ന്യൂഡല്‍ഹി : കോവിഡ് മഹാമാരിയും സാമ്പത്തിക മാന്ദ്യവും ബാധിച്ച ജനങ്ങളോടുള്ള കടുത്ത വഞ്ചനയാണ് കേന്ദ്രബജറ്റെന്ന് സിപിഐ എം പൊളിറ്റ്ബ്യൂറോ പ്രസ്താവനയില്‍ പറഞ്ഞു. ‘അധ്വാനിക്കുന്ന ജനവിഭാഗങ്ങളുടെ ജീവിതദുരിതങ്ങള്‍ വര്‍ധിപ്പിച്ചുകൊണ്ട് വന്‍കിട ബിസിനസ്സുകാരുടെ താല്‍പര്യങ്ങള്‍ സംരക്ഷിക്കാന്‍ മോഡിസര്‍ക്കാര്‍ കാട്ടുന്ന അചഞ്ചലമായ പ്രതിബദ്ധതയ്ക്ക് മികച്ച ഉദാഹരണമാണ് ഈ ബജറ്റ്.’
‘പൊതുനിക്ഷേപം വര്‍ധിപ്പിക്കാന്‍ സര്‍ക്കാര്‍ തയ്യാറാകാത്തത് ഇതിനു തെളിവാണ്.കൃഷി, വിദ്യാഭ്യാസം, സാമൂഹികക്ഷേമം, വനിത–-ശിശുക്ഷേമം, ശാസ്ത്രസാങ്കേതികം, നഗരവികസനം, ഭിന്നശേഷിക്കാരുടെ വികസനം എന്നീ മേഖലകളില്‍ നടപ്പുവര്‍ഷം വിഹിതം വെട്ടിക്കുറച്ചു.’
‘ആരോഗ്യമേഖലയില്‍ 74,600 കോടി രൂപയാണ് ബജറ്റ് വിഹിതം. എന്നാല്‍ കഴിഞ്ഞവര്‍ഷത്തെ പുതുക്കിയ കണക്കിനെക്കാള്‍ 8,000 കോടി രൂപ കുറവാണിത്. ദേശീയ ആസ്തികളുടെ വില്‍പനയാണ് പ്രതിസന്ധി പരിഹരിക്കാനുള്ള ഒറ്റമൂലിയായി സര്‍ക്കാര്‍ കാണുന്നതെന്നും’ പിബി പ്രസ്താവനയില്‍ പറഞ്ഞു.
