കരിങ്കടലിൽ ധാന്യങ്ങളുമായി സഞ്ചരിക്കുകയായിരുന്ന വാണിജ്യ കപ്പലിന് നേരെ ഉണ്ടായ ആക്രമണത്തിൽ ഇന്ത്യ കടുത്ത ഉത്കണ്ഠ രേഖപ്പെടുത്തി. തുർക്കി ഉടമസ്ഥതയിലുള്ള ‘എംവി റോയാദ് മമ്മദോവ്’ എന്ന ചരക്കുകപ്പലിന് നേരെയാണ് ഡ്രോൺ ആക്രമണം ഉണ്ടായത്. കപ്പലിൽ ഉണ്ടായിരുന്ന മൂന്ന് ഇന്ത്യൻ പൗരന്മാരും സുരക്ഷിതരാണെന്ന് കേന്ദ്ര വിദേശകാര്യ മന്ത്രാലയം ഔദ്യോഗികമായി സ്ഥിരീകരിച്ചു. ആക്രമണത്തിൽ കപ്പലിലെ ക്യാപ്റ്റൻ ഉൾപ്പെടെ രണ്ട് വിദേശ നാവികർ കൊല്ലപ്പെടുകയും ചില ജീവനക്കാർക്ക് പരിക്കേൽക്കുകയും ചെയ്തു.
യുക്രെയ്നിലെ ഇസ്മായിൽ തുറമുഖത്തുനിന്ന് ഇറ്റലിയിലേക്ക് മക്കച്ചോളവുമായി പോവുകയായിരുന്ന കപ്പലാണ് അന്താരാഷ്ട്ര സമുദ്രപാതയിൽ വെച്ച് ആക്രമിക്കപ്പെട്ടത്. അപകടത്തിൽ പരിക്കേറ്റ ഒരു ഇന്ത്യക്കാരൻ ഉൾപ്പെടെയുള്ള ജീവനക്കാരെ റൊമാനിയൻ കോസ്റ്റ് ഗാർഡും വ്യോമസേനയും ചേർന്ന് രക്ഷപ്പെടുത്തി ആശുപതിയിലേക്ക് മാറ്റി. റൊമാനിയയിലെ കോൺസ്റ്റാന്റ ആശുപത്രിയിൽ ചികിത്സയിലുള്ള ഇന്ത്യക്കാരെ റൊമാനിയയിലെ ഇന്ത്യൻ അംബാസഡർ മനോജ് മോഹപത്ര നേരിട്ട് സന്ദർശിച്ച് ആവശ്യമായ സഹായങ്ങൾ ഉറപ്പാക്കിയിട്ടുണ്ട്. സമയബന്ധിതമായി രക്ഷാപ്രവർത്തനം നടത്തുകയും മികച്ച വൈദ്യസഹായം നൽകുകയും ചെയ്ത റൊമാനിയൻ ഭരണകൂടത്തിന് ഇന്ത്യ നന്ദി അറിയിച്ചു.
അന്താരാഷ്ട്ര സമുദ്രപാതകളിലെ വാണിജ്യ കപ്പലുകൾക്ക് നേരെ നടക്കുന്ന ഇത്തരം ആക്രമണങ്ങൾ ആഗോള വ്യാപാരത്തെയും ജനങ്ങളുടെ ക്ഷേമത്തെയും സാരമായി ബാധിക്കുമെന്ന് ഇന്ത്യ മുന്നറിയിപ്പ് നൽകി. സമുദ്ര മേഖലയിലെ സുരക്ഷ ഉറപ്പാക്കാനും സംഘർഷങ്ങൾ അവസാനിപ്പിക്കാനും നയതന്ത്ര ചർച്ചകളിലൂടെ പരിഹാരം കാണണമെന്ന് വിദേശകാര്യ മന്ത്രി എസ്. ജയശങ്കർ വ്യക്തമാക്കി. സംഘർഷ സാധ്യത നിലനിൽക്കുന്ന മേഖലകളിലൂടെ യാത്ര ചെയ്യുന്ന കപ്പലുകൾക്കും നാവികർക്കും സുരക്ഷ ഉറപ്പാക്കാൻ അന്താരാഷ്ട്ര സമൂഹം കർശന നടപടി സ്വീകരിക്കണമെന്ന് ഇന്ത്യ ആവശ്യപ്പെട്ടു.
