ടെഹ്റാൻ : മുതിർന്ന പുരോഹിതൻ ആയത്തുള്ള അലിറേസ അറഫി ഇറാന്റെ ഇടക്കാല പരമോന്നത നേതാവ് ആയി നിയമിക്കപ്പെട്ടു. ശനിയാഴ്ച യുഎസ്-ഇസ്രായേൽ സംയുക്ത ആക്രമണത്തിൽ 86 കാരനായ പരമോന്നത നേതാവ് ആയത്തുള്ള അലി ഖമനെയി കൊല്ലപ്പെട്ട സാഹചര്യത്തിലാണ് രാജ്യത്തിന്റെ ഈ പുതിയ നീക്കം. ഇറാന്റെ
ഭരണഘടനാ പ്രക്രിയ പ്രകാരം ഖമനെയിക്ക് ഒരു പിൻഗാമിയെ തിരഞ്ഞെടുക്കുന്നതുവരെ പരിവർത്തന കാലയളവിൽ പരമോന്നത നേതാവിന്റെ ചുമതലകൾ നിർവഹിക്കുന്നതിന് അലിറേസ അറഫിയെ തിരഞ്ഞെടുത്തതായി
ഇറാനിയൻ സ്റ്റേറ്റ് മീഡിയ അറിയിച്ചു.
67 കാരനായ അറഫി ഗാർഡിയൻ കൗൺസിലിലെ അംഗമാണ്. 1959-ൽ ഇറാനിലെ യാസ്ദ് പ്രവിശ്യയായ മെയ്‌ബോദിലാണ് അറഫി ജനിച്ചത്. ഖമനെയിയെപ്പോലെ, അദ്ദേഹം ഒരു മുജ്തഹിദ് (മുതിർന്ന ഇസ്ലാമിക പണ്ഡിതൻ) ആണെന്ന് സൂചിപ്പിക്കുന്ന അയത്തുള്ള എന്ന പദവി വഹിക്കുന്ന പുരോഹിതൻ കൂടിയാണ് അദ്ദേഹം. ഖമനെയിയുടെ പിൻഗാമിയെ നിയമിക്കുന്നത് വരെ ഇറാനിയൻ പരമോന്നത നേതാവിന്റെ ചുമതലകൾ നിർവഹിക്കുന്ന താൽക്കാലിക നേതൃത്വ കൗൺസിലിലെ നിയമജ്ഞനായാണ് അദ്ദേഹത്തെ നിയമിച്ചത്. പ്രസിഡന്റ് മസൂദ് പെസെഷ്കിയാൻ, ചീഫ് ജസ്റ്റിസ് ഘോലം-ഹൊസൈൻ മൊഹ്‌സെനി-എജെയ്, ഗാർഡിയൻ കൗൺസിലിലെ ഒരു പുരോഹിതൻ എന്നിവരും ഈ ഇടക്കാല കൗൺസിലിൽ ഉൾപ്പെടുന്നു.
