കരിങ്കൊടി പ്രതിഷേധങ്ങൾ സംസ്ഥാനത്ത് വലിയ രാഷ്ട്രീയ പാരമ്യത്തിലെത്തി നിൽക്കെ, കൊല്ലത്ത് കേന്ദ്ര ആഭ്യന്തരമന്ത്രി അമിത് ഷായ്ക്കെതിരെ യൂത്ത് കോൺഗ്രസ് നടത്തിയ പ്രതിഷേധത്തിൽ മുഖ്യമന്ത്രിക്കും സംസ്ഥാന ആഭ്യന്തരമന്ത്രിക്കും കടുത്ത അതൃപ്തി. യാതൊരുവിധ മുന്നൊരുക്കങ്ങളുമില്ലാതെ നടത്തിയ ഈ സമരം സംസ്ഥാനത്ത് അനാവശ്യമായ ക്രമസമാധാന പ്രശ്നങ്ങൾക്കും പ്രതിഷേധങ്ങൾക്കും വഴിവെച്ചെന്നാണ് വിലയിരുത്തൽ.
കെ.സി. വേണുഗോപാൽ പക്ഷ നേതാക്കൾ മുതിർന്ന നേതാക്കളുമായി കൂടിയാലോചിക്കാതെ ഏകപക്ഷീയമായി എടുത്ത തീരുമാനമാണിതെന്ന് കോൺഗ്രസിനുള്ളിലെ ഒരു വിഭാഗം നേതാക്കൾ ആരോപിക്കുന്നു. ബിനു ചുള്ളിയലിന്റെ നേതൃത്വത്തിൽ നടന്ന ഈ നീക്കം രാഷ്ട്രീയമായി അപക്വമായിപ്പോയെന്നും, ബിജെപിക്ക് പ്രതിഷേധിക്കാനുള്ള അവസരം ഒരുക്കിക്കൊടുത്തുവെന്നുമാണ് പാർട്ടിക്കുള്ളിലെ പ്രധാന വിമർശനം.
അമിത് ഷായ്ക്കെതിരായ പ്രതിഷേധത്തിന് പിന്നാലെ സംസ്ഥാനത്തുടനീളം വലിയ തിരിച്ചുപടിയുമായി യുവമോർച്ച രംഗത്തിറങ്ങിയിട്ടുണ്ട്. മന്ത്രിമാർക്കും യുഡിഎഫ് നേതാക്കൾക്കും നേരെ യുവമോർച്ചാ പ്രവർത്തകർ വ്യാപകമായി കരിങ്കൊടി കാട്ടുകയും വാഹനവ്യൂഹം തടയുകയും ചെയ്തു. കോഴിക്കോട്ട് ആഭ്യന്തരമന്ത്രി രമേശ് ചെന്നിത്തലയുടെയും വയനാട് എംപി പ്രിയങ്ക ഗാന്ധിയുടെയും വാഹനവ്യൂഹം യുവമോർച്ച പ്രവർത്തകർ തടഞ്ഞത് വൻ സംഘർഷാവസ്ഥ സൃഷ്ടിച്ചു.
കൂടാതെ കൊല്ലത്ത് മന്ത്രിമാരായ പി.സി. വിഷ്ണുനാഥ്, കെ. മുരളീധരൻ എന്നിവർക്ക് നേരെയും കണ്ണൂരിൽ മന്ത്രി സണ്ണി ജോസഫിന് നേരെയും പ്രതിഷേധം അണപൊട്ടി. കണ്ണൂർ കൊട്ടിയൂർ പഞ്ചായത്ത് ഹാളിലെ ചടങ്ങ് കഴിഞ്ഞ് മടങ്ങുമ്പോഴാണ് സണ്ണി ജോസഫിന് നേരെ യുവമോർച്ച പ്രവർത്തകർ കരിങ്കൊടിയേന്തിയത്. ഈ സംഭവ വികാസങ്ങളോടെ സംസ്ഥാനത്ത് ഭരണ-പ്രതിപക്ഷ യുവജന സംഘടനകൾ തമ്മിലുള്ള പോര് രൂക്ഷമായിരിക്കുകയാണ്.
