ബഹിരാകാശത്തും പോരാട്ടം! യുക്രെയ്നെ സഹായിക്കുന്ന യുഎസ് ഉപഗ്രഹത്തെ തൊട്ടടുത്തുചെന്ന് ‘വിരട്ടി’ റഷ്യൻ സാറ്റലൈറ്റ്

വാഷിങ്ടൻ: വർഷങ്ങളായി തുടരുന്ന റഷ്യ–യുക്രെയ്ൻ യുദ്ധം വ്യാപിച്ച് ബഹിരാകാശത്തേക്കും നീളുന്നതായി ആശങ്ക. യുക്രെയ്ൻ സൈന്യത്തിന് നിർണായക വിവരങ്ങളും ഉപഗ്രഹ ചിത്രങ്ങളും നൽകുന്ന അമേരിക്കൻ വാണിജ്യ ഉപഗ്രഹത്തെ റഷ്യൻ സൈനിക ഉപഗ്രഹം അപായകരമായ രീതിയിൽ പിൻതുടരുകയും ഭീഷണി ഉയർത്തുകയും ചെയ്യുന്നതായി ബഹിരാകാശ നിരീക്ഷണ ഏജൻസികൾ മുന്നറിയിപ്പ് നൽകി.

റഷ്യൻ വ്യോമസേനയുടെ ‘കോസ്‌മോസ് 2612’ (Kosmos-2612) എന്ന സൈനിക ഉപഗ്രഹമാണ് അമേരിക്കൻ കമ്പനിയുടെ ‘ഐസിഇവൈഇ–എക്സ്36’ (ICEYE-X36) എന്ന ഉപഗ്രഹത്തിന് തൊട്ടടുത്തേക്ക് പാഞ്ഞെത്തിയത്. വെറും മൂന്ന് മൈൽ (ഏകദേശം 4.8 കിലോമീറ്റർ) മാത്രം അകലത്തിലാണ് റഷ്യൻ ഉപഗ്രഹം ഇതിനെ പിന്തുടർന്ന് ട്രാക്ക് ചെയ്യുന്നത്. വ്യാഴാഴ്ച വരെ ഇരു ഉപഗ്രഹങ്ങളും തമ്മിൽ 200 മൈലിലധികം അകലമുണ്ടായിരുന്ന സ്ഥാനത്താണ് ഒറ്റദിവസം കൊണ്ട് റഷ്യൻ ഉപഗ്രഹം ഓർബിറ്റ് മാറ്റി അപകടകരമാംവിധം അടുത്തേക്ക് എത്തിയത്. രാജ്യാന്തര ബഹിരാകാശ നിരീക്ഷണ ഏജൻസിയായ ആക്‌സിയോസ് ആണ് ഈ വിവരങ്ങൾ പുറത്തുവിട്ടത്.

ഫിൻലാൻഡ് ആസ്ഥാനമായി പ്രവർത്തിക്കുന്ന പ്രമുഖ മൈക്രോസാറ്റലൈറ്റ് നിർമാതാക്കളായ ഐസിഇവൈഇ (ICEYE) കമ്പനിയുടെ യുഎസ് വിഭാഗത്തിന്റേതാണ് ആക്രമണ ഭീഷണി നേരിടുന്ന എക്സ്-36 ഉപഗ്രഹം. രാത്രിയെന്നോ പകലെന്നോ വ്യത്യാസമില്ലാതെയും കനത്ത മേഘാവൃതമായ പ്രതികൂല കാലാവസ്ഥയിലും ഭൗമോപരിതലത്തിലെ അതിസൂക്ഷ്മ ചിത്രങ്ങൾ പകർത്തി നൽകാൻ ശേഷിയുള്ള സിന്തറ്റിക് അപ്പർച്ചർ റഡാർ (SAR) സാങ്കേതികവിദ്യയാണ് ഇതിൽ ഉപയോഗിക്കുന്നത്.

റഷ്യൻ സൈന്യത്തിന്റെ നീക്കങ്ങൾ തൽസമയം നിരീക്ഷിക്കാൻ യുക്രെയ്ൻ സൈന്യം ഉപയോഗിക്കുന്നത് ഈ കമ്പനിയുടെ ഉപഗ്രഹ വിവരങ്ങളാണ്. കമ്പനി ഔദ്യോഗികമായി ഇത് സ്ഥിരീകരിച്ചിട്ടില്ലെങ്കിലും, യുക്രെയ്നിയൻ പ്രതിരോധ മന്ത്രാലയം സാറ്റലൈറ്റ് സേവനം ഉപയോഗിക്കുന്ന കാര്യം വിദേശ മാധ്യമങ്ങളോട് സമ്മതിച്ചിട്ടുണ്ട്. ബഹിരാകാശത്തു വെച്ച് യുഎസ് ഉപഗ്രഹത്തെ നിഷ്ക്രിയമാക്കാനോ ചിത്രീകരണ സംവിധാനങ്ങൾ തകരാറിലാക്കാനോ ഉള്ള റഷ്യൻ തന്ത്രത്തിന്റെ ഭാഗമാണ് ഈ നീക്കമെന്നാണ് അന്താരാഷ്ട്ര ബഹിരാകാശ നിരീക്ഷകർ വിലയിരുത്തുന്നത്. ഇതോടെ ഭൂമിയിലെ യുദ്ധം ബഹിരാകാശത്തെ സാങ്കേതിക പോരാട്ടമായി മാറുകയാണ്.