കുവൈറ്റ് സിറ്റി : തീവ്രവാദ പ്രവർത്തനങ്ങൾക്ക് ഗൂഢാലോചന നടത്തിയെന്ന് ആരോപിച്ച് ഇറാൻ പിന്തുണയോടെ പ്രവർത്തിക്കുന്ന ലബനീസ് ഭീകര സംഘടനയായ ഹിസ്ബുള്ളയുടെ പത്ത് ഭീകരർ കുവൈറ്റിൽ അറസ്റ്റിലായി. കുവൈറ്റിലെ ‘സുപ്രധാന സ്ഥാപനങ്ങൾ’ ആക്രമിക്കാൻ ഗൂഢാലോചന നടത്തിയെന്ന കുറ്റത്തിനാണ് ഇവരെ അറസ്റ്റ് ചെയ്തിരിക്കുന്നത്. ഈ ആഴ്ച കുവൈറ്റിൽ അറസ്റ്റ് ചെയ്യപ്പെടുന്ന രണ്ടാമത്തെ ഹിസ്ബുള്ള സെൽ ആണിത്.
അറസ്റ്റിലായ ഭീകരരിൽ നിന്നും ഹിസ്ബുള്ള പതാകകൾ, ചെറിയ ഡ്രോണുകൾ, ഇസ്രായേൽ ആക്രമണത്തിൽ കൊല്ലപ്പെട്ട ഇറാന്റെ ആയത്തുള്ള അലി ഖമേനിയുടെയും ഹിസ്ബുള്ളയുടെ മുൻ നേതാവ് കൊല്ലപ്പെട്ട ഹസ്സൻ നസ്രല്ലയുടെയും ചിത്രങ്ങൾ എന്നിവ പിടിച്ചെടുത്തതായി കുവൈറ്റ് ആഭ്യന്തരമന്ത്രാലയം അറിയിച്ചു. ഇതിനുമുൻപ് തിങ്കളാഴ്ച കുവൈറ്റ് ആഭ്യന്തര മന്ത്രാലയം ഹിസ്ബുള്ളയുമായി ബന്ധമുള്ള 16 പേരെ അറസ്റ്റ് ചെയ്തിരുന്നു. വ്യക്തികളെ റിക്രൂട്ട് ചെയ്യാൻ സംഘം ശ്രമിച്ചതായും നിരവധി ആയുധങ്ങൾ, ക്യാമറ ഡ്രോണുകൾ, മോഴ്‌സ് കോഡ് ആശയവിനിമയ ഉപകരണങ്ങൾ എന്നിവ പിടിച്ചെടുത്തതായും ആഭ്യന്തരമന്ത്രാലയം വ്യക്തമാക്കി.
