വാഷിംഗ്ടൺ : യുകെ പ്രധാനമന്ത്രി കെയർ സ്റ്റാർമറിനെതിരെ രൂക്ഷ വിമർശനവുമായി അമേരിക്കൻ പ്രസിഡണ്ട് ഡൊണാൾഡ് ട്രംപ്. ഇറാനുമായുള്ള സംഘർഷത്തിൽ ബ്രിട്ടീഷ് പിന്തുണ ലഭിക്കാതിരുന്നത് എന്നും ഓർത്തുവയ്ക്കുമെന്ന് ട്രംപ് സൂചിപ്പിച്ചു. ഇപ്പോൾ അവർ പിന്തുണ വാഗ്ദാനം ചെയ്തിട്ടുണ്ട്, എന്നാൽ യുദ്ധം ഞങ്ങൾ ജയിച്ചു കഴിഞ്ഞു, ഇനി നിങ്ങളുടെ പിന്തുണ ആവശ്യമില്ല എന്നും ട്രൂത്ത് സോഷ്യലിൽ പങ്കുവെച്ച ഒരു പോസ്റ്റിൽ വ്യക്തമാക്കി.
പശ്ചിമേഷ്യയിലേക്ക് രണ്ട് വിമാനവാഹിനിക്കപ്പലുകൾ അയയ്ക്കുന്നതിനെക്കുറിച്ച് ബ്രിട്ടൻ നൽകിയ വാഗ്ദാനത്തിന് പിന്നാലെയാണ് ട്രംപിന്റെ പ്രതികരണം. നേരത്തെ ഇറാനെ ആക്രമിക്കാൻ അമേരിക്ക ബ്രിട്ടീഷ് താവളങ്ങൾ ഉപയോഗിക്കുന്നത് യുകെ സർക്കാർ തടഞ്ഞിരുന്നു. എന്നാൽ മാർച്ച് 7ന് പ്രിൻസ് ഓഫ് വെയിൽസ് വിമാനവാഹിനിക്കപ്പലിനെ സാധ്യമായ വിന്യാസത്തിനായി തയ്യാറാക്കുകയാണെന്ന് ബ്രിട്ടീഷ് പ്രതിരോധ മന്ത്രാലയം അറിയിച്ചതിനെ തുടർന്നാണ് യുഎസ് പ്രസിഡന്റ് രൂക്ഷമായ വിമർശനം ഉന്നയിച്ചത്.
“ഒരുകാലത്ത് നമ്മുടെ മഹത്തായ സഖ്യകക്ഷിയായിരുന്ന, ഒരുപക്ഷേ എല്ലാവരിലും ഏറ്റവും മഹത്തരമായിരുന്ന യുണൈറ്റഡ് കിംഗ്ഡം, ഒടുവിൽ മിഡിൽ ഈസ്റ്റിലേക്ക് രണ്ട് വിമാനവാഹിനിക്കപ്പലുകൾ അയയ്ക്കുന്നതിനെക്കുറിച്ച് ഇപ്പോൾ ഗൗരവമായി ചിന്തിക്കുന്നു. പക്ഷേ പ്രധാനമന്ത്രി സ്റ്റാർമർ, ഞങ്ങൾക്ക് ഇനി നിങ്ങളെ ആവശ്യമില്ല – പക്ഷേ ഞങ്ങൾ ഓർക്കും. നമ്മൾ വിജയിച്ചുകഴിഞ്ഞതിനുശേഷം യുദ്ധങ്ങളിൽ ചേരുന്ന ആളുകളെ ഞങ്ങൾക്ക് ആവശ്യമില്ല!” എന്ന് ട്രംപ് തന്റെ സമൂഹമാധ്യമ പോസ്റ്റിൽ അറിയിച്ചു.
