ഡൽഹിയിലെ ജന്തർ മന്തറിൽ സംഘടിപ്പിച്ച പൗരമാർച്ച് ഡൽഹി പോലീസ് തടയുകയും പ്രമുഖ സാമൂഹിക പ്രവർത്തകൻ യോഗേന്ദ്ര യാദവ്, ഓൾ ഇന്ത്യ സ്റ്റുഡന്റ്സ് അസോസിയേഷൻ (AISA) പ്രസിഡന്റ് നേഹ ബോറ എന്നിവരടക്കമുള്ള നേതാക്കളെ കസ്റ്റഡിയിലെടുക്കുകയും ചെയ്തു. വോട്ടർ പട്ടികയുടെ പ്രത്യേക അതിതീവ്ര പുതുക്കൽ അഥവാ സ്‌പെഷ്യൽ ഇന്റൻസീവ് റിവിഷൻ (SIR) നടപടികൾ നിർത്തിവെക്കണമെന്നും വോട്ട് ചോർച്ച ആരോപണങ്ങളിൽ ചീഫ് ഇലക്ഷൻ കമ്മീഷണർ ജ്ഞാനേഷ് കുമാറിനെ പുറത്താക്കണമെന്നും ആവശ്യപ്പെട്ടായിരുന്നു മാർച്ച്. പട്ടേൽ ചൗക്ക് മെട്രോ സ്റ്റേഷന് സമീപം വെച്ച് സമരാനുകൂലികളെ പോലീസ് തടയുകയും മുൻകൂട്ടി അനുമതി വാങ്ങിയിട്ടില്ലെന്ന് ചൂണ്ടിക്കാട്ടി കസ്റ്റഡിയിലെടുത്ത് ബസുകളിൽ മാറ്റുകയുമായിരുന്നു.
ഇന്ത്യൻ കമ്മ്യൂണിസ്റ്റ് പാർട്ടി (മാർക്സിസ്റ്റ്-ലെനിനിസ്റ്റ്) ലിബറേഷൻ ജനറൽ സെക്രട്ടറി ദീപാങ്കർ ഭട്ടാചാര്യ, സുതാര്യത പ്രവർത്തക അഞ്ജലി ഭരദ്വാജ്, അഭിഭാഷകൻ പ്രശാന്ത് ഭൂഷൺ, മുൻ ഡൽഹി സർവകലാശാല പ്രൊഫസർ നന്ദിത നരെയ്ൻ തുടങ്ങിയ പ്രമുഖരും പ്രതിഷേധത്തിൽ പങ്കെടുത്തു. ഡൽഹി ഉൾപ്പെടെയുള്ള മേഖലകളിൽ ലക്ഷക്കണക്കിന് വോട്ടർമാരുടെ പേരുകൾ നിഗൂഢമായി നീക്കം ചെയ്തതിനെതിരെ സാധാരണ പൗരന്മാരും വിദ്യാർത്ഥികളും ഒന്നിച്ചാണ് തെരുവിലിറങ്ങിയത്. കുറ്റവാളികളെ പിടികൂടുന്നതിന് പകരം വോട്ട് കള്ളന്മാരെ സംരക്ഷിക്കാനാണ് പോലീസ് തങ്ങളെ കസ്റ്റഡിയിലെടുക്കുന്നതെന്ന് അറസ്റ്റ് വരിക്കുന്നതിനിടെ യോഗേന്ദ്ര യാദവ് മാധ്യമങ്ങളോട് ആരോപിച്ചു.
തിരഞ്ഞെടുപ്പ് കമ്മീഷന്റെ ഏകപക്ഷീയമായ നടപടികൾ തുറന്നുകാട്ടപ്പെട്ടതിനെത്തുടർന്ന് ഭരണകൂടം ഭയന്നിരിക്കുകയാണെന്ന് സുപ്രീം കോടതി അഭിഭാഷകൻ പ്രശാന്ത് ഭൂഷൺ വിമർശിച്ചു. ജനങ്ങളുടെ ജനാധിപത്യ അവകാശങ്ങളും ഭരണഘടനാ തത്ത്വങ്ങളും സംരക്ഷിക്കാനാണ് ഈ പോരാട്ടമെന്ന് പ്രതിഷേധക്കാർ വ്യക്തമാക്കി. സമരം ശക്തമായതിനെ തുടർന്ന് ജന്തർ മന്തറിലും പരിസര പ്രദേശങ്ങളിലും സുരക്ഷാ ക്രമീകരണങ്ങൾ വൻതോതിൽ വർദ്ധിപ്പിക്കുകയും ബാരിക്കേഡുകൾ ഉയർത്തി പ്രദേശം പോലീസ് പൂർണ്ണമായി ഉപരോധിക്കുകയും ചെയ്തിട്ടുണ്ട്.
