എം.എസ്. ധോണിയെക്കുറിച്ച് തനിക്കുണ്ടായിരുന്ന ആദ്യ ധാരണയെക്കുറിച്ചും തന്റെ കരിയറിനെക്കുറിച്ചും മനസ്സ് തുറന്ന് മുൻ ഇന്ത്യൻ വിക്കറ്റ് കീപ്പർ പാർത്ഥിവ് പട്ടേൽ. മുൻ താരം ആകാശ് ചോപ്രയോടൊപ്പമുള്ള പോഡ്‌കാസ്റ്റിലാണ് പാർത്ഥിവ് ഈ കാര്യങ്ങൾ വെളിപ്പെടുത്തിയത്. 2004-ലെ ബോർഡർ-ഗവാസ്കർ ട്രോഫിക്ക് മുന്നോടിയായി ബാംഗ്ലൂരിൽ നടന്ന പരിശീലന മത്സരത്തിലാണ് ധോണിയെ താൻ ആദ്യമായി കാണുന്നതെന്നും, സഹീർ ഖാന്റെ ബൗൺസറിൽ ധോണി പുറത്തായപ്പോൾ ആളുകൾ അനാവശ്യമായാണ് അദ്ദേഹത്തെ പ്രശംസിക്കുന്നതെന്ന് താൻ കരുതിയെന്നും പാർത്ഥിവ് ഓർത്തെടുത്തു.
എന്നാൽ മാസങ്ങൾക്ക് ശേഷം ഡിയോധർ ട്രോഫിയിലും ചലഞ്ചർ ട്രോഫിയിലും ധോണി നടത്തിയ കൂറ്റൻ സിക്സറുകളും 50-60 പന്തിൽ നേടിയ സെഞ്ചുറികളും കണ്ട് ആ ധാരണ പൂർണ്ണമായും മാറിയതായി പാർത്ഥിവ് വ്യക്തമാക്കി. 2006-ലെ ഫൈസലാബാദ് ടെസ്റ്റിൽ പാകിസ്താനെതിരെ ധോണി നേടിയ 148 റൺസിന്റെ തകർപ്പൻ പ്രകടനത്തോടെ ഇന്ത്യയുടെ ഒന്നാം നമ്പർ വിക്കറ്റ് കീപ്പർ സ്ഥാനത്ത് തന്റെ സാധ്യതകൾ അവസാനിച്ചതായി പാർത്ഥിവ് തിരിച്ചറിഞ്ഞു. എന്നാൽ തന്റെ കരിയർ പ്രതീക്ഷിച്ച രീതിയിൽ മുന്നോട്ട് പോകാതിരുന്നതിന് ധോണിയെ കുറ്റപ്പെടുത്തില്ലെന്ന് 17-ാം വയസ്സിൽ ഇന്ത്യയ്ക്കായി അരങ്ങേറിയ പാർത്ഥിവ് കൂട്ടിച്ചേർത്തു.
സ്വന്തം പ്രകടനത്തിലെ മോശം ഘട്ടമാണ് തനിക്ക് സ്ഥാനം നഷ്ടമാക്കിയത്. ധോണി തങ്ങളേക്കാൾ വളരെ ഉയർന്ന തലത്തിലായിരുന്നതിനാൽ താൻ ഒരിക്കലും അദ്ദേഹവുമായി മത്സരത്തിന് മുതിർന്നിട്ടില്ലെന്നും, രണ്ടാം വിക്കറ്റ് കീപ്പർ സ്ഥാനത്തിനായി മാത്രമായിരുന്നു മറ്റുള്ളവരുടെ പോരാട്ടമെന്നും പാർത്ഥിവ് ഓർത്തെടുത്തു. 21-ാം വയസ്സിലാണ് അരങ്ങേറ്റം കുറിച്ചിരുന്നതെങ്കിൽ ഒരുപക്ഷേ ധോണിയുടെ വരവോടെ തനിക്ക് ഇന്ത്യയ്ക്കായി കളിക്കാൻ പോലും സാധിക്കുമായിരുന്നില്ലെന്നും താരം തമാശരൂപേണ പറഞ്ഞു.
