പ്രശസ്ത ടെലിവിഷൻ അവതാരകനും ‘ക്ലാർക്സൺസ് ഫാം’ താരവുമായ ജെറമി ക്ലാർക്സണ് (66) തീവ്രമായ പ്രോസ്റ്റേറ്റ് കാൻസർ ബാധിച്ചതായി റിപ്പോർട്ട്. ആമസോൺ പ്രൈം വീഡിയോയിലൂടെ പുറത്തിറങ്ങിയ അദ്ദേഹത്തിന്റെ ഷോയുടെ അഞ്ചാം സീരീസിലെ അവസാന എപ്പിസോഡുകളിലാണ് തനിക്ക് കാൻസർ ആണെന്ന വിവരം അദ്ദേഹം സഹപ്രവർത്തകരുമായി പങ്കുവെച്ചത്.
കഴിഞ്ഞ മെയ് മാസം നടന്ന ഒരു മെഡിക്കൽ പരിശോധനയ്ക്കും ബയോപ്സിക്കും ശേഷമാണ് തനിക്ക് കാൻസർ ആണെന്ന് തിരിച്ചറിഞ്ഞതെന്ന് ക്ലാർക്സൺ വെളിപ്പെടുത്തി. കാൻസർ വളരെ അഗ്രസീവ് ആണെങ്കിലും വളരെ നേരത്തെ തന്നെ കണ്ടെത്താൻ കഴിഞ്ഞത് ആശ്വാസകരമാണെന്ന് അദ്ദേഹം പറഞ്ഞു. ഏതാനും ആഴ്ചകൾക്കുള്ളിൽ ശസ്ത്രക്രിയയ്ക്ക് വിധേയനാകുമെന്നും സുഖം പ്രാപിക്കാൻ കുറച്ചു ദിവസങ്ങൾ വേണ്ടി വരുമെന്നും അദ്ദേഹം കൂട്ടിച്ചേർത്തു.
ഈ സാഹചര്യത്തിൽ എന്താണ് പ്രോസ്റ്റേറ്റ് കാൻസർ എന്നും അതിന്റെ പ്രധാന ലക്ഷണങ്ങൾ എന്തൊക്കെയാണെന്നും ഓരോ പുരുഷനും അറിഞ്ഞിരിക്കേണ്ടത് അത്യന്താപേക്ഷിതമാണ്.
എന്താണ് പ്രോസ്റ്റേറ്റ് കാൻസർ?
യുകെയിലെ പുരുഷന്മാർക്കിടയിൽ ഏറ്റവും കൂടുതൽ കണ്ടുവരുന്ന കാൻസറുകളിൽ ഒന്നാണിത്. ഏത് പ്രായത്തിലും ഇത് പിടിപെടാമെങ്കിലും സാധാരണയായി 50 വയസ്സ് കഴിഞ്ഞവരിലാണ് ഇത് കൂടുതൽ കാണപ്പെടുന്നത്. പുരുഷ പ്രത്യുത്പാദന വ്യവസ്ഥയുടെ ഭാഗമായ, മൂത്രസഞ്ചിയുടെ താഴെയായി സ്ഥിതി ചെയ്യുന്ന ‘പ്രോസ്റ്റേറ്റ് ഗ്രന്ഥി’യെ ബാധിക്കുന്ന കാൻസറാണിത്. ഒരു വാൽനട്ടിന്റെ വലുപ്പമുള്ള ഈ ഗ്രന്ഥി പ്രായമാകുന്തോറും വലുതായി വരുന്നു. പ്രോസ്റ്റേറ്റിലെ അസാധാരണ കോശങ്ങൾ അനിയന്ത്രിതമായി വിഭജിച്ച് വളരുകയും മറ്റ് അവയവങ്ങളിലേക്ക് പടരുകയും ചെയ്യുമ്പോഴാണ് ഇത് കാൻസറായി മാറുന്നത്.
നിസ്സാരമായി കാണരുത് ഈ 7 ലക്ഷണങ്ങൾ
പലപ്പോഴും പ്രോസ്റ്റേറ്റ് കാൻസർ തുടക്കത്തിൽ യാതൊരുവിധ ലക്ഷണങ്ങളും കാണിക്കാറില്ല. അതുകൊണ്ടുതന്നെ ലക്ഷണങ്ങൾ ഇല്ലെങ്കിലും ‘പിഎസ്എ ബ്ലഡ് ടെസ്റ്റ്’ വഴി ഇത് നേരത്തെ കണ്ടെത്താനാകും. എന്നാൽ കാൻസർ കോശങ്ങൾ മൂത്രനാളിക്ക് സമീപം വളരുമ്പോൾ മൂത്രമൊഴിക്കുന്നതുമായി ബന്ധപ്പെട്ട് താഴെ പറയുന്ന ലക്ഷണങ്ങൾ പ്രകടമായേക്കാം:
1. ഇടയ്ക്കിടെ മൂത്രമൊഴിക്കാനുള്ള പ്രവണത: പകൽ സമയങ്ങളിൽ അടിക്കടി മൂത്രമൊഴിക്കാൻ തോന്നുകയോ, രാത്രിയിൽ പലതവണ എഴുന്നേൽക്കേണ്ടി വരികയോ ചെയ്യുന്നത് പ്രോസ്റ്റേറ്റ് വീക്കത്തിന്റെയോ യൂറിനറി ഇൻഫെക്ഷന്റെയോ ലക്ഷണമാകാം.
2. മൂത്രമൊഴിക്കാൻ ബുദ്ധിമുട്ട് അനുഭവപ്പെടുക: മൂത്രമൊഴിക്കാൻ തുടങ്ങുമ്പോൾ കടുത്ത തടസ്സമോ പ്രയാസമോ അനുഭവപ്പെടുന്നത് പ്രോസ്റ്റേറ്റ് വീക്കമോ ട്യൂമറോ മൂത്രനാളിയെ തടയുന്നത് കൊണ്ടാകാം.
3. മൂത്രത്തിന്റെ ഒഴുക്ക് കുറയുക: മൂത്രത്തിന്റെ ഒഴുക്ക് വളരെ കുറയുന്ന അവസ്ഥ. ഇത് കാരണം മൂത്രസഞ്ചി പൂർണ്ണമായും ഒഴിഞ്ഞിട്ടില്ലെന്ന തോന്നലുണ്ടാകുകയും വീണ്ടും മൂത്രമൊഴിക്കാൻ തോന്നുകയും ചെയ്യാം.
4. മൂത്രം തുള്ളിയായി പോവുക: മൂത്രമൊഴിച്ചു കഴിഞ്ഞ ശേഷവും നിയന്ത്രണമില്ലാതെ തുള്ളികളായി മൂത്രം പോകുക, അല്ലെങ്കിൽ പെട്ടെന്ന് മൂത്രം നിർത്താൻ ബുദ്ധിമുട്ട് അനുഭവപ്പെടുക.
5. മൂത്രസഞ്ചി ഒഴിഞ്ഞിട്ടില്ലെന്ന തോന്നൽ: മൂത്രമൊഴിച്ച ശേഷവും മൂത്രസഞ്ചിയിൽ വീണ്ടും മൂത്രം കെട്ടിക്കിടക്കുന്നു എന്ന തോന്നൽ ഉണ്ടാകുന്നത് ട്യൂമർ മൂത്ര പ്രവാഹം തടയുന്നത് കൊണ്ടാണ്.
6. മൂത്രത്തിൽ രക്തത്തിന്റെ സാന്നിധ്യം: മൂത്രത്തിൽ നേരിയ അളവിലാണെങ്കിൽ പോലും രക്തം കാണുന്നത് ഗുരുതരമായ ലക്ഷണമാണ്. ഇത് കണ്ടാലുടൻ ഡോക്ടറെ സമീപിക്കണം.
7. ലൈംഗിക പ്രശ്നങ്ങൾ: ഉദ്ധാരണക്കുറവ്, ഉദ്ധാരണം നിലനിർത്താനുള്ള ബുദ്ധിമുട്ട്, വേദനയോടു കൂടിയ സ്ഖലനം, ബീജത്തിൽ രക്തത്തിന്റെ സാന്നിധ്യം, സ്ഖലനം ചെയ്യപ്പെടുന്ന ബീജത്തിന്റെ അളവ് കുറയുക എന്നിവയും ലക്ഷണങ്ങളാണ്.
വിദഗ്ദ്ധ നിർദ്ദേശം: ഈ ലക്ഷണങ്ങൾ കണ്ട് ആരും പരിഭ്രാന്തരാകേണ്ടതില്ല, കാരണം മറ്റ് താൽക്കാലിക പ്രശ്നങ്ങൾ കൊണ്ടും ഇങ്ങനെ സംഭവിക്കാം. എങ്കിലും എന്തെങ്കിലും മാറ്റങ്ങൾ കണ്ടാൽ ഉടൻ തന്നെ ഒരു യൂറോളജിസ്റ്റിനെയോ ജനറൽ ഫിസിഷ്യനെയോ കണ്ട് പരിശോധന നടത്താൻ മടിക്കരുത്.
