പാക്കിസ്ഥാനിലെ ഖൈബർ പഖ്തുൻഖ്വ (കെ.പി) പ്രവിശ്യയിലെ ധാതുസമ്പത്ത് കൈക്കലാക്കാനുള്ള നീക്കത്തിന്റെ ഭാഗമായാണ് ഭരണകൂടവും സൈന്യവും പ്രവിശ്യയിൽ ഗവർണർ ഭരണവും ഭീകരവിരുദ്ധ പ്രവർത്തനങ്ങളും നടപ്പിലാക്കുന്നതെന്ന് ജമിയത്ത് ഉലമ-ഇ-ഇസ്ലാം-ഫസൽ (ജെ.യു.ഐ-എഫ്) തലവൻ മൗലാന ഫസ്ലുർ റഹ്മാൻ ആരോപിച്ചു.
കേന്ദ്ര ഗവൺമെന്റിന്റെ ഗവർണർ ഭരണ ഉത്തരവ് ഭരണഘടനാ വിരുദ്ധമാണെന്നും ഈ എമർജൻസി സംവിധാനത്തിന് കീഴിൽ രൂപീകരിക്കുന്ന ഒരു ഭരണ സമിതിയിലും പാർട്ടി അംഗങ്ങൾ പങ്കെടുക്കില്ലെന്നും കേന്ദ്ര എക്സിക്യൂട്ടീവ് കമ്മിറ്റി യോഗത്തിന് ശേഷം അദ്ദേഹം അറിയിച്ചു. പ്രവിശ്യയിലെ ഭരണപരമായ മാറ്റങ്ങൾക്ക് പിന്നിൽ കടുത്ത സാമ്പത്തിക, ഭൂരാഷ്ട്രീയ താൽപ്പര്യങ്ങളുണ്ടെന്ന് ആരോപിച്ച റഹ്മാൻ, യു.എസ് ഉൾപ്പെടെയുള്ള വിദേശ ശക്തികൾക്ക് പാക്കിസ്ഥാന്റെ ധാതു നിക്ഷേപങ്ങളിൽ പ്രത്യേക പരിഗണന ലഭിക്കുന്നതിനെ ചോദ്യം ചെയ്യുകയും ചെയ്തു. മേഖലയിൽ വർഷങ്ങളായി നടത്തുന്ന സൈനിക നീക്കങ്ങളുടെ കൃത്യമായ ഓഡിറ്റിംഗ് ആവശ്യപ്പെട്ട അദ്ദേഹം, ഭീകരവാദത്തിനെതിരെയുള്ള പോരാട്ടത്തിൽ തങ്ങളുടെ പാർട്ടിയുടെ 250-ഓളം പ്രവർത്തകർക്ക് ജീവൻ നഷ്ടപ്പെട്ടിട്ടുണ്ടെന്ന് ഓർമ്മിപ്പിച്ചു.
യന്ത്രത്തോക്കുകൾ കാട്ടി ദേശസ്നേഹം പഠിപ്പിക്കാൻ ആരും വരേണ്ടതില്ലെന്നും രാഷ്ട്രീയം പറയില്ലെന്ന് സത്യപ്രതിജ്ഞ ചെയ്തവരാണ് രാജ്യത്തെ മുഴുവൻ രാഷ്ട്രീയവും നിയന്ത്രിക്കുന്നതെന്നും സൈനിക നേതൃത്വത്തെ രൂക്ഷമായി വിമർശിച്ചുകൊണ്ട് അദ്ദേഹം പറഞ്ഞു. ബലപ്രയോഗത്തിലൂടെയോ വിമർശകരെ അടിച്ചമർത്തിയോ അല്ല, മറിച്ച് ഭരണഘടനയ്ക്കനുസൃതമായി പ്രവിശ്യാപരമായ പരാതികൾ പരിഹരിക്കാൻ പാർലമെന്റിന്റെ അടച്ചിട്ട സഭ വിളിച്ചുചേർക്കണമെന്നും ഫസ്ലുർ റഹ്മാൻ ആവശ്യപ്പെട്ടു.
