ന്യൂയോർക്ക് : എ ഐ ഇംപാക്ട് ഉച്ചകോടി 2026ന് നേതൃത്വം നൽകുന്ന ഇന്ത്യയെ അഭിനന്ദിച്ച് ഐക്യരാഷ്ട്രസഭ സെക്രട്ടറി ജനറൽ അന്റോണിയോ ഗുട്ടെറസ്. കൃത്രിമബുദ്ധിയുടെ വെല്ലുവിളികളെ നേരിടുന്നതിൽ ഇന്ത്യയുടെ ഇടപെടൽ നിർണായകമാണെന്ന് അദ്ദേഹം സൂചിപ്പിച്ചു. ഫെബ്രുവരി 16 മുതൽ 20 വരെ ന്യൂഡൽഹിയിൽ വച്ചാണ് ഇന്ത്യ എ ഐ ഇംപാക്ട് ഉച്ചകോടി 2026 നടക്കുന്നത്.
ഫെബ്രുവരി 16 മുതൽ അഞ്ചു ദിവസങ്ങളിലായി ഇന്ത്യയിൽ നടക്കുന്ന ഉച്ചകോടിയിൽ
100-ലധികം രാജ്യങ്ങളിൽ നിന്നുള്ള 35,000-ത്തിലധികം ആളുകൾ രജിസ്റ്റർ ചെയ്തിട്ടുണ്ട്. ഇതുവരെ നടന്ന നാല് ഉച്ചകോടികളിൽ ഏറ്റവും വലുതായിരിക്കും ഇന്ത്യയിൽ നടക്കുക എന്നാണ് പ്രതീക്ഷിക്കപ്പെടുന്നത്. ന്യൂഡൽഹിയിൽ വച്ച് നടക്കുന്ന പരിപാടിയിൽ 500-ലധികം സ്റ്റാർട്ടപ്പുകളും പങ്കെടുക്കുമെന്ന് കേന്ദ്ര ഇലക്ട്രോണിക്സ് ആൻഡ് ഇൻഫർമേഷൻ ടെക്നോളജി മന്ത്രാലയം അറിയിച്ചു.
ഇന്ത്യ നേതൃത്വം നൽകുന്ന ഈ ഉച്ചകോടിയിൽ പങ്കെടുക്കാൻ കഴിഞ്ഞതിൽ താൻ അതീവ സന്തോഷവാനാണെന്ന് അന്റോണിയോ ഗുട്ടെറസ് അഭിപ്രായപ്പെട്ടു. “ഇന്ന് അന്താരാഷ്ട്ര ബന്ധങ്ങളിൽ വളരെ നിർണായകമായ ഒരു വിഷയവും എക്കാലത്തെയും വലിയ വെല്ലുവിളികളിൽ ഒന്നുമാണ് എ ഐ. അതിനാൽ, എല്ലാത്തരം സാഹചര്യങ്ങളിലും രാജ്യങ്ങൾ ഒത്തുചേരുകയും സിവിൽ സമൂഹവുമായി ചർച്ച ചെയ്യുകയും ചെയ്യേണ്ടത് വളരെ പ്രധാനമാണ്. ഈ ഉച്ചകോടികളുമായി ബന്ധപ്പെട്ട് നേതൃത്വം ഏറ്റെടുത്തതിന് ഞാൻ ഇന്ത്യയെ പ്രശംസിക്കുന്നു,” എന്ന് യുഎൻ കൃത്രിമബുദ്ധിയെക്കുറിച്ചുള്ള സ്വതന്ത്ര അന്താരാഷ്ട്ര ശാസ്ത്ര പാനലിന്റെ നിർദ്ദിഷ്ട അംഗത്വം അനാച്ഛാദനം ചെയ്തുകൊണ്ട് നടത്തിയ വാർത്താ സമ്മേളനത്തിൽ ഗുട്ടെറസ് വ്യക്തമാക്കി.
Discussion about this post