ശക്തവും പ്രാപ്തിയുള്ളതുമായ ഭാരതം കെട്ടിപ്പടുക്കാൻ യുവജനങ്ങളുടെ പങ്കാളിത്തം അത്യാവശ്യമാണെന്ന് പ്രധാനമന്ത്രി നരേന്ദ്ര മോദി. ചിന്മയ മിഷന്റെ 75-ാം വാർഷികാഘോഷങ്ങളുടെ ഭാഗമായി സംഘടിപ്പിച്ച ‘ചിന്മയ അമൃത മഹോത്സവം’ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. സ്വാമി ചിന്മയാനന്ദന്റെ ദർശനങ്ങൾ രാജ്യത്തിന്റെ വികസനത്തിന് വലിയ ഊർജ്ജമാണ് നൽകുന്നതെന്ന് പ്രധാനമന്ത്രി വ്യക്തമാക്കി. ഭാരതീയ സംസ്കാരവും വേദാന്ത ആശയങ്ങളും ലോകമെമ്പാടും പ്രചരിപ്പിക്കുന്നതിൽ ചിന്മയ മിഷൻ നൽകിയ സംഭാവനകളെ അദ്ദേഹം പ്രശംസിച്ചു.
സ്വാമി ചിന്മയാനന്ദയുമായി മുൻപ് നടത്തിയ കൂടിക്കാഴ്ചകളെക്കുറിച്ചുള്ള ഓർമ്മകൾ പ്രധാനമന്ത്രി ചടങ്ങിൽ പങ്കുവെച്ചു. യുവജനങ്ങളുടെ ശാക്തീകരണത്തിലൂന്നിയ പ്രവർത്തനങ്ങളാണ് രാജ്യത്തിന്റെ പുരോഗതിക്ക് വേഗത കൂട്ടുന്നതെന്ന് അദ്ദേഹം ഓർമ്മിപ്പിച്ചു. ഇതിന്റെ ഭാഗമായി ഭഗവദ്ഗീതയുടെ സന്ദേശങ്ങൾ ജനങ്ങളിലേക്ക് എത്തിക്കാൻ ചിന്മയ യുവകേന്ദ്ര നടത്തുന്ന പ്രവർത്തനങ്ങൾ സ്വാഗതാർഹമാണ്. രാജ്യത്തുടനീളം കിലോമീറ്ററുകളോളം യാത്ര ചെയ്ത് യുവാക്കൾ നടത്തുന്ന പ്രചാരണങ്ങൾ സാംസ്കാരിക ബോധവൽക്കരണത്തിന് വലിയ പങ്കുവഹിക്കുന്നുണ്ടെന്ന് അദ്ദേഹം കൂട്ടിച്ചേർത്തു.
ലോകത്തിന് മാർഗ്ഗദർശനം നൽകാൻ ഭാരതത്തിന് സാധിക്കുമെന്ന സ്വാമി ചിന്മയാനന്ദന്റെ ചിന്തകൾ ഇന്നും പ്രസക്തമാണെന്ന് നരേന്ദ്ര മോദി ചൂണ്ടിക്കാട്ടി. രാജ്യത്തെ ഓരോ പൗരനും സ്വയം സമർപ്പണത്തോടെ പ്രവർത്തിച്ചാൽ ഭാരതത്തെ കൂടുതൽ ഉയരങ്ങളിലേക്ക് നയിക്കാൻ കഴിയും. സാംസ്കാരിക പാരമ്പര്യവും ആധുനിക സാങ്കേതികവിദ്യയും ഒരുമിച്ച് കൊണ്ടുപോകാൻ ഇന്നത്തെ തലമുറ തയ്യാറാകണം. ആത്മീയതയും രാജ്യസേവനവും കൂട്ടിയിണക്കിയുള്ള പ്രവർത്തനങ്ങളിലൂടെ മാത്രമേ രാജ്യത്തിന്റെ ഭാവി സുരക്ഷിതമാക്കാൻ സാധിക്കൂ എന്ന് ഓർമ്മിപ്പിച്ചുകൊണ്ടാണ് പ്രധാനമന്ത്രി തന്റെ പ്രസംഗം അവസാനിപ്പിച്ചത്.
