തിരുവനന്തപുരം: ആദിശങ്കരൻ തെളിച്ച ദേശീയ ഐക്യത്തിന്റെ ദീപശിഖയാണ് കേരളം ഉയർത്തിപ്പിടിക്കുന്നതെന്ന് ഗവർണർ ഓം പ്രകാശ് മാഥൂർ. ലോക്ഭവനിൽ നടന്ന കേരളപ്പിറവി ആഘോഷം ഉദ്ഘാടനം ചെയ്യുകയായിരുന്നു അദ്ദേഹം. കേരളത്തിൽ പിറന്ന ആദിശങ്കരാചാര്യരുടെ ഭാരത പരിക്രമണം രാഷ്ട്രത്തിന്റെ ഏകാത്മതയുടെ ഏറ്റവും വലിയ ഉദാഹരണമാണ്.
കേരളത്തിൽ ജനിച്ച ശങ്കരൻ രാജ്യത്തിന്റെ നാല് ദിക്കുകളിലായി നാല് മഠങ്ങൾ സ്ഥാപിച്ചു. കാൽനടയായിട്ടാണ് അദ്ദേഹം ആ കാലത്ത് യാത്ര ചെയ്തത്. ഭാരതത്തെ ഒന്നിച്ചുനിർത്തുന്ന ഏകാത്മതയുടെ പ്രതീകമാണ് ഈ മഠങ്ങൾ.
ഉത്തരേന്ത്യയിൽ നിന്നും മറ്റു വിദൂര ദേശങ്ങളിൽ നിന്നുമുള്ള ആളുകൾ പോലും ശങ്കരാചാര്യരുടെ ജന്മഭൂമിയായ കേരളത്തെയും ഇവിടുത്തെ പാരമ്പര്യത്തെയും ഏറെ ആദരവോടെയാണ് കാണുന്നത്. രാജ്യത്തിന്റെ ഐക്യവും അഖണ്ഡതയും കാത്തുസൂക്ഷിക്കുന്നതിൽ കേരളം എന്നും മുൻപന്തിയിലാണ്.
കേരളത്തിന്റെ സാംസ്കാരിക സമ്പന്നതയും അതിഥിസത്കാരവും വേറിട്ടുനിൽക്കുന്നു. ഭാരതത്തിന്റെ വൈവിധ്യങ്ങളെയും സംസ്കാരങ്ങളെയും സമന്വയിപ്പിച്ചുകൊണ്ട് ഏക് ഭാരത് ശ്രേഷ്ഠ ഭാരത് എന്ന ആശയത്തിന് അടിത്തറയിടാൻ കേരളത്തിന്റെ സാംസ്കാരിക പാരമ്പര്യത്തിന് സാധിച്ചിട്ടുണ്ട്. ഭാഷാടിസ്ഥാനത്തിൽ സംസ്ഥാനങ്ങൾ രൂപീകരിക്കപ്പെട്ടപ്പോഴും ദേശീയ ഐക്യം നിലനിർത്തുന്നതിൽ കേരളത്തിന്റെ പങ്കു വലുതാണ്.
സംസ്ഥാനത്തിന്റെ വികസനത്തിനും സംസ്കാരത്തിനും എല്ലാവരുടെയും കൂട്ടായ പ്രയത്നം ആവശ്യമാണെന്നും, ശങ്കരാചാര്യർ പകർന്നുനൽകിയ ഐക്യത്തിന്റെ മനോഭാവത്തോടെ മുന്നോട്ടു പോകണമെന്നും ഗവർണർ ആഹ്വാനം ചെയ്തു. കേരളത്തനിമ ഉണർത്തുന്ന വിവിധ കലാപരിപാടികളും നടന്നു.
