2027 ഏകദിന ലോകകപ്പിനുള്ള ഇന്ത്യൻ ടീമിൽ ആരൊക്കെ ഇടംപിടിക്കണം? രോഹിത് ശർമയും വിരാട് കോഹ്‌ലിയും മുഹമ്മദ് ഷമിയും ഉൾപ്പെടുന്ന സ്വപ്ന ടീമിനായി ആരാധകർക്കിടയിൽ ചർച്ചകൾ സജീവമാണ്. യുവതാരങ്ങളെയും പരിചയസമ്പന്നരായ മുൻനിര താരങ്ങളെയും ഒരുപോലെ ഉൾപ്പെടുത്തി കരുത്തുറ്റ ടീമിനെ അണിനിരത്തണമെന്നാണ് ആരാധകരുടെ ആവശ്യം.
ആരാധകർ ആഗ്രഹിക്കുന്ന 15 അംഗ ടീമിൽ ശുഭ്മൻ ഗില്ലിനാണ് നായകസ്ഥാനം. രോഹിത് ശർമയും വിരാട് കോഹ്‌ലിയും മുൻനിര ബാറ്റർമാരായി ടീമിലുണ്ടാകണം. മധ്യനിരയിൽ ശ്രേയസ് അയ്യരും വിക്കറ്റ് കീപ്പർമാരായി കെ.എൽ. രാഹുൽ, റിഷഭ് പന്ത്, ഇഷാൻ കിഷൻ എന്നിവരും ഇടംപിടിക്കണമെന്നാണ് ഈ സ്വപ്ന ടീമിന്റെ നിർദേശം.
ഓൾറൗണ്ടർമാരായി ഹാർദിക് പാണ്ഡ്യ, അക്ഷർ പട്ടേൽ, നിതീഷ് കുമാർ റെഡ്ഡി എന്നിവരെയാണ് പരിഗണിക്കുന്നത്. ഒരു കാലത്ത് ഇന്ത്യയുടെ നമ്പർ 1 ഓൾ റൗണ്ടർ ആയിരുന്ന ജഡേജ നിലവിൽ ഫോർമാറ്റിൽ മോശം ഫോമിലൂടെ കടന്നുപോകുന്നതിനാൽ ടീമിൽ ഉൾപ്പെട്ടിട്ടില്ല. സ്പിൻ വിഭാഗത്തിൽ കുൽദീപ് യാദവിനും ഇടം നൽകുന്നു. പേസ് നിരയിൽ ജസ്പ്രീത് ബുംറ, മുഹമ്മദ് സിറാജ്, മുഹമ്മദ് ഷമി, ഭുവനേശ്വർ കുമാർ എന്നിവരെയും ഉൾപ്പെടുത്തിയിട്ടുണ്ട്. ബാറ്റിങ് ആഴം, ഓൾറൗണ്ട് മികവ്, പരിചയസമ്പന്നമായ പേസ് നിര എന്നിവയിലൂടെ സമതുലിതമായ ടീമിനെ സൃഷ്ടിക്കുകയാണ് ഈ തിരഞ്ഞെടുപ്പിന്റെ ലക്ഷ്യം.
അതേസമയം, ഇത് ആരാധകർ ആഗ്രഹിക്കുന്ന സ്വപ്ന ടീം മാത്രമാണ്; 2027 ലോകകപ്പിനുള്ള ഔദ്യോഗിക ഇന്ത്യൻ ടീം പ്രഖ്യാപനമല്ല. ലോകകപ്പിന് മുമ്പുള്ള താരങ്ങളുടെ ഫോം, ഫിറ്റ്നസ്, പരിക്കുകൾ, ടീം മാനേജ്‌മെന്റിന്റെ തന്ത്രങ്ങൾ എന്നിവയായിരിക്കും അന്തിമ തിരഞ്ഞെടുപ്പിൽ നിർണായകമാകുക.
