ഏഴ് ദിവസത്തെ ജുഡീഷ്യൽ കസ്റ്റഡിക്ക് ശേഷം കോക്ക്റോച്ച് ജനതാ പാർട്ടി (സിജെപി) നേതാക്കളായ സൗരവ് ദാസിനും അശുതോഷ് റാങ്കയ്ക്കും ഡൽഹി മജിസ്ട്രേറ്റ് കോടതി ജാമ്യം അനുവദിച്ചു. ജന്തർ മന്തറിൽ പ്രവേശിച്ച് ദേശീയ പതാക ഉയർത്തുകയും സമാധാന അന്തരീക്ഷം തകർക്കാൻ ശ്രമിക്കുകയും ചെയ്തു എന്നാരോപിച്ചാണ് ഡൽഹി പോലീസ് ഇവരെ കസ്റ്റഡിയിലെടുത്തത്. കേസിൽ ജാമ്യത്തിനായി സമർപ്പിച്ച മുൻരേഖകളിലെ പൊരുത്തക്കേടുകൾ ചൂണ്ടിക്കാട്ടി നേരത്തെ ഇവരുടെ റിമാൻഡ് കാലാവധി രണ്ടുദിവസം കൂടി നീട്ടിയിരുന്നു. ഒടുവിൽ കൃത്യമായ രേഖകളും സമാധാനം പാലിക്കുമെന്ന ഉറപ്പും ഹാജരാക്കിയതോടെയാണ് സ്പെഷ്യൽ എക്സിക്യൂട്ടീവ് മജിസ്ട്രേറ്റ് ഇവരുടെ മോചനത്തിന് ഉത്തരവിട്ടത്.
ഇരുവരുടെയും ജുഡീഷ്യൽ കസ്റ്റഡി ചോദ്യം ചെയ്തുകൊണ്ട് സമർപ്പിച്ച ഹർജി ഡൽഹി ഹൈക്കോടതിയിൽ നിന്ന് പിൻവലിച്ചതിന് പിന്നാലെയാണ് മജിസ്ട്രേറ്റ് കോടതിയുടെ ഉത്തരവുണ്ടായത്. കേസ് കീഴ്ക്കോടതിയുടെ പരിഗണനയിലുള്ളതിനാൽ അവിടെ നടപടികൾ പൂർത്തിയാക്കാൻ ഹൈക്കോടതി നിർദ്ദേശിക്കുകയായിരുന്നു. തുടർന്ന് പ്രതിഭാഗം അഭിഭാഷകർ കീഴ്ക്കോടതിയിൽ പുതിയ ജാമ്യക്കാരെ ഹാജരാക്കി. കേസിൽ അനധികൃതമായി തങ്ങളെ തടഞ്ഞുവെക്കാൻ ശ്രമങ്ങൾ നടന്നു എന്ന് ആരോപിച്ച നേതാക്കൾ, സത്യം ഒടുവിൽ വിജയിച്ചു എന്ന് കോടതി ഉത്തരവിന് ശേഷം പ്രതികരിച്ചു.
ജന്തർ മന്തറിലെ പ്രതിഷേധവുമായി ബന്ധപ്പെട്ട കേസിന്റെ അന്വേഷണം ഡൽഹി പോലീസ് ക്രൈംബ്രാഞ്ചിലേക്ക് മാറ്റിയിരുന്നു. ഉയർന്ന സുരക്ഷാ മേഖലയിൽ നടന്ന സംഭവമായതിനാലാണ് വിഐപി സുരക്ഷ മുൻനിർത്തി കേസ് വലിയ ഏജൻസിക്ക് കൈമാറിയത്. വരും ദിവസങ്ങളിൽ ക്രൈംബ്രാഞ്ച് ചോദ്യം ചെയ്യലിന് ഹാജരാകാൻ ഇവർക്ക് നിർദ്ദേശം ലഭിച്ചിട്ടുണ്ട്.
