ഇന്ത്യൻ ക്രിക്കറ്റ് ചരിത്രത്തിൽ ഏറെ പ്രശസ്തമായ ഒന്നാണ് മുൻ കോച്ച് ജോൺ റൈറ്റും ഓപ്പണർ വിരേന്ദർ സെവാഗും തമ്മിലുണ്ടായിരുന്ന ആത്മബന്ധം. എന്നാൽ പലപ്പോഴും സെവാഗിന്റെ അശ്രദ്ധമായ ബാറ്റിങ് ശൈലി കോച്ചിനെ വല്ലാതെ ദേഷ്യം പിടിപ്പിച്ചിരുന്നു. അത്തരത്തിൽ സെവാഗ് മോശം ഷോട്ട് കളിച്ച് ഔട്ടായപ്പോൾ ഡ്രസ്സിങ് റൂമിൽ വെച്ച് ജോൺ റൈറ്റ് അദ്ദേഹത്തിന്റെ കോളറിൽ കയറിപ്പിടിച്ച ആ പഴയ നാടകീയ സംഭവം വീണ്ടും ചർച്ചയാകുകയാണ്.
തന്റേതായ നിയമങ്ങളും ശൈലികളും പാലിച്ച് മാത്രം ബാറ്റ് ചെയ്യുന്ന താരമായിരുന്നു വിരേന്ദർ സെവാഗ്. എന്നാൽ മത്സരങ്ങളിൽ ഇന്ത്യയ്ക്ക് നല്ലൊരു ഓപ്പണിങ് കൂട്ടുകെട്ട് അത്യാവശ്യമായിരുന്ന ഘട്ടങ്ങളിൽ പോലും സെവാഗ് കാണിക്കുന്ന ഈ അശ്രദ്ധമായ സമീപനം കോച്ച് ജോൺ റൈറ്റിന് വലിയ തലവേദനയായിരുന്നു. അത്തരത്തിൽ ഇന്ത്യയ്ക്ക് മികച്ച തുടക്കം വേണ്ട ഒരു മത്സരത്തിൽ തികച്ചും അലസമായ ഒരു ഷോട്ട് കളിച്ച് സെവാഗ് വിക്കറ്റ് വലിച്ചെറിഞ്ഞു. ഇതോടെ നിയന്ത്രണം നഷ്ടപ്പെട്ട കോച്ച് ജോൺ റൈറ്റ് സഹതാരമായ രാഹുൽ ദ്രാവിഡിന് ഒരു അന്ത്യശാസനം നൽകി: “ഇനി ഒരു തവണ കൂടി ആ ചെക്കൻ മോശം ഷോട്ട് കളിച്ച് ഔട്ടായാൽ ഞാൻ അവന് നല്ലതുപോലെ കൊടുക്കും!. ദ്രാവിഡ് ഈ സന്ദേശം കൃത്യമായി സെവാഗിന് കൈമാറിയെങ്കിലും കോച്ചിന്റെ ഈ ഭീഷണിയെക്കുറിച്ച് സെവാഗ് അത്ര കാര്യമാക്കിയില്ല.
എല്ലാവരും പ്രതീക്ഷിച്ചതുപോലെ തന്നെ, തൊട്ടടുത്ത മത്സരത്തിലും സെവാഗ് തന്റെ ബാറ്റിങ് ശൈലി മാറ്റാൻ തയ്യാറായില്ല. വീണ്ടുമൊരു മോശം ഷോട്ട് കളിച്ച് സെവാഗ് പവലിയനിലേക്ക് മടങ്ങി. ഇതോടെ കോപം അടക്കാനാകാതെ രോഷാകുലനായ ജോൺ റൈറ്റ് ഡ്രസ്സിങ് റൂമിൽ വെച്ച് സെവാഗിന്റെ കോളറിൽ കയറിപ്പിടിക്കുകയും മൈതാനത്തെ അദ്ദേഹത്തിന്റെ ഇത്തരം നാടകീയ പ്രകടനങ്ങൾക്ക് കടുത്ത ഭാഷയിൽ ശാസിക്കുകയും ചെയ്തു. എന്നാൽ ഭാഗ്യവശാൽ, കോച്ചിന്റെ ആ ദേഷ്യത്തെ അതിന്റെ ശരിയായ അർത്ഥത്തിൽ ഉൾക്കൊള്ളാൻ സെവാഗ് തയ്യാറായി. കോച്ചിനോട് താൻ തെറ്റ് സമ്മതിക്കുകയും അടുത്ത തവണ മുതൽ കൂടുതൽ മികച്ച രീതിയിൽ കളിക്കാമെന്ന് ഉറപ്പ് നൽകുകയുമായിരുന്നു.
