പാകിസ്ഥാന്റെ ഭാഗത്തുനിന്നുള്ള ഏതൊരു സൈനിക നീക്കത്തിനും അതേ നാണയത്തിൽ തിരിച്ചടി നൽകുമെന്ന് അഫ്ഗാനിസ്ഥാൻ പ്രതിരോധ മന്ത്രി മുഹമ്മദ് യാക്കൂബ് മുജാഹിദ്. കാബൂളിൽ അസ്ഥിരതയുണ്ടാക്കാൻ ശ്രമിച്ചാൽ അതിന്റെ ആഘാതം ഇസ്ലാമാബാദിലും പ്രതിഫലിക്കുമെന്ന് അദ്ദേഹം ഓർമ്മിപ്പിച്ചു. പ്രമുഖ മാധ്യമമായ ടോളോ ന്യൂസിന് നൽകിയ അഭിമുഖത്തിലാണ് പാകിസ്ഥാനെതിരെ അദ്ദേഹം ആഞ്ഞടിച്ചത്.
അഫ്ഗാനിസ്ഥാനെ ആക്രമിച്ചാൽ പ്രത്യാഘാതങ്ങൾ നേരിടേണ്ടി വരില്ലെന്ന് പാകിസ്ഥാൻ കരുതരുതെന്ന് മുജാഹിദ് പറഞ്ഞു. “കാബൂൾ സുരക്ഷിതമല്ലാതായാൽ ഇസ്ലാമാബാദും സുരക്ഷിതമല്ലാതാകും. കാബൂൾ ആക്രമിക്കപ്പെട്ടാൽ തിരിച്ചടി ഇസ്ലാമാബാദിലുമുണ്ടാകും.” അദ്ദേഹം വ്യക്തമാക്കി. തർക്കങ്ങൾ ചർച്ചകളിലൂടെ പരിഹരിക്കാനാണ് അഫ്ഗാനിസ്ഥാൻ ആഗ്രഹിക്കുന്നതെന്നും എന്നാൽ പാകിസ്ഥാൻ ആ പാത പിന്തുടരുന്നില്ലെന്നും അദ്ദേഹം കുറ്റപ്പെടുത്തി.
ബ്രിട്ടീഷ് ഭരണകാലത്ത് അഫ്ഗാനിസ്ഥാനെയും പാകിസ്ഥാനെയും വേർതിരിച്ച് വരച്ച ‘ഡുറാൻഡ് ലൈൻ’ അന്താരാഷ്ട്ര അതിർത്തിയായി അംഗീകരിക്കാൻ പാകിസ്ഥാൻ സമ്മർദ്ദം ചെലുത്തുന്നുണ്ടെന്ന് മന്ത്രി പറഞ്ഞു. എന്നാൽ ഇതൊരു ചരിത്രപരമായ തർക്കമാണെന്നും ഇതുവരെ പരിഹരിക്കപ്പെട്ടിട്ടില്ലെന്നുമാണ് അഫ്ഗാന്റെ നിലപാട്. സൗദി അറേബ്യയുടെ മധ്യസ്ഥതയിൽ നടന്ന ചർച്ചകളിൽ പ്രാഥമിക ധാരണകൾ ഉണ്ടായെങ്കിലും പല വിഷയങ്ങളിലും ഇപ്പോഴും അഭിപ്രായ വ്യത്യാസങ്ങൾ തുടരുകയാണ്.
പാകിസ്ഥാനുമായുള്ള ബന്ധത്തിൽ മൂന്ന് പ്രധാന തത്വങ്ങളാണ് അഫ്ഗാനിസ്ഥാൻ പിന്തുടരുന്നതെന്ന് മുജാഹിദ് വ്യക്തമാക്കി:
മണ്ണ് ദുരുപയോഗം ചെയ്യില്ല: അഫ്ഗാനിസ്ഥാന്റെ മണ്ണ് പാകിസ്ഥാനെതിരെയോ പാകിസ്ഥാന്റെ മണ്ണ് അഫ്ഗാനിസ്ഥാനെതിരെയോ ഭീകരപ്രവർത്തനത്തിന് ഉപയോഗിക്കാൻ അനുവദിക്കരുത്.
പരമാധികാരത്തോടുള്ള ബഹുമാനം: അഫ്ഗാനിസ്ഥാന്റെ പരമാധികാരത്തെയും പ്രാദേശിക അഖണ്ഡതയെയും പാകിസ്ഥാൻ ബഹുമാനിക്കണം.
വ്യാപാരവും സുരക്ഷയും: വ്യാപാര സംബന്ധമായ വിഷയങ്ങളെ സുരക്ഷാ തർക്കങ്ങളുമായി കൂട്ടിക്കുഴയ്ക്കരുത്.
സംഘർഷങ്ങൾ നിലനിൽക്കുന്നുണ്ടെങ്കിലും പാകിസ്ഥാൻ ആത്മാർത്ഥമായ ചർച്ചകൾക്ക് തയ്യാറായാൽ അഫ്ഗാൻ സർക്കാർ അതിനോട് സഹകരിക്കുമെന്ന് അദ്ദേഹം പറഞ്ഞു. ഇതിന്റെ ഭാഗമായി, അതിർത്തി സംഘർഷത്തിനിടെ പിടിയിലായ മൂന്ന് പാകിസ്ഥാൻ സൈനികരെ അഫ്ഗാനിസ്ഥാൻ വിട്ടയച്ചത് ഒരു നല്ല സൂചനയാണെന്നും അദ്ദേഹം കൂട്ടിച്ചേർത്തു.
