സ്വകാര്യ റേഞ്ച് റോവർ ഉപയോഗവുമായി ബന്ധപ്പെട്ട വിവാദത്തിൽ വിശദീകരണവുമായി തദ്ദേശഭരണ മന്ത്രി കെ എം ഷാജി. റേഞ്ച് റോവറിന് സമീപം ചാരി നിൽക്കുന്ന രീതിയിൽ മാധ്യമങ്ങളിലും സമൂഹമാധ്യമങ്ങളിലും പ്രചരിച്ച തന്റെ ചിത്രം എഐ ഉപയോഗിച്ച് നിർമിച്ച വ്യാജ ചിത്രമാണെന്ന് ഷാജി ആരോപിച്ചു. ചിത്രം പ്രസിദ്ധീകരിക്കുന്നതിന് മുമ്പ് അതിന്റെ ആധികാരികത പരിശോധിക്കേണ്ടിയിരുന്നുവെന്നും മന്ത്രി മാധ്യമങ്ങളോട് പറഞ്ഞു.
പ്രചരിച്ച ചിത്രം മാധ്യമപ്രവർത്തകരെ കാണിച്ചുകൊണ്ടായിരുന്നു ഷാജിയുടെ പ്രതികരണം. ചിത്രത്തിൽ താൻ നിൽക്കുന്ന രീതിയും സ്വാഭാവികമല്ലെന്നും ഇത്തരം ചിത്രം പ്രസിദ്ധീകരിക്കുന്നതിന് മുമ്പ് അത് യഥാർഥമാണോ എഐ നിർമിതമാണോ എന്ന് പരിശോധിക്കാനുള്ള ഉത്തരവാദിത്തം മാധ്യമങ്ങൾക്കുണ്ടെന്നും അദ്ദേഹം പറഞ്ഞു. തന്റെ ചിത്രം വ്യാജമായി പ്രചരിപ്പിക്കുന്നത് ശരിയായ മാധ്യമപ്രവർത്തനമല്ലെന്നും ഷാജി വ്യക്തമാക്കി.
അതേസമയം, സ്വകാര്യ വാഹനം ഔദ്യോഗിക ആവശ്യങ്ങൾക്ക് ഉപയോഗിക്കുന്നതിൽ തെറ്റില്ലെന്ന നിലപാടും ഷാജി ആവർത്തിച്ചു. സുഹൃത്തിന്റെ ഉടമസ്ഥതയിലുള്ള റേഞ്ച് റോവർ കുറച്ചുകാലമായി താൻ ഉപയോഗിച്ചുവരികയാണെന്നും മന്ത്രിയായതിന് ശേഷമാണ് ആദ്യമായി വാഹനം ഉപയോഗിച്ചതെന്ന പ്രചാരണം ശരിയല്ലെന്നും അദ്ദേഹം പറഞ്ഞു. അഴീക്കോട് എംഎൽഎയായിരുന്ന കാലത്തും വാഹനം ഉപയോഗിച്ചിട്ടുണ്ടെന്നും ആവശ്യമായ നടപടിക്രമങ്ങൾ പാലിച്ചാണ് ഉപയോഗിച്ചതെന്നുമാണ് ഷാജിയുടെ വിശദീകരണം.
മന്ത്രിയുടെ ഔദ്യോഗിക വാഹനത്തിന് പകരം സ്വകാര്യ വ്യക്തിയുടെ റേഞ്ച് റോവർ ഉപയോഗിച്ചതാണ് നിലവിലെ വിവാദത്തിന് കാരണമായത്. സർക്കാർ അനുവദിച്ച ഔദ്യോഗിക വാഹനമായ ഇന്നോവ ക്രിസ്റ്റയ്ക്ക് പകരമാണ് സുഹൃത്തിന്റെ വാഹനം ഉപയോഗിച്ചതെന്ന് റിപ്പോർട്ടുകൾ പറയുന്നു. വിവാദം ശക്തമായതിന് പിന്നാലെ റേഞ്ച് റോവർ ഉടമയ്ക്ക് തിരികെ നൽകുകയും ചെയ്തിരുന്നു.
