ഭീകര കേന്ദ്രങ്ങളെ ലക്ഷ്യം വച്ച് ഇന്ത്യ നടത്തിയ ഓപ്പറേഷൻ സിന്ദൂർ നടന്നിട്ട് ഏഴ് മാസം പിന്നിടുമ്പോഴും ഭയം വിട്ടൊഴിയാതെ പാകിസ്താൻ. ഓപ് സിന്ദൂരിന് ശേഷം 72 ഭീകര ലോഞ്ച് പാഡുകളാണ് ഇന്ത്യൻ അതിർത്തിക്ക് സമീപത്ത് നിന്ന് മാറ്റി സ്ഥാപിച്ചതെന്ന് ബിഎസ്എഫ് ചൂണ്ടിക്കാട്ടി.
ഓപ്പറേഷൻ സിന്ദൂരിനിടെ അതിർത്തിയിലെ നിരവധി ഭീകര ലോഞ്ച് പാഡുകൾ ബിഎസ്എഫ് ഉന്മൂലനം ചെയ്തിരുന്നു. ഇതിന് ശേഷം പാകിസ്താൻ അത്തരത്തിലുള്ള എല്ലാ സൗകര്യങ്ങളും ഉൾപ്രദേശങ്ങളിലേക്ക് മാറ്റി. അതിർത്തി കൃത്യമല്ലാത്ത സിയാൽകോട്ടിലെയും സഫർവാളിലെയും ഉൾപ്രദേശങ്ങളിൽ ഏകദേശം 12 ലോഞ്ച്പാഡുകൾ പ്രവർത്തിക്കുന്നുണ്ട്. അതുപോലെ അതിർത്തിയിൽ നിന്ന് അകലെയുള്ള മറ്റ് പ്രദേശങ്ങളിൽ 60 ലോഞ്ച്പാഡുകൾ പ്രവർത്തിക്കുന്നതായും ബിഎസ്എഫ് ഡിഐജി വിക്രം കുൻവർ പറഞ്ഞു. 2025ലെ സേനകളുടെ നേട്ടങ്ങൾ അറിയിക്കുന്നതിനായി കുൻവർ, ജമ്മു ഫ്രോണ്ടിയർ ബിഎസ്എഫ് ഐജി ശശാങ്ക് ആനന്ദ്, ഡിഐജി കുൽവന്ത് റായ് ശർമ്മ എന്നിവർ നടത്തിയ സംയുക്ത പത്രസമ്മേളനത്തിലാണ് ഇക്കാര്യങ്ങൾ വെളിപ്പെടുത്തിയത്.
അതിർത്തി കടന്നുള്ള പ്രവർത്തനം പുനരാരംഭിക്കാൻ തീരുമാനിച്ചാൽ ശത്രുവിന് കനത്ത നഷ്ടം വരുത്താൻ സേന മടിക്കില്ലെന്നും മുതിർന്ന ബിഎസ്എഫ് ഉദ്യോഗസ്ഥർ പറഞ്ഞു. മെയ് ഏഴു മുതൽ 10 വെ നാല് ദിവസത്തെ ഏറ്റുമുട്ടലുകൾക്ക് ശേഷം സൈനിത നടപടി നിർത്തിവച്ചതിനെ ബഹുമാനിക്കുന്നുവെന്നും ബിഎസ്എഫ് കൂട്ടിച്ചേർത്തു.
