ടോക്യോ: പാരാലിമ്പിക്സിൽ ഇന്ത്യക്ക് സ്വർണം. ഇന്ത്യൻ ഷൂട്ടിംഗ് താരം അവനി ലേഖരയാണ് രാജ്യത്തിന്റെ അഭിമാനം വാനോളം ഉയർത്തിയത്. ലോക റെക്കോർഡോടെയാണ് അവനി സുവർണ നേട്ടം കൈവരിച്ചത്.
പാരാലിമ്പിക്സിൽ സ്വർണം നേടുന്ന ആദ്യ ഇന്ത്യൻ വനിതയാണ് അവനി ലേഖര. അവനിയുടെ നേട്ടത്തെ പ്രധാനമന്ത്രി നരേന്ദ്ര മോദി അഭിനന്ദിച്ചു. 10 മീറ്റർ എയർ റൈഫിൾ വിഭാഗത്തിലാണ് അവനി സ്വർണം നേടിയത്. യോഗ്യതാ റൗണ്ടുകളിലെ പതിഞ്ഞ തുടക്കത്തിന് ശേഷമായിരുന്നു അവനി ലേഖരയുടെ ഫൈനലിലെ സ്വർണ്ണക്കുതിപ്പ്.
Phenomenal performance @AvaniLekhara! Congratulations on winning a hard-earned and well-deserved Gold, made possible due to your industrious nature and passion towards shooting. This is truly a special moment for Indian sports. Best wishes for your future endeavours.
— Narendra Modi (@narendramodi) August 30, 2021
249.6 പോയിന്റോടെ പാരാലിമ്പിക്സ് ലോക റെക്കോർഡിനൊപ്പമെത്തിയ പ്രകടനമാണ് ഇന്ത്യക്ക് വേണ്ടി ഈ പത്തൊമ്പത് വയസ്സുകാരി പുറത്തെടുത്തത്. ചൈനയുടെ ക്യൂപിംഗ് ഷാംഗ് വെള്ളിയും യുക്രെയിന്റെ ഇര്യാന ഷെട്നിക് വെങ്കലവും നേടി. പാരലിമ്പിക്സിൽ ഇന്ത്യൻ താരങ്ങൾ മൂന്നു മെഡലുകൾ കഴിഞ്ഞ ദിവസം നേടിയിരുന്നു. ഭവിന ബെൻ പട്ടേൽ (ടേബ്ൾ ടെന്നിസ്), നിഷാദ് കുമാർ (ഹൈജംപ്), വെങ്കലം കരസ്ഥമാക്കിയ വിനോദ് കുമാർ (ഡിസ്കസ്ത്രോ) എന്നിവരാണ് ഇന്ത്യയുടെ മറ്റ് മെഡൽ ജേതാക്കൾ.
