കഴിഞ്ഞദിവസം നടന്ന ഇന്ത്യൻ പ്രീമിയർ ലീഗ് എലിമിനേറ്റർ മത്സരത്തിൽ തോറ്റ് പുറത്തായെങ്കിലും റോയൽ ചലഞ്ചേഴ്സ് ബംഗളൂരു ടീം മടക്കത്തിലും ഒരു റെക്കോർഡ് നേട്ടം സ്വന്തമാക്കിയിട്ടുണ്ട്. ഐപിഎൽ പ്ലേഓഫിൽ ഏറ്റവും അധികം മത്സരങ്ങൾ തോറ്റ ടീം എന്ന നേട്ടമാണ് ഇനി ആർസിബിക്ക് സ്വന്തമായിട്ടുള്ളത്. കൂടാതെ ഐപിഎല്ലിൽ 8000 റൺസ് തികയ്ക്കുന്ന ആദ്യ വ്യക്തിയായി വിരാട് കോഹ്ലിയും നേട്ടം കൈവരിച്ചു.
ഐപിഎൽ ആരംഭിച്ച ശേഷം ആർസിബി 16 പ്ലേ ഓഫ് മത്സരങ്ങളാണ് കളിച്ചിട്ടുള്ളത്. അതിൽ 10 മത്സരങ്ങളിലും പരാജയം ഏറ്റുവാങ്ങുകയായിരുന്നു. മൂന്നുതവണയാണ് ആർസിബി ഫൈനൽ മത്സരങ്ങൾ കളിച്ചത്. ഈ മൂന്നു മത്സരങ്ങളിലും ടീം പരാജയപ്പെട്ടു. ഏറ്റവും അധികം പ്ലേ ഓഫ് മത്സരങ്ങളിൽ തോറ്റിരുന്ന ചെന്നൈ സൂപ്പർ കിംഗ്സ് ടീമിന്റെ റെക്കോർഡ് ആണ് ബുധനാഴ്ചത്തെ തോൽവിയോടെ ആർ സി ബി തിരുത്തിക്കുറിച്ചിരിക്കുന്നത്. സി എസ് കെ ഇതുവരെയായി 26 പ്ലേ ഓഫ് മത്സരങ്ങളാണ് കളിച്ചിട്ടുള്ളത്. ഇവയിൽ 17 എണ്ണത്തിൽ വിജയിക്കുകയും 9 മത്സരങ്ങളിൽ പരാജയപ്പെടുകയും ചെയ്തു.
ബുധനാഴ്ച നടന്ന മത്സരത്തിൽ ആർസിബിയെ തോൽപ്പിച്ച രാജസ്ഥാൻ റോയൽസ് ടീമിന്റെ ക്യാപ്റ്റൻ മലയാളി താരം സഞ്ജു സാംസണും പുതിയൊരു നേട്ടം കൈവരിച്ചിട്ടുണ്ട്. രാജസ്ഥാൻ റോയൽസിന്റെ ക്യാപ്റ്റൻ എന്ന നിലയിൽ 31 മത്സരങ്ങൾ വിജയിച്ചു കൊണ്ട് മുൻ നായകൻ ഷെയ്ൻ ഫോണിന് ഒപ്പം എത്താൻ സഞ്ജു സാംസണിനായി.
