ഐ.പി.എൽ 2026-ലെ എലിമിനേറ്റർ മത്സരത്തിനായി രാജസ്ഥാൻ റോയൽസ് സംഘം മുംബൈയിൽ നിന്ന് മുല്ലൻപൂരിലേക്ക് യാത്ര തിരിക്കവെ, ക്യാപ്റ്റൻ റിയാൻ പരാഗും യുവതാരം വൈഭവ് സൂര്യവംശിയും തമ്മിലുണ്ടായ ഒരു രസകരമായ സംഭവം സോഷ്യൽ മീഡിയയിൽ വൈറലാകുന്നു. പാപ്പരാസികൾക്ക് മുന്നിൽ വെച്ചുണ്ടായ ഈ സംഭവം ആരാധകരെ അമ്പരപ്പിച്ചിരിക്കുകയാണ്.
വിമാനത്താവളത്തിൽ വെച്ച് ഫോട്ടോഗ്രാഫർമാർ റിയാൻ പരാഗിനോട് വൈഭവിനൊപ്പം ഒരു ഫോട്ടോ എടുക്കാൻ ആവശ്യപ്പെട്ടപ്പോഴാണ് താരം അപ്രതീക്ഷിതമായി പ്രതികരിച്ചത്. “ഞങ്ങൾ സിനിമ താരങ്ങളൊന്നുമല്ല” എന്ന് പറഞ്ഞ് റിയാൻ പരാഗ് നടന്നുനീങ്ങിയപ്പോൾ അമ്പരന്നുപോയ വൈഭവ് സൂര്യവംശി തമാശ രൂപേണ മുഖഭാവം മാറ്റുന്നതും വീഡിയോയിൽ കാണാം.
റിയാൻ പരാഗ് ഇത്തരം കാര്യങ്ങളിൽ അല്പം കർക്കശക്കാരനാണെങ്കിലും, വൈഭവുമായി അദ്ദേഹത്തിന് വളരെ നല്ല ബന്ധമാണുള്ളത്. ഈ സംഭവത്തിന് ശേഷം ഇരുവരും തമ്മിലുള്ള സൗഹൃദത്തിൽ യാതൊരു മാറ്റവുമില്ലെന്ന് ടീം വൃത്തങ്ങൾ വ്യക്തമാക്കു. വൈഭവ് റിയാൻ പരാഗിന്റെ പിതാവിന്റെ അനുഗ്രഹം വാങ്ങുന്ന ദൃശ്യങ്ങളും നേരത്തെ പുറത്തുവന്നിരുന്നു. വൈഭവിനെ ഒരു അനുജനെപ്പോലെയാണ് റിയാൻ പരാഗ് കാണുന്നത്.
ഐ.പി.എൽ 2026-ലെ ഏറ്റവും വലിയ താരോദയമാണ് വൈഭവ് സൂര്യവംശി. 14 മത്സരങ്ങളിൽ നിന്ന് 583 റൺസ് അടിച്ചുകൂട്ടിയ വൈഭവ്, ഒരു സീസണിൽ 500 റൺസ് തികയ്ക്കുന്ന ഏറ്റവും പ്രായം കുറഞ്ഞ താരമായി മാറി. ക്രിസ് ഗെയ്ലിന്റെ ഒരു സീസണിലെ ഏറ്റവും കൂടുതൽ സിക്സറുകൾ എന്ന റെക്കോർഡ് തകർക്കാൻ വൈഭവിന് ഇനി വെറും 7 സിക്സറുകൾ കൂടി മതി. പ്ലേ ഓഫിൽ ഒന്നിലധികം മത്സരങ്ങൾ ലഭിച്ചാൽ വൈഭവ് ഈ റെക്കോർഡ് അനായാസം മറികടക്കുമെന്ന് ഉറപ്പാണ്.
