തെലുങ്ക് സിനിമയിലെ ജനപ്രിയ നടന്മാരിൽ ഒരാളാണ് നന്ദമുരി കല്യാൺ റാം. ദക്ഷിണേന്ത്യയിലാകമാനം ധാരാളം ആരാധകരുണ്ട് താരത്തിന്. ആക്ഷൻ സിനിമകളിലൂടെയാണ് കല്യാൺ റാം പ്രേക്ഷക ശ്രദ്ധ പിടിച്ചു പറ്റുന്നത്.അഭിനയത്തിന് പുറമേ, ഒരു ജനപ്രിയ നിർമ്മാതാവ് കൂടിയാണ് അദ്ദേഹം. നന്ദമുരി കല്യാൺ റാം നായകനാകുന്ന ഏറ്റവും പുതിയ ചിത്രമാണ് ‘ഡെവിൾ: ദി ബ്രിട്ടീഷ് സീക്രട്ട് ഏജന്റ്’. മലയാളി താരം സംയുക്ത മേനോൻ ആണ് ചിത്രത്തിലെ നായിക.
നിർമ്മാണം ആരംഭിച്ചത് മുതൽക്ക് തന്നെ ശ്രദ്ധേയമായിരിക്കുകയാണ് ഡെവിൾ എന്ന ഈ പുതിയ ചിത്രം. 80 കോടി രൂപ മുതൽമുടക്കിൽ ഒരുക്കിയിട്ടുള്ള കൂറ്റൻ സെറ്റിലാണ് ഡെവിൾ ചിത്രീകരിക്കുന്നത് എന്നുള്ളതാണ് ഈ സിനിമയെ ശ്രദ്ധാകേന്ദ്രമാക്കുന്നത്. ഇന്ത്യയിൽ ബ്രിട്ടീഷ് ഭരണ കാലത്തെ ഒരു സീക്രട്ട് ഏജന്റിന്റെ കഥയെ ആസ്പദമാക്കിയാണ് ചിത്രം ഒരുക്കിയിരിക്കുന്നതെന്നാണ് റിപ്പോർട്ടുകൾ സൂചിപ്പിക്കുന്നത്.
1940 കാലഘട്ടത്തെ അനുസ്മരിപ്പിക്കുന്ന ഒരു കൂറ്റൻ സെറ്റാണ് ചിത്രത്തിനായി നിർമ്മിച്ചിരിക്കുന്നത്. 1940-ലെ ആന്ധ്രാ ക്ലബ്ബ്, വിന്റേജ് കാറുകൾ, വിന്റേജ് ബൈക്കുകൾ, ബ്രിട്ടീഷ് കവർ ഡിസൈനുകളുള്ള 500-ഓളം പുസ്തകങ്ങൾ, 1940-കളിലെ ഒരു ചരക്ക് കപ്പൽ, 36 അടി ഉയരമുള്ള ഒരു വിളക്കുമാടം എന്നിവയെല്ലാം ഈ സെറ്റിൽ ഉൾപ്പെടുത്തിയിട്ടുണ്ട്. നവംബർ 24 ന് ചിത്രം തിയേറ്ററുകളിൽ എത്തുമെന്നാണ് റിപ്പോർട്ടുകൾ സൂചിപ്പിക്കുന്നത്. കൂടാതെ ഈ ചിത്രം ഹിന്ദിയിലും റീമേക്ക് ചെയ്യുമെന്ന് നിർമ്മാതാക്കൾ വ്യക്തമാക്കി.
