“ടീമിനാണ് റണ്ണും ഗോളും വേണ്ടത്, നിനക്കല്ല!” എന്ന തിയറി ഹെൻറിയുടെ പ്രശസ്തമായ വാക്കുകൾ നിലവിൽ ഏറ്റവും കൂടുതൽ അർത്ഥവത്താകുന്നത് പോർച്ചുഗൽ സൂപ്പർ താരം ക്രിസ്റ്റ്യാനോ റൊണാൾഡോയുടെ കാര്യത്തിലാണ്. ഫിഫ ലോകകപ്പ് 2026-ലെ തങ്ങളുടെ ആദ്യ മത്സരത്തിൽ ഡെമോക്രാറ്റിക് റിപ്പബ്ലിക് ഓഫ് കോംഗോയോട്പോർച്ചുഗൽ 1-1 ന് സമനില വഴങ്ങിയപ്പോൾ, ലോകം കണ്ട ഏറ്റവും മികച്ച പോരാളിയായ റൊണാൾഡോയുടെ നിഴൽ മാത്രമാണ് ടെക്സാസിലെ ഹൂസ്റ്റൺ സ്റ്റേഡിയത്തിൽ കാണാൻ കഴിഞ്ഞത്. കളിയിലുടനീളം വെറും 25 ടച്ചുകൾ മാത്രം കൈക്കലാക്കിയ താരത്തിന് ലക്ഷ്യത്തിലേക്ക് ഒരൊറ്റ ഷോട്ട് പോലും ഉതിർക്കാൻ കഴിഞ്ഞില്ല. ഒരു വലിയ സ്ട്രൈക്കറെ സംബന്ധിച്ച് ഇത് വളരെ മോശം കണക്കുകളാണ്.
മത്സരത്തിന്റെ തുടക്കത്തിൽ തന്നെ ജാവോ നെവെസിന്റെ ഹെഡ്ഡർ ഗോളിലൂടെ പോർച്ചുഗൽ തകർപ്പൻ തുടക്കമാണ് നേടിയത്. വിറ്റിഞ്ഞ, ബ്രൂണോ ഫെർണാണ്ടസ്, ബെർണാർഡോ സിൽവ എന്നിവരടങ്ങുന്ന പോർച്ചുഗലിന്റെ മിഡ്ഫീൽഡ് ക്രിയേറ്റിവിറ്റിയിൽ ഒട്ടും പിന്നിലായിരുന്നില്ല. ആദ്യ 25 മിനിറ്റിനുള്ളിൽ തന്നെ എതിരാളികളേക്കാൾ 200 പാസുകൾ കൂടുതൽ കളിക്കാൻ അവർക്ക് സാധിച്ചു.
എന്നാൽ, ഈ അവസരങ്ങളെല്ലാം ഗോളാക്കി മാറ്റുന്നതിലും ഫിനിഷിങ്ങിലുമാണ് ടീമിന് പിഴച്ചത്. സ്ട്രൈക്കർ സ്ഥാനത്ത് റൊണാൾഡോ വളരെ ദൃഢമായി നിലയുറപ്പിച്ചതോടെ നെവെസിന്റെ ഗോളിന് ശേഷം മത്സരത്തിൽ ആകെ 6 ഷോട്ടുകൾ മാത്രമാണ് പോർച്ചുഗലിന് എടുക്കാനായത്. കളി 1-1 സമനിലയിലായപ്പോൾ, കണക്കുകളിൽ കോംഗോയാണ് മുന്നിൽ നിന്നത്. അവർ കൂടുതൽ ഷോട്ട് ശ്രമങ്ങളും (8-7), ലക്ഷ്യത്തിലേക്ക് കൂടുതൽ ഷോട്ടുകളും (2-1) ഒക്കെ ക്രിയേറ്റ് ചെയ്ത് ചരിത്രപരമായ ഒരു പോയിന്റ് സ്വന്തമാക്കി.
41 വയസ്സും 132 ദിവസവും പ്രായമുള്ളപ്പോൾ കളത്തിലിറങ്ങിയ റൊണാൾഡോ, ലോകകപ്പ് ചരിത്രത്തിൽ ഒരു മത്സരം സ്റ്റാർട്ട് ചെയ്യുന്ന ഏറ്റവും പ്രായം കൂടിയ ഔട്ട്ഫീൽഡ് പ്ലെയർ എന്ന ചരിത്ര റെക്കോർഡ് സ്വന്തമാക്കി. കാനഡയുടെ അതിബ ഹച്ചിൻസണിന്റെ റെക്കോർഡാണ് താരം മറികടന്നത്. എന്നാൽ പ്രായം കായികതാരങ്ങളെ ബാധിക്കുക തന്നെ ചെയ്യും എന്നതിന്റെ തെളിവായിരുന്നു ഈ മത്സരം. യുവത്വത്തിൽ വിംഗിലൂടെ എതിരാളികളെ ഡ്രിബിൾ ചെയ്ത് ബോക്സിലേക്ക് കുതിച്ചിരുന്ന റൊണാൾഡോ, ഇപ്പോൾ പ്രതിരോധത്തിൽ ഒട്ടും സഹായിക്കാതെ സെൻട്രൽ ഫോർവേഡ് റോളിലാണ് കളിക്കുന്നത്.
പോർച്ചുഗലിന്റെ നിലവിലെ സിസ്റ്റത്തിൽ ബിൽഡ്-അപ്പുകളിൽ താരം സഹായിക്കാറില്ല, ഗോൾ അടിക്കുക എന്നത് മാത്രമാണ് ലക്ഷ്യം. എന്നാൽ അവസാന 10 ലോകകപ്പ്, യൂറോ കപ്പ് മത്സരങ്ങളിൽ താരം ഒരൊറ്റ ഗോൾ പോലും നേടിയിട്ടില്ല എന്നത് വലിയ ആശങ്കയാണ്. സൗദി പ്രോ ലീഗിൽ അൽ-നാസറിനായി 30 മത്സരങ്ങളിൽ നിന്ന് 28 ഗോളുകൾ അടിച്ചുകൂട്ടി മികച്ച ഫോമിലാണ് റൊണാൾഡോ ലോകകപ്പിനെത്തിയത്. എന്നാൽ അവസാന നാല് പ്രധാന മത്സരങ്ങളിൽ 420 മിനിറ്റിൽ 396 മിനിറ്റും താരം കളിച്ചപ്പോൾ പോർച്ചുഗലിന് ആകെ നേടാനായത് ഒരൊറ്റ ഗോൾ മാത്രമാണ്. റൊണാൾഡോ സ്റ്റാർട്ട് ചെയ്യുമ്പോൾ ടീമിന്റെ ഗോൾ ശരാശരി 1.9 ആണെങ്കിൽ, താരം ഇല്ലാത്തപ്പോൾ അത് 2.8 ആയി ഉയരുന്നുണ്ട് (ഇതിൽ അർമേനിയക്കെതിരെയുള്ള 9-1 വിജയവും ഉൾപ്പെടുന്നു).
ലയണൽ മെസിയുമായി റൊണാൾഡോയെ താരതമ്യം ചെയ്യുമ്പോൾ, മെസ്സിക്ക് വേഗത കുറവാണെങ്കിലും കൃത്യമായ അവബോധത്തിലൂടെയും ലിങ്ക്-അപ്പ് പ്ലേയിലൂടെയും ഡീപ്പറായ റോൾ എടുത്ത് അർജന്റീനയിലെ മറ്റ് വേഗതയേറിയ കളിക്കാർക്ക് അവസരങ്ങൾ ഒരുക്കാൻ സാധിക്കുന്നുണ്ട്. എന്നാൽ പോർച്ചുഗലിൽ ബ്രൂണോയും വിറ്റിഞ്ഞയും അവസരങ്ങൾ ഒരുക്കുമ്പോൾ, ബോക്സിനുള്ളിൽ റൊണാൾഡോയ്ക്ക് പഴയ ചടുലത പുറത്തെടുക്കാൻ സാധിക്കുന്നില്ല.
മത്സരശേഷം പോർച്ചുഗൽ കോച്ച് റോബർട്ടോ മാർട്ടിനെസ് റൊണാൾഡോയെ 90 മിനിറ്റും കളിപ്പിച്ചതിനെ ന്യായീകരിച്ചു: “ഇതുപോലൊരു മത്സരത്തിൽ, ബോക്സിനുള്ളിലേക്ക് കയറാൻ ബുദ്ധിമുട്ടുന്ന സാഹചര്യത്തിൽ ക്രിസ്റ്റ്യാനോയുടെ ക്വാളിറ്റി ഉപയോഗിക്കേണ്ടത് പ്രധാനമാണ്. നമുക്ക് ഗോൾ ആവശ്യമുള്ള ഒരു മത്സരത്തിൽ ഫുട്ബോൾ ചരിത്രത്തിലെ ഏറ്റവും മികച്ച ഗോൾവേട്ടക്കാരനെ സബ്സ്റ്റിറ്റ്യൂട്ട് ചെയ്യുന്നതിൽ ഒരു അർത്ഥവുമില്ല.”
കോച്ചിന്റെ വാക്കുകൾ ശരിയാണെങ്കിലും അതൊരു വലിയ യാഥാർത്ഥ്യത്തിലേക്ക് വിരൽ ചൂണ്ടുന്നു. മാനസികമായി ശക്തനാണെങ്കിലും ശാരീരികമായി തന്റെ സ്വാഭാവിക ഗെയിം കളിക്കാൻ റൊണാൾഡോയ്ക്ക് ഇപ്പോൾ സാധിക്കുന്നില്ല. പഴയ പ്രതാപത്തിന്റെ നിഴൽ മാത്രമായി മാറിയ റൊണാൾഡോ എന്ന ഈ സൂപ്പർ താരം പോർച്ചുഗലിന്റെ ലോകകപ്പ് സ്വപ്നങ്ങൾക്ക് ഒരു ബലഹീനതയായി മാറുമോ എന്നാണ് ഇപ്പോൾ ഫുട്ബോൾ ലോകം ഉറ്റുനോക്കുന്നത്.
