ന്യൂഡൽഹി : 21 ദിവസങ്ങളായി നീണ്ടുനിൽക്കുന്ന പശ്ചിമേഷ്യൻ സംഘർഷത്തിൽ ഇതുവരെ 6 ഇന്ത്യക്കാർ കൊല്ലപ്പെട്ടതായി ഇന്ത്യൻ വിദേശകാര്യമന്ത്രാലയം. ഒരാളെ കാണാതായിട്ടുണ്ട്. ഏകദേശം 3,00,000 പേർ വിവിധ സംഘർഷ മേഖലകളിൽ നിന്നും ഇന്ത്യയിലേക്ക് തിരികെ എത്തി. കഴിഞ്ഞദിവസം സൗദി അറേബ്യയിൽ നടന്ന വ്യോമാക്രമണത്തിലാണ് ഒടുവിലായി ഒരു ഇന്ത്യക്കാരൻ കൂടി കൊല്ലപ്പെട്ടത്.
കാണാതായ വ്യക്തിയെ കണ്ടെത്തുന്നതിനും മരിച്ച ഇന്ത്യൻ പൗരന്മാരുടെ മൃതദേഹങ്ങൾ ഇന്ത്യയിലേക്ക് തിരികെ കൊണ്ടുവരുന്നതിനും വിവിധ രാജ്യങ്ങളിലെ ഇന്ത്യൻ ദൗത്യസംഘങ്ങൾ അധികാരികളുമായി അടുത്തു പ്രവർത്തിക്കുന്നുണ്ടെന്ന് ഇന്റർ-മിനിസ്റ്റീരിയൽ ബ്രീഫിംഗിനെ അഭിസംബോധന ചെയ്തുകൊണ്ട് വിദേശകാര്യ മന്ത്രാലയത്തിലെ ഗൾഫ് അഡീഷണൽ സെക്രട്ടറി അസീം ആർ മഹാജൻ പറഞ്ഞു. ഗൾഫ് മേഖലയിൽ നിന്നുള്ള യാത്രാ സാഹചര്യം ക്രമേണ മെച്ചപ്പെട്ടു വരികയാണെന്നും അദ്ദേഹം വ്യക്തമാക്കി. നിലവിൽ കുവൈറ്റിലെയും ബഹ്‌റൈനിലെയും വ്യോമാതിർത്തി മാത്രമാണ് അടച്ചിരിക്കുന്നത് എന്നും അദ്ദേഹം സൂചിപ്പിച്ചു. മേഖലയിലെ ഇന്ത്യൻ നാവികർക്ക് എല്ലാ പിന്തുണയും നൽകുന്നുണ്ടെന്നും വിദേശകാര്യ മന്ത്രാലയം തുറമുഖങ്ങൾ, ഷിപ്പിംഗ്, ജലപാത മന്ത്രാലയവുമായി അടുത്ത് പ്രവർത്തിക്കുന്നുണ്ടെന്നും അസീം മഹാജൻ അറിയിച്ചു.
