പാശ്ചാത്യ ഉപരോധങ്ങളും ഒറ്റപ്പെടലും നേരിടുന്ന പശ്ചാത്തലത്തിൽ, ഇന്ത്യയുൾപ്പെടെയുള്ള പ്രമുഖ ഏഷ്യൻ പങ്കാളികളുമായി സഹകരണം ശക്തമാക്കാൻ റഷ്യൻ പ്രസിഡന്റ് വ്ളാദിമിർ പുടിൻ മുൻകൈയെടുക്കുന്നു. റഷ്യയിലെ മോസ്കോയിൽ നടന്ന വാൽഡായ് ഫോറത്തിൽ സംസാരിക്കവേ, ഉത്തരാഫ്രിക്കയെയും യൂറോപ്പിനെയും ഏഷ്യയുമായി ബന്ധിപ്പിക്കുന്ന അന്താരാഷ്ട്ര വടക്ക്-തെക്ക് ഗതാഗത ഇടനാഴിയുടെ പ്രാധാന്യത്തെ പുടിൻ പ്രത്യേകമായി എടുത്തുപറഞ്ഞു. ചൈനയുമായും ദക്ഷിണ കൊറിയയുമായും സമുദ്രമേഖലയിൽ സഹകരിക്കുന്നതിനൊപ്പം തന്നെ ഈ പദ്ധതിയുമായി ബന്ധപ്പെട്ട് ഇന്ത്യൻ സുഹൃത്തുക്കളുമായി ചർച്ചകൾ പുരോഗമിക്കുകയാണെന്നും അദ്ദേഹം വ്യക്തമാക്കി. വൻ സാധ്യതകളുള്ള അന്താരാഷ്ട്ര ഇടനാഴികൾ സംയുക്തമായി ഉപയോഗിക്കുന്നതിനെ റഷ്യ പിന്തുണയ്ക്കുന്നുവെന്നും അദ്ദേഹം കൂട്ടിച്ചേർത്തു.
എന്നാൽ ഈ ഇടനാഴി പൂർണ്ണമായും പ്രവർത്തനക്ഷമമാക്കുന്നതിൽ റഷ്യയ്ക്ക് മാത്രം മുൻകൈയെടുക്കാൻ കഴിയില്ലെന്നും ഇറാൻ ഉൾപ്പെടെയുള്ള രാജ്യങ്ങൾ അവരുടെ ഭാഗം പൂർത്തിയാക്കേണ്ടതുണ്ടെന്നും പുടിൻ ചൂണ്ടിക്കാട്ടി. ആവശ്യമായ സാമ്പത്തിക വായ്പകൾ നൽകാൻ റഷ്യ തയ്യാറാണെന്ന് അറിയിച്ച അദ്ദേഹം, റൂട്ടിൽ വരുന്ന അസർബൈജാനുമായി തടസ്സങ്ങളൊന്നുമില്ലെന്നും പ്രസിഡന്റ് അലിയേവ് പദ്ധതിയുമായി സഹകരിക്കുന്നുണ്ടെന്നും സ്ഥിരീകരിച്ചു. ലോജിസ്റ്റിക്സിൽ മാത്രമല്ല, ഇന്ത്യയുമായി മറ്റ് മേഖലകളിലും വൻ സാമ്പത്തിക സഹകരണ സാധ്യതകളുണ്ടെന്ന് റഷ്യൻ പ്രസിഡന്റ് സൂചന നൽകി.
ദക്ഷിണേഷ്യയെ മധ്യേഷ്യയും കോക്കസസും റഷ്യയും വഴി യൂറോപ്പുമായി ബന്ധിപ്പിക്കുന്ന കപ്പൽ, റെയിൽ, റോഡ് ശൃംഖലയാണ് ഇന്റർനാഷണൽ നോർത്ത്-സൗത്ത് ട്രാൻസ്പോർട്ട് കോറിഡോർ . ഇന്ത്യയിൽ നിന്നുള്ള ചരക്കുകൾ ഇറാനിലെ ചബഹാർ തുറമുഖം വഴി റഷ്യയിലേക്കും തുടർന്ന് വടക്കൻ യൂറോപ്പിലേക്കും എത്തിക്കുന്നതാണ് പദ്ധതി.
2001-ൽ ഇന്ത്യയും റഷ്യയും ഇറാനും ചേർന്ന് ഒപ്പുവെച്ച ഈ പദ്ധതിയിൽ പിന്നീട് അസർബൈജാൻ, അർമേനിയ, കസാഖിസ്താൻ, തുർക്കി, ഒമാൻ തുടങ്ങിയ നിരവധി രാജ്യങ്ങൾ പങ്കാളികളായി. 2022 ജൂലൈയിൽ വാണിജ്യ ചരക്കുനീക്കം ആരംഭിച്ച് സുപ്രധാന നാഴികക്കല്ല് പിന്നിട്ടെങ്കിലും, നിലവിലെ റഷ്യ-ഉക്രെയ്ൻ യുദ്ധവും യുഎസ്-ഇസ്രായേൽ നിരന്തര സംഘർഷങ്ങളും കാരണം ഇറാന്റെ സുരക്ഷാ അന്തരീക്ഷം സങ്കീർണ്ണമായതും പദ്ധതി പൂർണ്ണതോതിൽ നടപ്പിലാക്കുന്നതിന് വെല്ലുവിളിയാകുന്നുണ്ട്.
