വിജയാഘോഷത്തിനിടയിലും തർക്കം; കുൽദീപിനോട് ചൂടായി ഹാർദിക്കും സൂര്യയും, ഗ്രൗണ്ടിൽ അപ്രതീക്ഷിത രംഗങ്ങൾ; വീഡിയോ വൈറൽ

കൊളംബോയിലെ ആർ. പ്രേമദാസ സ്റ്റേഡിയത്തിൽ പാകിസ്ഥാനെതിരെ ഇന്ത്യ 61 റൺസിന്റെ ഉജ്ജ്വല വിജയം ആഘോഷിക്കുമ്പോഴും മൈതാനത്ത് അരങ്ങേറിയ ചില അപ്രതീക്ഷിത ദൃശ്യങ്ങൾ ആരാധകരെ ആശങ്കയിലാഴ്ത്തി. മത്സരശേഷം ഹാർദിക് പാണ്ഡ്യയും നായകൻ സൂര്യകുമാർ യാദവും സ്പിന്നർ കുൽദീപ് യാദവിനോട് ക്ഷോഭിക്കുന്ന ദൃശ്യങ്ങളാണ് ഇപ്പോൾ ചർച്ചയാകുന്നത്.

മത്സരത്തിന്റെ അവസാന നിമിഷങ്ങളിൽ പാകിസ്ഥാന്റെ പത്താം വിക്കറ്റ് വീഴ്ത്തി ഹർദിക് പാണ്ഡ്യ ഇന്ത്യയുടെ വിജയം ഉറപ്പാക്കിയിരുന്നു. എന്നാൽ ടീം അംഗങ്ങൾ പരസ്പരം ആലിംഗനം ചെയ്തും ഹസ്തദാനം നൽകിയും വിജയം ആഘോഷിക്കുമ്പോൾ, ഹാർദിക് കുൽദീപിന് നേരെ തിരിയുകയായിരുന്നു. നായകൻ സൂര്യകുമാർ യാദവും കുൽദീപിനോട് ദേഷ്യപ്പെട്ടാണ് സംസാരിച്ചത്.

പാണ്ഡ്യ എറിഞ്ഞ അവസാന ഓവറിലെ രണ്ടാമത്തെ പന്തിലാണ് നാടകീയമായ സംഭവങ്ങൾ നടന്നത്. പാക് താരം ഷഹീൻ അഫ്രീദി ഉയർത്തിയടിച്ച പന്ത് ലോംഗ് ഓണിൽ കുൽദീപിന്റെ കൈകളിൽ എത്തിയതാണ്. എന്നാൽ പന്ത് കൈപ്പിടിയിലൊതുക്കാൻ കുൽദീപിന് സാധിച്ചില്ല. പന്ത് കൈകളിൽ തട്ടി ബൗണ്ടറി ലൈനിന് പുറത്തേക്ക് വീണ് സിക്സറായി മാറി.

മത്സരഫലത്തെ ഈ പിഴവ് ബാധിച്ചില്ലെങ്കിലും,  അർഹിച്ച വിക്കറ്റ് നഷ്ടമായതിന്റെ നിരാശയിലായിരുന്നു ഹാർദിക്. വിജയത്തിന് പിന്നാലെ സൂര്യകുമാറും കുൽദീപിനോട് കയർത്തു സംസാരിക്കുന്നത് കണ്ടതോടെ യുവതാരം തിലക് വർമ്മയും അമ്പരന്നു. ഒടുവിൽ സ്ഥിതി ശാന്തമാക്കാൻ റിങ്കു സിംഗ് ഇടപെടുകയായിരുന്നു. ഇത്തരം ചെറിയ പിഴവുകൾ വരാനിരിക്കുന്ന വലിയ മത്സരങ്ങളിൽ ഇന്ത്യയ്ക്ക് തിരിച്ചടിയാകുമെന്ന വിലയിരുത്തലിലാണ് സീനിയർ താരങ്ങൾ ക്ഷോഭിച്ചതെന്ന് കരുതപ്പെടുന്നു.

എന്തായാലും ജയത്തോടെ സൂപ്പർ 8 ഉറപ്പിച്ച ഇന്ത്യയുടെ അടുത്ത മത്സരം ബുധനാഴ്ച്ച നെതർലാൻഡ്‌സുമായിട്ടാണ്.

Here is video of Hardik Pandya & Surya Kumar Yadav angry on Kuldeep Yadav #INDvsPAK #T20WorldCup pic.twitter.com/BsGCCprKNc

— cricketkayudh (@cricketkayudh) February 15, 2026