റിയാദ് : സൗദി അറേബ്യയിൽ ഉണ്ടായ വാഹനാപകടത്തിൽ 9 ഇന്ത്യക്കാർ മരിച്ചു. പടിഞ്ഞാറൻ സൗദി അറേബ്യയിലെ ജിസാനിനടുത്താണ് അപകടമുണ്ടായത്. അപകടത്തിൽ ഒമ്പത് ഇന്ത്യൻ പൗരന്മാർ മരിച്ചതായി ജിദ്ദയിലെ ഇന്ത്യൻ മിഷൻ ആണ് അറിയിച്ചത്. മരിച്ചവരുടെ കുടുംബാംഗങ്ങളുമായി ഇന്ത്യൻ കോൺസുലേറ്റ് ബന്ധപ്പെട്ടു.
അപകടത്തിൽ നിരവധി പേർക്ക് പരിക്കേറ്റിട്ടുമുണ്ട് എന്നാണ് ഇന്ത്യൻ മിഷൻ അറിയിക്കുന്നത്. “ജിദ്ദയിലെ ഇന്ത്യൻ കോൺസുലേറ്റ് ജനറൽ പൂർണ പിന്തുണ നൽകുന്നുണ്ട്. അധികൃതരുമായും കുടുംബങ്ങളുമായും ബന്ധപ്പെട്ടു കൊണ്ടിരിക്കുകയാണ്. പരിക്കേറ്റവർ വേഗത്തിൽ സുഖം പ്രാപിക്കട്ടെയെന്ന് ഞങ്ങൾ ആശംസിക്കുന്നു. കൂടുതൽ വിവരങ്ങൾക്കായി ഒരു പ്രത്യേക ഹെൽപ്പ് ലൈൻ സജ്ജീകരിച്ചിട്ടുണ്ട്” എന്നും ഇന്ത്യൻ മിഷൻ അറിയിച്ചു.
സൗദി അറേബ്യയിൽ നടന്ന വാഹനാപകടത്തിൽ മരിച്ച ഇന്ത്യക്കാരുടെ കുടുംബങ്ങൾക്ക് വിദേശകാര്യ മന്ത്രി എസ് ജയശങ്കർ അനുശോചനങ്ങൾ അറിയിച്ചു. മൃതശരീരങ്ങൾ നാട്ടിലേക്ക് കൊണ്ടുവരുന്നത് അടക്കമുള്ള എല്ലാ സഹായങ്ങൾക്കും ജിദ്ദയിലെ ഇന്ത്യൻ കോൺസുലേറ്റ് ജനറലിന്റെ പൂർണ്ണപിന്തുണ ഉണ്ടാകുമെന്നും അദ്ദേഹം ഉറപ്പ് നൽകി.
