പഞ്ചാബ് നിയമസഭാ തിരഞ്ഞെടുപ്പ് അടുത്തിരിക്കെ ഭരണകക്ഷിയായ ആം ആദ്മി പാർട്ടിക്ക് (AAP) കനത്ത പ്രഹരമേൽപ്പിച്ച് രണ്ട് നിലവിലെ എം.എൽ.എമാർ ഉൾപ്പെടെ മൂന്ന് മുതിർന്ന നേതാക്കൾ രാജിവെച്ച് ഭാരതീയ ജനതാ പാർട്ടിയിൽ (BJP) ചേർന്നു. സാംന എം.എൽ.എ ചേതൻ സിംഗ് ജൗരമജ്‌റ, സനൂർ എം.എൽ.എ ഹർമീത് സിംഗ് പഠാൻമജ്‌റ, അമൃത്സർ നോർത്ത് എം.എൽ.എയും മുൻ ഐ.പി.എസ് ഉദ്യോഗസ്ഥനുമായ കൻവർ വിജയ് പ്രതാപ് സിംഗ് എന്നിവരാണ് എ.എ.പി ബന്ധം ഉപേക്ഷിച്ച് ബി.ജെ.പിയിൽ ചേർന്നത്. ഡൽഹിയിലെ ബി.ജെ.പി ദേശീയ ആസ്ഥാനത്ത് നടന്ന ചടങ്ങിൽ പഞ്ചാബ് ബി.ജെ.പി പ്രഭാരി സതീഷ് പൂനിയ, സംസ്ഥാന അധ്യക്ഷൻ കേവൽ സിംഗ് ധില്ലൻ എന്നിവരിൽ നിന്നാണ് ഇവർ അംഗത്വം സ്വീകരിച്ചത്.
ഭഗവന്ത് മാൻ സർക്കാരിനെതിരെ രൂക്ഷവിമർശനമുന്നയിച്ചാണ് നേതാക്കളുടെ ഈ നീക്കം. പഞ്ചാബിൽ ക്രമസമാധാന നില പൂർണ്ണമായും തകർന്നെന്നും ലഹരിമാഫിയയും ഗാങ്‌സ്റ്ററുകളും സർക്കാരിന്റെ അധികാര ഇടനാഴികൾ നിയന്ത്രിക്കുന്ന അവസ്ഥയാണെന്നും ബി.ജെ.പിയിൽ ചേർന്നതിന് ശേഷം കൻവർ വിജയ് പ്രതാപ് ആരോപിച്ചു. പഞ്ചാബിന്റെ ഐഡന്റിറ്റിയും ‘പഞ്ചാബിയത്തും’ നഷ്ടമായിക്കൊണ്ടിരിക്കുകയാണെന്നും ഉത്തർപ്രദേശിലേതുപോലെ കുറ്റവാളികളെ അടിച്ചമർത്തുന്ന ശക്തമായ ‘യു.പി മോഡൽ ഭരണം’ നിലവിൽ വന്നാൽ മാത്രമേ സംസ്ഥാനത്ത് സമാധാനം തിരികെ കൊണ്ടരാൻ സാധിക്കൂ എന്നും അദ്ദേഹം പറഞ്ഞു.
2015-ലെ കോട്കാപുര, ബെഹ്ബൽ കലാൻ പോലീസ് വെടിവെപ്പ് കേസുകൾ അന്വേഷിച്ച പ്രത്യേക അന്വേഷണ സംഘത്തിന് (SIT) നേതൃത്വം നൽകിയ മുൻ പോലീസുകാരൻ കൂടിയാണ് വിജയ് പ്രതാപ് സിംഗ്. മുൻപ് പാർട്ടി വിരുദ്ധ പ്രവർത്തനം ആരോപിച്ച് എ.എ.പി ഇയാളെ അഞ്ച് വർഷത്തേക്ക് സസ്പെൻഡ് ചെയ്തിരുന്നു. തുടർന്ന് എം.എൽ.എ സ്ഥാനം രാജിവെച്ച ശേഷമാണ് അദ്ദേഹം ബി.ജെ.പിയിൽ എത്തിയത്. നിയമസഭാ തിരഞ്ഞെടുപ്പിന് കേവലം മാസങ്ങൾ മാത്രം ബാക്കിനിൽക്കെ പ്രമുഖ നേതാക്കളുടെ ഈ കൂട്ടരാജി ഭഗവന്ത് മാൻ സർക്കാരിന് വലിയ തിരിച്ചടിയാണ് ഉണ്ടാക്കിയിരിക്കുന്നത്. കൂടുതൽ എ.എ.പി നേതാക്കൾ വരും ദിവസങ്ങളിൽ ബി.ജെ.പിയിലേക്ക് എത്തുമെന്നും പാർട്ടിയിൽ വൻ ചോർച്ച ആരംഭിച്ചു കഴിഞ്ഞെന്നും ബി.ജെ.പി വക്താവ് ജയ്വീർ ഷെർഗിൽ അവകാശപ്പെട്ടു.
