ഐപിഎൽ 2026-ൽ ഇന്ന് നടക്കാനിരിക്കുന്ന കൊൽക്കത്ത നൈറ്റ് റൈഡേഴ്സിനെതിരായ മത്സരത്തിന് മുൻപ് ചെന്നൈ സൂപ്പർ കിംഗ്സ് നായകൻ രുതുരാജ് ഗെയ്‌ക്‌വാദിന് മുന്നറിയിപ്പുമായി മുൻ ഇന്ത്യൻ താരവും കമന്റേറ്ററുമായ ആകാശ് ചോപ്ര. മോശം ഫോമിലൂടെ കടന്നുപോകുന്ന രുതുരാജ് കടുത്ത സമ്മർദ്ദത്തിലാണെന്നും, സഹതാരങ്ങളുടെ മികച്ച പ്രകടനം ആ സമ്മർദ്ദം ഇരട്ടിയാക്കുമെന്നും ചോപ്ര തന്റെ യൂട്യൂബ് ചാനലിലൂടെ വിലയിരുത്തി.
ഈ സീസണിൽ നാല് ഇന്നിംഗ്സുകളിൽ നിന്ന് വെറും 56 റൺസ് മാത്രമാണ് രുതുരാജ് നേടിയിട്ടുള്ളത്. ശരാശരി 14.00, സ്ട്രൈക്ക് റേറ്റ് 103.70. “ഋതുരാജ് തീർച്ചയായും കടുത്ത സമ്മർദ്ദത്തിലായിരിക്കും. അവൻ വളരെ പതുക്കെയാണ് ബാറ്റ് ചെയ്യുന്നത്. ഭയന്നാണ് അവൻ കളിക്കുന്നതെന്ന് തോന്നിപ്പോകും. രുതുരാജ് ഇതിലും മികച്ച കളിക്കാരനാണ്,” ചോപ്ര വ്യക്തമാക്കി.
മൂന്നാം നമ്പറിൽ ഇറങ്ങി മികച്ച പ്രകടനം നടത്തുന്ന ആയുഷ് കണ്ടെത്തുന്ന ഫോം രുതുരാജിന് വലിയ വെല്ലുവിളിയാണെന്ന് ചോപ്ര പറയുന്നു. 160.24 സ്ട്രൈക്ക് റേറ്റിൽ 133 റൺസാണ് മാത്രയെ അടിച്ചുകൂട്ടിയത്. “ഒരു നാച്ചുറൽ ഓപ്പണറായ മാത്രയെ സിഎസ്‌കെ മൂന്നാം നമ്പറിലാണ് കളിപ്പിക്കുന്നത്. അവൻ ഉജ്ജ്വല ഫോമിലാണ്. ഇത്രയും നന്നായി ബാറ്റ് ചെയ്യുന്ന ഒരാളെ ഓപ്പണറായി ഇറക്കണമോ എന്ന ചിന്ത നായകൻ രുതുരാജിന്റെ മനസ്സിൽ ഉറപ്പായും ഉണ്ടാകും,” അദ്ദേഹം കൂട്ടിച്ചേർത്തു.
ഡൽഹി ക്യാപിറ്റൽസിനെതിരായ കഴിഞ്ഞ മത്സരത്തിൽ പുറത്താകാതെ 115 റൺസ് നേടിയ സിഎസ്‌കെ ഓപ്പണർ സഞ്ജു സാംസണിനെ ചോപ്ര വാനോളം പുകഴ്ത്തി. 137 റൺസുമായി നിലവിൽ ചെന്നൈയുടെ ടോപ് സ്കോററാണ് സഞ്ജു. “ഇത് സഞ്ജു സാംസണിന്റെ 2.0 വേർഷനാണ്. ഇപ്പോൾ അവൻ റൺസ് കണ്ടെത്തുകയാണെങ്കിൽ, അത് തുടർച്ചയായി നേടുന്നുണ്ട്. അവൻ ഒരു സെഞ്ചുറി നേടിയ സാഹചര്യത്തിൽ, അടുത്ത മൂന്നോ നാലോ ഇന്നിംഗ്സുകളിലും ആ മികവ് തുടരുമെന്ന് നമുക്ക് പ്രതീക്ഷിക്കാം,” ചോപ്ര വിലയിരുത്തി.
ബൗളിംഗ് നിരയിൽ ഖലീൽ അഹമ്മദിന്റെ പ്രകടനം ആശങ്കയുണ്ടാക്കുന്നതാണെന്ന് ചോപ്ര ചൂണ്ടിക്കാട്ടി. പന്ത് അകത്തേക്ക് സ്വിംഗ് ചെയ്യിക്കാൻ ഖലീലിന് സാധിക്കുന്നില്ല. മറുവശത്ത്, കെകെആർ ഓപ്പണർമാരായ അജിങ്ക്യ രഹാനെയ്ക്കും ഫിൻ അലനുമെതിരെ അക്കീൽ ഹൊസൈനെ പുതിയ പന്തിൽ പരീക്ഷിക്കണമെന്ന് അദ്ദേഹം സിഎസ്‌കെ മാനേജ്മെന്റിനെ ഉപദേശിച്ചു. “ഇരുവർക്കും ലെഫ്റ്റ്-ആം സ്പിൻ കളിക്കാൻ ബുദ്ധിമുട്ടാണ്. അതിനാൽ അക്കീൽ ഹൊസൈനിലൂടെ ഇരുവരെയും കുടുക്കാൻ ചെന്നൈയ്ക്ക് സാധിക്കും,” ചോപ്ര വ്യക്തമാക്കി.
