ഐപിഎൽ 2026-ന്റെ ലീഗ് ഘട്ടം അവസാനത്തിലേക്ക് അടുക്കുമ്പോൾ പ്ലേ ഓഫ് പോരാട്ടം ആവേശകരമായ അന്ത്യത്തിലേക്ക്. തുടർച്ചയായ ഏഴ് വിജയങ്ങളുമായി കുതിച്ച പഞ്ചാബ് കിംഗ്‌സ് അടുത്ത നാല് മത്സരങ്ങളിൽ പരാജയപ്പെട്ടതോടെ പോയിന്റ് പട്ടികയിലെ കണക്കുകൾ മാറിമറിഞ്ഞു.
പഞ്ചാബ് കിംഗ്‌സിന്റെ അപ്രതീക്ഷിത വീഴ്ച ടേബിളിന്റെ മുകൾത്തട്ടിൽ വലിയ അനിശ്ചിതത്വമാണ് സൃഷ്ടിച്ചിരിക്കുന്നത്. നിലവിലെ സാഹചര്യത്തിൽ വിവിധ ടീമുകളുടെ പ്ലേ ഓഫ് സാധ്യതകൾ ഇങ്ങനെയാണ്:
1. പഞ്ചാബ് കിംഗ്‌സ് : ആദ്യ 6 മത്സരങ്ങളിലും വിജയിച്ച പഞ്ചാബ് ഇപ്പോൾ തുടർച്ചയായ നാല് തോൽവികളുടെ ആഘാതത്തിലാണ്. നിലവിൽ 11 മത്സരങ്ങളിൽ നിന്ന് 13 പോയിന്റുള്ള അവർക്ക് ഇനി മുംബൈ, ബാംഗ്ലൂർ, ലക്നൗ ടീമുകളെയാണ് നേരിടാനുള്ളത്. ബാക്കിയുള്ള മൂന്ന് മത്സരങ്ങളിൽ രണ്ടെണ്ണത്തിൽ വിജയിച്ചാൽ 17 പോയിന്റോടെ പ്ലേ ഓഫ് ഉറപ്പിക്കാം.
2. ബാംഗ്ലൂരും ഹൈദരാബാദും : 11 കളികളിൽ നിന്ന് 14 പോയിന്റും +1.103 എന്ന മികച്ച നെറ്റ് റൺറേറ്റുമായി പട്ടികയിൽ ഒന്നാമതാണ് ആർസിബി. ഒരു ജയം കൂടി നേടിയാൽ പ്ലേ ഓഫ് ഉറപ്പിക്കാം. 14 പോയിന്റുള്ള ഹൈദരാബാദിനും ഒരു വിജയം കൂടി മതി അടുത്ത ഘട്ടത്തിലേക്ക് കടക്കാൻ. രണ്ട് വിജയങ്ങൾ അവരെ ആദ്യ രണ്ട് സ്ഥാനങ്ങളിൽ എത്തിച്ചേക്കാം.
3. ചെന്നൈയും രാജസ്ഥാനും: പഞ്ചാബിന്റെ തോൽവികൾ ഏറ്റവും കൂടുതൽ ഗുണകരമായത് 12 പോയിന്റ് വീതമുള്ള സിഎസ്കെക്കും രാജസ്ഥാനുമാണ്.ഇനിയുള്ള മൂന്ന് മത്സരങ്ങളിൽ രണ്ടെണ്ണത്തിൽ വിജയിച്ചാൽ ഇവർക്ക് 16 പോയിന്റിലെത്താം. എന്നാൽ ഒരു തോൽവി പോലും രാജസ്ഥാന്റെ സാധ്യതകളെ ഇല്ലാതാക്കിയേക്കാം.
4. മറ്റ് ടീമുകളുടെ അവസ്ഥ
ഗുജറാത്ത് ടൈറ്റൻസ് 14 പോയിന്റുണ്ടെങ്കിലും റൺറേറ്റ് നെഗറ്റീവ് ആയതിനാൽ സുരക്ഷിതരാകാൻ അവർക്ക് രണ്ട് ജയങ്ങൾ കൂടി ആവശ്യമാണ്.
കൊൽക്കത്ത : 10 പോയിന്റുള്ള കെകെആറിന് ഇനി വരുന്ന നാല് മത്സരങ്ങളും ജയിച്ചേ തീരൂ. ഒരെണ്ണത്തിൽ പരാജയപ്പെട്ടാൽ അവർ പുറത്താകും.
ഡൽഹി ക്യാപിറ്റൽസ് : 8 പോയിന്റുള്ള ഡൽഹിക്ക് ഇനി ഗണിതശാസ്ത്രപരമായ അത്ഭുതങ്ങൾ സംഭവിച്ചാൽ മാത്രമേ പ്രതീക്ഷയുള്ളൂ.
മുംബൈ , ലക്നൗ ടീമുകളാകട്ടെ അടുത്ത റൗണ്ടിലെത്താതെ പുറത്തായി കഴിഞ്ഞു.
