രാജ്യത്തെ ഞെട്ടിച്ച മഹാദേവ് ഓൺലൈൻ ബെറ്റിങ് ആപ്പ് കേസിൽ നിർണായക നീക്കവുമായി സിബിഐ. കേസിലെ പ്രധാന പ്രതിയും ആപ്പിന്റെ പ്രമോട്ടറുമായ സൗരഭ് ചന്ദ്രാകറിനെ ഒമാനിൽ നിന്ന് ഇന്ത്യയിലേക്ക് നാടുകടത്തി. ഞായറാഴ്ച പ്രത്യേക സിബിഐ സംഘം ഒമാനിലെത്തി ഇയാളെ കസ്റ്റഡിയിലെടുത്ത് ഇന്ത്യയിലെത്തിക്കുകയായിരുന്നു. ഏകദേശം 6,000 കോടി രൂപയുടെ അനധികൃത ഓൺലൈൻ വാതുവെപ്പ്, സാമ്പത്തിക തട്ടിപ്പ്, കള്ളപ്പണം വെളുപ്പിക്കൽ എന്നിവയുമായി ബന്ധപ്പെട്ട കേസിലാണ് നടപടി. ഇന്റർപോൾ പുറപ്പെടുവിച്ച റെഡ് കോർണർ നോട്ടീസിന്റെ അടിസ്ഥാനത്തിൽ റോയൽ ഒമാൻ പൊലീസ് ചന്ദ്രാകറിനെ കണ്ടെത്തി തടങ്കലിലാക്കിയിരുന്നു. തുടർന്ന് സിബിഐയും എൻഫോഴ്‌സ്‌മെന്റ് ഡയറക്ടറേറ്റും ആവശ്യമായ തെളിവുകൾ സഹിതം ഒമാൻ അധികൃതർക്ക് കൈമാറൽ അപേക്ഷ സമർപ്പിച്ചു. ഇന്ത്യൻ ഏജൻസികളുടെയും ഇന്റർപോളിന്റെയും ഒമാൻ സർക്കാരിന്റെയും ഏകോപനത്തിലൂടെയാണ് നടപടികൾ പൂർത്തിയായത്.
റായ്പൂരിലെ സി.ബി.ഐ പ്രത്യേക കോടതിയിൽ ഹാജരാക്കുന്നതിനായി ഇയാളെ വൈദ്യപരിശോധനയ്ക്ക് ശേഷം വിമാനമാർഗ്ഗം ഛത്തീസ്ഗഡിലേക്ക് കൊണ്ടുപോകും. ക്രിക്കറ്റ്, ഫുട്ബോൾ, കാർഡ് ഗെയിമുകൾ തുടങ്ങിയവയുടെ മറവിൽ രാജ്യത്തുടനീളം വലിയ തോതിലുള്ള അനധികൃത ഒൺലൈൻ ചൂതാട്ട ശൃംഖലയാണ് ഇയാൾ നടത്തിയിരുന്നത്. വ്യാജ ബാങ്ക് അക്കൗണ്ടുകൾ വഴിയും ഹവാല മാർഗ്ഗത്തിലൂടെയുമാണ് കോടിക്കണക്കിന് രൂപയുടെ തട്ടിപ്പ് പണം പ്രതികൾ വെളുപ്പിച്ചെടുത്തതെന്ന് അന്വേഷണത്തിൽ കണ്ടെത്തിയിട്ടുണ്ട്.
രണ്ട് സിബിഐ കേസുകളിലും എൻഫോഴ്‌സ്‌മെന്റ് ഡയറക്ടറേറ്റിന്റെ ഒരു കേസിലും ചന്ദ്രാകർ പ്രതിയാണ്. രണ്ട് സിബിഐ കേസുകളിലും കുറ്റപത്രം സമർപ്പിച്ചിട്ടുണ്ട്. ഇഡിയും ഇയാൾക്കെതിരെ പ്രോസിക്യൂഷൻ പരാതി നൽകിയിട്ടുണ്ട്. മഹാദേവ് ഓൺലൈൻ ബുക്ക് എന്ന പേരിൽ പ്രവർത്തിച്ചിരുന്ന ശൃംഖല ക്രിക്കറ്റ്, ഫുട്ബോൾ, കാർഡ് ഗെയിമുകൾ തുടങ്ങിയവയിൽ അനധികൃതമായി പണം വെച്ച് കളിക്കുന്നതിനുള്ള സൗകര്യം ഒരുക്കിയെന്നാണ് അന്വേഷണ ഏജൻസികളുടെ കണ്ടെത്തൽ. രാജ്യത്തിന്റെ വിവിധ ഭാഗങ്ങളിൽ ഫ്രാഞ്ചൈസി മാതൃകയിൽ പാനലുകളും ശാഖകളും സ്ഥാപിച്ചായിരുന്നു പ്രവർത്തനം. ഉപയോക്താക്കളിൽ നിന്ന് ശേഖരിച്ച പണം നിരവധി വ്യാജ ബാങ്ക് അക്കൗണ്ടുകളിലൂടെ കൈമാറ്റം ചെയ്യുകയും പല ഇടപാടുകളായി വിഭജിച്ച് ഹവാല മാർഗം വിദേശത്തേക്ക് കടത്തുകയും ചെയ്തെന്നാണ് സിബിഐ ആരോപിക്കുന്നത്. ഇതിൽ ഒരു ഭാഗം ഉദ്യോഗസ്ഥർക്ക് കൈക്കൂലിയായും സംരക്ഷണപ്പണമായും നൽകിയതായും അന്വേഷണത്തിൽ കണ്ടെത്തിയിട്ടുണ്ട്. കേസുമായി ബന്ധപ്പെട്ട് ഇന്ത്യയിലും വിദേശത്തുമായി നിരവധി സ്വത്തുക്കൾ ഇഡി നേരത്തെ കണ്ടുകെട്ടിയിരുന്നു.
