ന്യൂഡൽഹി: കേന്ദ്ര ഭക്ഷ്യസംസ്കരണ വകുപ്പ് മന്ത്രിയും ലോക് ജനശക്തി പാർട്ടി (രാം വിലാസ്) അധ്യക്ഷനുമായ ചിരാഗ് പസ്വാന് വധഭീഷണി. തപാലിലൂടെയെത്തിയ അജ്ഞാത സന്ദേശത്തിലാണ് കടുത്ത തീവ്രവാദികൾ ഉടൻ തന്നെ കേന്ദ്രമന്ത്രിയെ കൊലപ്പെടുത്തുമെന്ന മട്ടിലുള്ള ഭീഷണി മുന്നറിയിപ്പുള്ളത്. സംഭവം അതീവ ഗൗരവത്തോടെ കാണുന്നതായി കേന്ദ്രമന്ത്രിയുടെ ഓഫീസ് അറിയിച്ചു.
മന്ത്രിയുടെ ഓഫീസിൽ ലഭിച്ച കത്തിൽ പേരോ മറ്റ് വിവരങ്ങളോ രേഖപ്പെടുത്തിയിട്ടില്ലെങ്കിലും രണ്ട് മൊബൈൽ നമ്പറുകൾ നൽകിയിട്ടുണ്ട്. സന്ദേശം തുറന്നപ്പോഴാണ് മന്ത്രിയുടെ ജീവന് നേരിട്ട് ഭീഷണിയുയർത്തുന്ന വരികൾ ശ്രദ്ധയിൽപ്പെട്ടത്. നിലവിൽ കേന്ദ്ര ആഭ്യന്തര മന്ത്രാലയത്തിന്റെ സീസൺ ‘ഇസെഡ് കാറ്റഗറി’ (Z-Category) സുരക്ഷാ വലയത്തിലുള്ള നേതാവാണ് ചിരാഗ് പസ്വാൻ. എന്നാൽ സന്ദേശത്തിൽ ‘തീവ്രവാദികളുടെ’ പങ്ക് എടുത്തുപറയുന്ന പശ്ചാത്തലത്തിൽ അദ്ദേഹത്തിന്റെ വ്യക്തിഗത സുരക്ഷ വർദ്ധിപ്പിക്കണമെന്ന് ആവശ്യപ്പെട്ട് പസ്വാന്റെ അഡീഷണൽ പ്രൈവറ്റ് സെക്രട്ടറി അലോക് കുമാർ കേന്ദ്ര ആഭ്യന്തര സെക്രട്ടറിക്ക് അടിയന്തര കത്തയച്ചു.
കത്തിന്റെ ഉറവിടത്തെക്കുറിച്ചും സന്ദേശത്തിന്റെ സത്യാവസ്ഥയെക്കുറിച്ചും സമഗ്രമായ അന്വേഷണം നടത്തണമെന്ന് പസ്വാന്റെ ഓഫീസ് ആവശ്യപ്പെട്ടു. തപാലിലൂടെ ലഭിച്ച അസൽ കത്ത് പരിശോധനയ്ക്കായി ആഭ്യന്തര മന്ത്രാലയത്തിന് കൈമാറിയിട്ടുണ്ട്. ബീഹാർ രാഷ്ട്രീയത്തിൽ നിർണ്ണായക സ്വാധീനമുള്ള ചിരാഗ് പസ്വാന് നേരെയുണ്ടായ ഈ വധഭീഷണിയിൽ സുരക്ഷാ ഏജൻസികൾ അന്വേഷണം ആരംഭിച്ചു.
