ഇസ്ലാമാബാദ്/ഹോങ്കോങ്: ഹോങ്കോങ് സിക്‌സസ് ടൂർണമെന്റിൽ (Hong Kong Sixes) ഇന്ത്യയ്‌ക്കെതിരെ നേടിയ വിജയത്തിൽ പാകിസ്താൻ ക്രിക്കറ്റ് ടീമിനെയും പിസിബി അധ്യക്ഷൻ മൊഹ്സിൻ നഖ്വിയെയും പ്രശംസിച്ച് രംഗത്തെത്തിയ പാക് പ്രധാനമന്ത്രി ഷഹബാസ് ഷെരീഫിന് സോഷ്യൽ മീഡിയയിൽ വൻ ട്രോൾ പൂരവും പരിഹാസവും. പ്രധാനപ്പെട്ട അന്താരാഷ്ട്ര ടൂർണമെന്റുകളിലൊന്നും നേട്ടങ്ങൾ ഉണ്ടാക്കാൻ കഴിയാത്ത പാകിസ്താൻ, പ്രാദേശിക വിനോദ ടൂർണമെന്റിന്റെ തലത്തിലുള്ള ഒരു മത്സരത്തിലെ വിജയം ആഘോഷമാക്കിയതാണ് കായിക പ്രേമികളെ ചൊടിപ്പിച്ചത്.
ഹോങ്കോങ്ങിൽ നടന്ന മത്സരത്തിൽ ഇന്ത്യ ഉയർത്തിയ 89 റൺസ് ലക്ഷ്യം വെറും 23 പന്തിൽ പാകിസ്താൻ മറികടന്ന് വിജയിക്കുകയായിരുന്നു. മത്സരശേഷമാണ് പ്രധാനമന്ത്രി ഷഹബാസ് ഷെരീഫ് സോഷ്യൽ മീഡിയ പ്ലാറ്റ്‌ഫോമായ എക്സിൽ (X) ടീമിനെ അഭിനന്ദിച്ചുകൊണ്ട് സന്ദേശമയച്ചത്. ഇന്ത്യയ്‌ക്കെതിരായ വിജയം മികച്ച പ്രകടനമാണെന്നും കളിക്കാർക്കും ബോർഡ് തലവൻ മൊഹ്സിൻ നഖ്വിക്കും ആശംസകൾ അറിയിക്കുന്നതായും അദ്ദേഹം കുറിച്ചു.
എന്നാൽ, ഒരു രാജ്യത്തിന്റെ പ്രധാനമന്ത്രി തന്നെയെത്തി ആറ് കളിക്കാർ മാത്രം പങ്കാളികളാകുന്ന 6 ഓവർ ടൂർണമെന്റിലെ ജയം ആഘോഷമാക്കിയതോടെയാണ് ക്രിക്കറ്റ് ആരാധകർ ട്രോളുകളുമായി എത്തിയത്. ഐസിസിയോ (ICC) ഏഷ്യൻ ക്രിക്കറ്റ് കൗൺസിലോ (ACC) നടത്തുന്ന പ്രധാന ടൂർണമെന്റൊന്നുമല്ലിതെന്നും, ഇത്രയും ചെറിയ ഒരു നേട്ടത്തിൽ രാജ്യത്തിന്റെ പ്രധാനമന്ത്രി തന്നെ വീമ്പിളക്കേണ്ടതുണ്ടോ എന്നുമാണ് സോഷ്യൽ മീഡിയ ചോദിക്കുന്നത്. ഇതോടെ രാജ്യത്ത് ദേശീയ അവധി പ്രഖ്യാപിക്കുമോയെന്നും അടുത്ത ദിവസം വിളംബരം വരുമോയെന്നും ആരാധകർ പരിഹസിച്ചു.
യുഎഇയോട് തോറ്റ ശേഷമാണ് പാകിസ്താൻ ഇന്ത്യയെ പരാജയപ്പെടുത്തിയത് എന്നതും ആരാധകർ ചൂണ്ടിക്കാണിക്കുന്നു. എന്തായാലും യഥാർത്ഥ ക്രിക്കറ്റ് ലോകത്ത് വിജയം കണ്ടെത്താൻ വിഷമിക്കുന്ന പാകിസ്താന് ഇത്തരം മത്സരങ്ങളിലെ ജയം പ്രധാനമന്ത്രി വരെ ആഘോഷമാക്കേണ്ട ദുരവസ്ഥയാണെന്ന തരത്തിലാണ് ചർച്ചകൾ കൊഴുക്കുന്നത്.
