ഇന്ത്യയുടെ അഭിമാനമായ ‘വന്ദേ ഭാരത്’ എക്സ്പ്രസ് ട്രെയിനുകൾ ഇനി ആഗോള റെയിൽവേ ട്രാക്കുകളിലും കുതിച്ചുപായും. അടുത്ത മൂന്ന് മുതൽ നാല് വർഷത്തിനുള്ളിൽ പൂർണ്ണമായി നിർമ്മിച്ച വന്ദേ ഭാരത് ട്രെയിനുകൾ വിദേശരാജ്യങ്ങളിലേക്ക് കയറ്റുമതി ചെയ്യാൻ ഇന്ത്യ സജ്ജമാകുമെന്ന് കേന്ദ്ര റെയിൽവേ മന്ത്രി അശ്വിനി വൈഷ്ണവ് പ്രഖ്യാപിച്ചു. ബെംഗളൂരു-മുംബൈ വന്ദേ ഭാരത് സ്ലീപ്പർ എക്സ്പ്രസ് ഫ്ലാഗ് ഓഫ് ചെയ്ത ശേഷം മാധ്യമങ്ങളോട് സംസാരിക്കവെയാണ് മന്ത്രി ഈ വൻ പദ്ധതി വെളിപ്പെടുത്തിയത്.
ഇന്ത്യൻ റെയിൽവേ തദ്ദേശീയമായി വികസിപ്പിച്ചെടുത്ത ട്രെയിനുകൾ ഓരോ പുതിയ പതിപ്പിലും കൂടുതൽ സാങ്കേതികമികവോടെയാണ് പുറത്തിറക്കുന്നത്. നിലവിൽ അമേരിക്ക, സ്വിറ്റ്‌സർലാന്റ്, ജർമ്മനി, ഫ്രാൻസ്, ഇറ്റലി തുടങ്ങിയ വികസിത രാജ്യങ്ങളിലേക്ക് വന്ദേ ഭാരതിന്റെ പ്രൊപ്പൽഷൻ സിസ്റ്റങ്ങളും ബോഗികളും ഉൾപ്പെടെയുള്ള സങ്കീർണ്ണമായ അനുബന്ധ ഘടകങ്ങൾ ഇന്ത്യ വിജയകരമായി കയറ്റുമതി ചെയ്യുന്നുണ്ട്. ഇതിന്റെ അടുത്ത ഘട്ടമായാണ് സമ്പൂർണ്ണ ട്രെയിൻ സെറ്റുകൾ തന്നെ വിദേശ വിപണിയിലെത്തിക്കാൻ ഇന്ത്യ ലക്ഷ്യമിടുന്നത്.
രാജ്യത്തെ റെയിൽവേ ഉപകരണങ്ങളുടെ കയറ്റുമതി മേഖല വലിയ വളർച്ചയാണ് നേടുന്നത്. 2016-17 മുതൽ 2026 ജനുവരി വരെയുള്ള കാലയളവിൽ മാത്രം ഏകദേശം 26,000 കോടി രൂപയുടെ റെയിൽവേ സാമഗ്രികളും കോച്ചുകളും ഇന്ത്യ കയറ്റുമതി ചെയ്തതായി റെയിൽവേ മന്ത്രാലയം പാർലമെന്റിനെ അറിയിച്ചിരുന്നു. ഇതിനുപുറമെ, രാജ്യത്തിനുള്ളിൽ സർവീസ് നടത്തുന്നതിനായി ആകെ 260 വന്ദേ ഭാരത് സ്ലീപ്പർ ട്രെയിൻ സെറ്റുകൾ നിർമ്മിക്കാനുള്ള വലിയ ദൗത്യത്തിലാണ് നിർമ്മാണ കേന്ദ്രങ്ങൾ. ബി.ഇ.എം.എൽ (BEML), ചെന്നൈയിലെ ഇന്റഗ്രൽ കോച്ച് ഫാക്ടറി (ICF) എന്നിവ സാങ്കേതിക പങ്കാളികളുമായി ചേർന്ന് ഘട്ടം ഘട്ടമായി ഇവ പുറത്തിറക്കുമെന്നും റെയിൽവേ വ്യവസായ രംഗത്ത് ഇന്ത്യ ആഗോള ശക്തിയായി മാറുമെന്നും മന്ത്രി കൂട്ടിച്ചേർത്തു.
