അഫ്ഗാനിസ്ഥാൻ മണ്ണിൽ നിന്ന് പാകിസ്ഥാനിലേക്ക് തുടർച്ചയായി നടക്കുന്ന ഭീകരാക്രമണങ്ങൾ തടഞ്ഞില്ലെങ്കിൽ ഭാവിയിൽ അഫ്ഗാൻ താലിബാന്റെ ഭരണം തന്നെ തകരുമെന്ന മുന്നറിയിപ്പുമായി പാകിസ്ഥാൻ. അഫ്ഗാനിസ്ഥാനിൽ നിന്ന് പ്രവർത്തിക്കുന്ന തെഹ്‌രീക്-ഇ-താലിബാൻ പാകിസ്ഥാൻ (TTP), ബലൂചുസ്ഥാൻ ലിബറേഷൻ ആർമി (BLA) എന്നീ ഭീകര സംഘടനകളെ തടയാൻ താലിബാൻ ഭരണകൂടം പരാജയപ്പെട്ടുവെന്ന് ആരോപിച്ചാണ് പാക് വിദേശകാര്യ മന്ത്രി ഇഷാഖ് ദാർ രംഗത്തെത്തിയത്. അതിർത്തി കടന്നുള്ള ആക്രമണങ്ങൾ തടയാൻ ഉടൻ നടപടി സ്വീകരിക്കണമെന്ന് ആവശ്യപ്പെട്ട പാകിസ്ഥാൻ, അയൽരാജ്യങ്ങൾ തമ്മിലുള്ള നല്ല ബന്ധം എന്നത് പരസ്പരമുള്ള ഉത്തരവാദിത്തമാണെന്നും നിരന്തരം ആക്രമണങ്ങൾ സഹിക്കാൻ കഴിയില്ലെന്നും വ്യക്തമാക്കി.
അഫ്ഗാൻ ഇടക്കാല പ്രധാനമന്ത്രി മുല്ല മുഹമ്മദ് ഹസൻ അഖുന്തുമായി നടത്തിയ കൂടിക്കാഴ്ചയിലാണ് ഇഷാഖ് ദാർ താലിബാന് ഈ മുന്നറിയിപ്പ് നൽകിയത്. 2021-ൽ താലിബാൻ അഫ്ഗാനിസ്ഥാന്റെ ഭരണം പിടിച്ചെടുത്തതിന് ശേഷം ഭാരതീയ ഉപഭൂഖണ്ഡത്തിലെ അൽ ഖ്വയ്ദ, ടിടിപി ഉൾപ്പെടെയുള്ള ഭീകരർക്ക് അവിടെ സുരക്ഷിത താവളങ്ങൾ ലഭിച്ചുവെന്നാണ് പാകിസ്ഥാൻ ആരോപിക്കുന്നത്. 6000-ത്തിലധികം ടിടിപി ഭീകരർ ഉൾപ്പെടെ ഇരുപതിനായിരത്തോളം കേഡറുകൾ നിലവിൽ അഫ്ഗാനിസ്ഥാനിൽ തമ്പടിച്ചിരിക്കുകയാണെന്ന് പാക് വിവരാവകാശ മന്ത്രി അതാഉള്ള തരാറും വ്യക്തമാക്കി. ഈ വർഷം ജനുവരി മുതൽ അഫ്ഗാൻ കേന്ദ്രീകരിച്ച് നടന്ന 2,800-ലധികം ഭീകരാക്രമണങ്ങളിൽ മുന്നൂറോളം പേർ കൊല്ലപ്പെടുകയോ പരിക്കേൽക്കുകയോ ചെയ്തിട്ടുണ്ട്.
വ്യാപാര ബന്ധങ്ങൾ മെച്ചപ്പെടുത്താനും പാകിസ്ഥാനെയും മധ്യേഷ്യയെയും ബന്ധിപ്പിക്കുന്ന റെയിൽവേ ലൈൻ യാഥാർത്ഥ്യമാക്കാനും അഫ്ഗാനിസ്ഥാനെ പാകിസ്ഥാൻ സഹായിക്കുന്നുണ്ടെങ്കിലും സുരക്ഷാ കാര്യങ്ങളിൽ താലിബാൻ പൂർണ്ണമായും പരാജയപ്പെടുകയാണെന്ന് പാക് മന്ത്രിമാർ ആരോപിച്ചു. 2,600 കിലോമീറ്ററിലധികം ദൈർഘ്യമുള്ള അതിർത്തിയിൽ 95 ശതമാനം വേലി നിർമ്മാണം പൂർത്തിയാക്കിയിട്ടും മലനിരകൾ വഴി ഭീകരർ പാകിസ്ഥാനിലേക്ക് അതിക്രമിച്ചു കയറി സൈനികരെയും സാധാരണക്കാരെയും ആക്രമിക്കുകയാണ്. നിലവിൽ അഫ്ഗാനിസ്ഥാന് നൽകുന്ന നയതന്ത്ര പിന്തുണയും സാമ്പത്തിക സഹായങ്ങളും അവസാനിപ്പിക്കേണ്ടി വരുമെന്നും പാകിസ്ഥാൻ ഭീഷണിപ്പെടുത്തിയിട്ടുണ്ട്.
