പ്രമുഖ ഐ.വി.എഫ് (IVF), ഫെർട്ടിലിറ്റി സെന്ററുകളുടെ മറവിൽ പ്രവർത്തിച്ചിരുന്ന കൂറ്റൻ അന്തർസംസ്ഥാന അണ്ഡക്കടത്ത് മാഫിയ സംഘത്തെ ഹൈദരാബാദ് പോലീസ് പിടികൂടി. ഹൈദരാബാദിലെ ബെഗംപേട്ട് പ്രകാശ് നഗർ, എരഗഡ്ഡ, സരൂർനഗർ, ഗോപാലപുരം എന്നീ പ്രദേശങ്ങളിലെ നിയമവിരുദ്ധ കേന്ദ്രങ്ങളിൽ പോലീസ് നടത്തിയ മിന്നൽ റെയ്ഡിലാണ് 8 പേർ അടങ്ങുന്ന റാക്കറ്റ് പിടിയിലായത്. തടങ്കലിൽ പാർപ്പിച്ചിരുന്ന 43 നിർധനരായ സ്ത്രീകളെ പോലീസ് സുരക്ഷിതമായി രക്ഷപ്പെടുത്തി.
പശ്ചിമ ബംഗാൾ, ഉത്തർപ്രദേശ്, മഹാരാഷ്ട്ര തുടങ്ങിയ വിവിധ സംസ്ഥാനങ്ങളിൽ നിന്നുള്ള ദരിദ്ര പശ്ചാത്തലമുള്ള സ്ത്രീകളെ ലക്ഷ്യമിട്ടായിരുന്നു മാഫിയയുടെ പ്രവർത്തനം. ഒരു തവണ അണ്ഡം ദാനം ചെയ്യുന്നതിന് 20,000 രൂപ മുതൽ 30,000 രൂപ വരെ വാഗ്ദാനം ചെയ്താണ് ഏജന്റുമാർ വഴി ഇവരെ ആകർഷിച്ചിരുന്നത്. വിമാനത്തിലും ട്രെയിനിലുമായി ഹൈദരാബാദിൽ എത്തിക്കുന്ന സ്ത്രീകളെ നഗരത്തിലെ രഹസ്യ വാടകവീടുകളിൽ പൂട്ടിയിട്ട്, പിന്നീട് പ്രമുഖ ഫെർട്ടിലിറ്റി ക്ലിനിക്കുകളിലേക്ക് മാറ്റുകയായിരുന്നു സംഘത്തിന്റെ രീതി.
വൈദ്യശാസ്ത്ര മാനദണ്ഡങ്ങളോ കൃത്യമായ ആരോഗ്യ പരിശോധനകളോ പാലിക്കാതെയാണ് സ്ത്രീകൾക്ക് അമിത അളവിൽ ഹോർമോൺ കുത്തിവെപ്പുകളും മരുന്നുകളും നൽകിയിരുന്നതെന്ന് പോലീസ് കണ്ടെത്തി. ഇത് സ്ത്രീകളുടെ ജീവന് തന്നെ വലിയ ഭീഷണിയുയർത്തുന്നതാണ്. പരിശോധന നടന്ന കേന്ദ്രങ്ങളിൽ നിന്നും വൻതോതിൽ ‘ഹ്യൂമോഗ് എച്ച്.പി’ (Humog HP) ഇൻജക്ഷനുകൾ, സിറിഞ്ചുകൾ, വൻതുകയുടെ സാമ്പത്തിക രേഖകൾ, മൊബൈൽ ഫോണുകൾ എന്നിവ പോലീസ് പിടിച്ചെടുത്തു. സംഭവത്തിൽ ഉൾപ്പെട്ട കൂടുതൽ ഐ.വി.എഫ് ക്ലിനിക്കുകളിലേക്കും ഡോക്ടർമാരിലേക്കും അന്വേഷണം വ്യാപിപ്പിച്ചിട്ടുണ്ടെന്ന് പോലീസ് അറിയിച്ചു.
