്യം തുറന്നുകാട്ടിയതിന് നന്ദി എന്നാണ് പല സോഷ്യൽ മീഡിയ ഉപയോക്താക്കളും കമന്റ് ചെയ്തത്. നെഗറ്റീവുകൾ മാത്രം കാണാതെ ഇന്ത്യയുടെ നല്ല വശങ്ങൾ പങ്കുവെച്ചതിന് ഫിൻലാൻഡ് കുടുംബത്തിന് നന്ദി അറിയിച്ചും നിരവധിപ്പേർ രംഗത്തെത്തിയിട്ടുണ്ട്.
